“Yehova, Bo A Haña Mi!”

Segun e relato di Nelly Lenz

“Testigu di Yehova menernan ta?” Mi a puntra dos hende hòmber ku a bini nos kas. Nan a kontestá: “Sí.” Mi a sklama: “Ami tambe!” Mi tabatin apénas 13 aña di edat i no tabata bai reunion na Salòn di Reino. Mi mayornan no tabata Testigu di Yehova. Pakiko, anto, mi a identifiká mi mes komo tal?

SI NO tabata pa un Testigu di Yehova, podisé lo mi no a nase nunka. Mi mama a sali na estado di mi tempu ku e tabata biba na Montreal, Quebec, Canada. E tabatin apénas 17 aña di edat. Su famia a pone hopi preshon riba dje p’e hasi aborto i el a bai di akuerdo.

Mami a pidi un dia liber di trabou p’e bai hasi e aborto. Aparentemente su doño di trabou, ku ta un Testigu di Yehova, a haña sa pakiko mi mama a pidi liber. El a papia un ratu ku Mami i splik’é kon presioso e don di bida ta. (Salmo 139:13-16) Riba kaminda p’e klínika, Mami a sigui pensa riba loke su doño di trabou a bis’é. Esei a pon’é kambia di idea i disidí pa no kometé e aborto. Despues ku mi a nase na 1964, mi mama a hinka mi den un orfanato.

Mi Promé Kontakto ku e Bèrdat di Beibel

Tempu mi tabatin rònt di dos aña di edat, mi mama ku e hòmber ku el a kaba di kasa kuné a saka mi for di e orfanato. Tempu ku nos tabata biba na Sainte-Marguerite-du-Lac-Masson, nan a kuminsá studia Beibel ku Testigunan di Yehova i asistí na reunionnan di kongregashon. Ma despues di poko tempu nos a muda pa Boisbriand, i mi mayornan a stòp di studia.

Un par di aña despues, nan a reanudá nan studio. Ami tabata skucha loke nan tabata papia tokante e speransa bíbliko di un paradeis riba tera. (Lukas 23:43) Mi a bin haña un gran amor pa Yehova.

Sin embargo, un dia Mami a bisa mi ku nan a stòp di studia ku e Testigunan i ku nos lo no bai Salòn di Reino mas. Na promé instante, mi tabata kontentu. Komo mucha di ocho aña, tin biaha mi tabata haña e reunionnan muchu largu. Pero e mesun anochi ei, mi kier a papia ku Yehova den orashon, i mi tabatin miedu ku lo e no a skucha mi.

E siguiente djadumingu atardi, mi a mira nos bisiñanan ku ta Testigu di Yehova sali pa bai reunion na Salòn di Reino. Mi a kuminsá yora i puntra Dios: “Pakiko nan yunan sí por bai reunion i ami no?” No opstante, e palabranan di Salmo 33:18 a resultá di ta bèrdat: “Ata, e wowo di SEÑOR ta riba esnan ku ta tem’é, riba esnan ku ta spera riba su miserikòrdia.”

Bèk na Salòn di Reino

Despues di tres siman, mi a bishitá nos bisiñanan i a bisa e mama, Lilianne, ku mi kier a bai reunion. Lilianne a splika mi ku esei no por pasobra mi mama no kier a tende nada mas di Testigunan di Yehova. Pero riba mi insistensia el a bai kas ku mi pa puntra Mami si mi por a bai ku nan. Pa mi sorpresa, Mami a bai di akuerdo. El a bisa ku e reunionnan lo a siña mi bon prinsipionan. Asina mi a kuminsá bai reunion tur djadumingu.

 Pa tres aña largu mi a bai e reunionnan di kongregashon. Pero ora mi a kumpli 11 aña, mi mayornan a divorsiá, i ami ku mi mama a bai biba otro kaminda. Atrobe mi a pèrdè tur kontakto ku Testigunan di Yehova.

Un Enkuentro Inesperá

Un dia mi tabata sintá riba stupi dilanti di nos kas ora dos Testigu di Yehova—Eddie Besson i Don Fisher—a aserká mi i puntra mi si mi mayornan ta na kas. Ora mi a bisa nan “nò,” nan a bira bai. Pero mi a sali na kareda nan tras, i nos tabatin e kòmbersashon ku mi a konta na prinsipio.

Ta di komprondé ku e dos hòmbernan a keda sorprendí ora nan a tende mi identifiká mi mes komo un Testigu di Yehova. Mi a splika nan mi situashon i mi a roga nan pa bini bèk e mesun anochi ei. Ora mi a bisa Mami ku e Testigunan lo pasa, el a rabia mashá i a bisa mi ku lo e no laga nan drenta paden. Pió ainda, el a plania pa bai promé ku nan yega. Ku awa na wowo mi a roga Mami pa keda. Nèt e tabata preparando pa bai, e bèl a zona. I ken tabata na porta? Eddie Besson. Bo por imaginá bo kon kontentu mi a keda ora Mami a aseptá un studio di Beibel?

Por fin mi por a bai reunion di kongregashon atrobe! Sin embargo, ménos ku un aña despues, mi mama a bolbe stòp di studia. E biaha aki, el a prohibí mi di tin kontakto ku e Testigunan i a deshasí di tur e publikashonnan di Testigunan di Yehova ku e por a haña. Pero mi a logra skonde un Beibel, un buki di kantika, dos volúmen di E Toren di Vigilansia, dos Anuario di Testigunan di Yehova, i un buki titulá E berdad cu ta hiba na bida eterna. * Durante mi último studio, mi a puntra Eddie Besson kiko mi por a hasi, ya ku mi tabata stima Yehova masha hopi. El a animá mi pa studia riba mi mes i hasi hopi orashon. El a sigurá mi ku Yehova lo a perkurá pa mi. Mi tabatin apénas 14 aña di edat.

