Un Show di Lus Bibu bou di Awa

Un sambuyadó ku tabata dùik banda di un par di baranka su bista a kai riba un tipo di sekat di 60 centimeter largu ku tabata drif den un splet di baranka, kasi perfektamente kamuflá den su fondo blou-shinishi. Ora e sambuyadó a yega mas serka, e sekat a kambia di koló i bira un kòrá briante. Pero na momentu ku e sambuyadó a bèk, e sekat a bolbe haña su koló original. Bo a yega di puntra bo mes kon e moluskonan (weekdier) asombroso aki ta logra e hazaña ei—algu ku otro tipo di sekat tambe por hasi?

Nan sekreto ta sinta den nan cromatofores, esta, sèlnan di kueru ku ta kontené pigmènt. Nervionan ta kousa kontrakshonnan muskular ku ta regulá tamaño di e sèlnan aki, lokual ta pone e kriatura kambia di koló i krea diferente patronchi di koló.

Ademas di kontrolá koló, hopi espesie di sekat ta produsí asta nan mes lus. Nan ta hasi esei meskos ku bichi’ kandela. E kapasidat aki pa emití lus sin generá kalor, algu ku hopi otro kriatura di laman tambe tin—for di lebelebe di awa te kabaron—ta wòrdu kousá dor di reakshonnan kímiko kompliká den sèlnan ku yama fotosites òf den órganonan ku yama fotofores. Tambe e por wòrdu kousá dor di bakterianan lombrante ku ta biba riba e kriaturanan aki i a la bes dependé di nan.

Den kaso di reakshonnan kímiko kompliká, e sèlnan i òrganonan ku ta emití lus ta kontené un supstansia kímiko ku yama luciferin, ku ta reakshoná ku oksígeno ora tin un sierto enzima presente i ta saka un lus ku por lo general ta blou bèrdè. E revista Scientific American ta bisa ku algun órgano radiante “ta manera aparatonan kompliká ku tin lèns pa enfoká, filter di koló òf un klèp ahustabel ku ta sirbi komo un switch di sende/paga. Sekat ku tin tantu fotofores komo cromotafores den nan kueru por kontrolá tantu e koló komo e intensidat di lus produsí.”

Kriaturanan ku ta bria dor di usa bakteria lombrante ta akomodá e huéspetnan chikitu aki den órganonan spesial di lus ku tin un suministro amplio di kuminda. E sanger ta hiba nutrishon p’e mikrobionan, den un sentido, pagando asina e “resibu di lus.”

[Rekonosementu pa Potrèt na página 31]

Potrèt chikitu: Pa kortesia di Jeffrey Jeffords/www.divegallery.com

© David Nicholson/Lepus/Photo Researchers, Inc.