Mi Mes A Tene Mi “Reunionnan”

Djei padilanti, tur djadumingu mi tabata drenta mi kamber i hasi komo si fuera mi tabata na un reunion. Mi tabata kanta e kantika “Fiha Bo Bista Riba e Rekompensa!” na kuminsamentu i kabamentu pasobra esei tabata e úniko kantika di Reino ku mi por a kòrda. Te awe, mi no por kanta e kantika aki sin ku mi wowo yena ku awa. Tambe mi tabata studia un artíkulo di e Toren di Vigilansia den e volúmennan ku mi tabatin. Mi tabata sera mi “reunion” ku orashon. Pues ounke mi no tabata asosiá mas ku e Testigunan, mi a sinti ku Yehova tabata ku mi.

Ora mi a hasi 17 aña, ami ku Mami a muda bai Montreal. Tabata añanan difísil, pasobra nos hogar sigur no tabata un refugio di amor.

El A Haña Mi!

Un dia Mami a aseptá e buki Bo por biba pa semper den Paradijs riba tera di e Testigunan di Yehova. Ora mi a yega kas, mi a mir’é riba mesa i a kuminsá blader den dje. Na momentu ku mi a mira e nòmber di Dios, Yehova, den dje, mi a kuminsá yora i mi a bisa den mi mes: “Yehova, bo a haña mi!”

Mi mester a tuma kontakto ku mi rumannan kristian. Pero kon? Mami a bisa mi ku e kier sa ku un di e bisiñanan ta Testigu di Yehova. Pues riba kaminda pa trabou, mi a pasa kas di nos bisiña i primi bèl di porta. Un hòmber mitar na soño a bini na porta. Ora mi a bis’é ku mi ta un Testigu di Yehova i ku mi ke batisá, el a keda masha sorprendí! El a hasi areglo pa un ruman muhé kristian ku yama Josée Miron studia Beibel ku mi. Pero atrobe Mami a kuminsá oponé mi studio di Beibel. El a bisa mi ku mi tabatin ku warda te dia mi hasi 18 aña pa mi por bira un Testigu.

Un Bida di Famia Kueste Loke Kueste?

Mi doño di trabou a ripará ku mi situashon na kas tabata bayendo di malu pa pió. Vários biaha e tabata invitá mi pa pasa fin di siman serka e ku su kasá. Dor ku mi tabata gusta kabai, hopi bes nos tabata bai kore kabai huntu. Mi a sinti ku nan tabata manera mi mayornan.

Un dia mi doño di trabou a bisa mi ku e ku su kasá tabata stima mi hopi i ku nan tabata ke pa mi bin biba serka  nan. El a ofresé mi algu ku semper mi a deseá, esta, un famia amoroso, pero bou di e kondishon ku lo mi a stòp di asosiá ku Testigunan di Yehova. Nan a duna mi un siman pa pensa riba nan oferta, pero mi no tabatin mester di ni sikiera un dia. Mi a kontestá nan mesora. Nunka Yehova a bandoná mi, i p’esei ami tampoko lo no bandon’é.

Mi Sirbishi na Dios

Pa motibu di e difikultatnan ku mi tabata pasa aden na kas, mi a muda bai biba serka mi tata di kriansa. El a animá mi pa sigui studia Beibel, i riba 17 di desèmber 1983, ku 19 aña, mi a batisá. Mi tabata hopi kontentu di mira Eddie Besson na mi boutismo. Awor sí no tabatin duda den su mente ku mi ta un Testigu di Yehova!

Sin embargo, mi tata di kriansa su komportashon pa ku mi a kambia despues ku mi a batisá. Ki ora ku el a mira mi hasi orashon, e tabata papia masha duru i asta tabata tira mi ku kos! Tambe el a insistí pa mi sigui un edukashon avansá den un manera ku lo a stroba mi alkansá mi meta di bira un pionero, un evangelisadó di tempu kompletu. Despues di tempu el a saka mi for di su kas. El a duna mi un chèk di 100 dòler i bisa mi ku ora mi kobr’é, lo mi kòrda ku no ta Yehova ta sòru pa mi.

Mi a bira un pionero dia 1 di sèptèmber 1986, i te awe mi tin e chèk ei, sin nunka a kobr’é! Tin biaha tabata difísil pa traha pionero den un área di kunuku sin outo. Pero miembronan di e kongregashon lokal tabata masha bondadoso i un bon yudansa pa mi.

Ku tempu, mi a topa un hòmber kristian amabel ku yama Ruben Lenz. Nos a kasa na 1989. Aktualmente Ruben ta sirbi komo ansiano di kongregashon na Milton, Ontario, Canada, kaminda nos ta bibando for di aña 2002. Nos matrimonio tabata un di e bendishonnan mas grandi ku Yehova a drama riba mi. Mi a sigui den e sirbishi di tempu kompletu te ora nos a haña nos promé yu, Erika, na 1993. Un poko mas ku tres aña despues, nos a haña un yu hòmber ku yama Mika. Despues di a pasa hopi aña mi so, Yehova Dios a bendishoná mi rikamente ku un famia ku ta stim’é meskos ku ami ta stim’é.

Ounke pa un tempu mi tabata separá for di e pueblo di Yehova segun ku mi tabata krese, nunka mi a stòp di spera riba Dios i karga mi speransa di bida eterno den Paradeis. (Juan 3:36) Mi ta hopi gradisidu ku Yehova a “haña” mi!

[Nota]

[Plachi na página 23]

Koriendo kabai di mi doño di trabou

[Plachi na página 23]

Nelly Lenz ku su esposo, Ruben, i yunan, Erika ku Mika