E Siboyo Tan Gustá

Di un eskritor di Spièrta! na Mexico

Un kushina lo no ta kompletu sin siboyo den dje. Kasi den tur kos bo por tira e bèrdura di hopi uso aki, manera den sòpi, salada, un plato prinsipal, remedi di kas. Asta e por pone bo yora un tiki.

E siboyo ku bo ta usa na kas ta pertenesé na un espesie di bunita mata di flor—manera siboyo di oro, siboyo di brùit i konofló di adorno—i e mes tambe ta saka flor masha bunita. Ma loke bo ta haña práktikamente den tur kushina na mundu ta e batata, ku básikamente ta un kònòpi di flor kubrí ku blachi diki i ku ta krese bou di tera.

Siboyo ta un di e bèrduranan di mas bieu ku hende a yega di kultivá. Beibel ta duna un indikashon kon komun uso di siboyo tabata. E ta mustra ku pa rònt di aña 1513 promé ku nos era, e pueblo di Israel a anhelá e siboyonan ku nan tabata kome tempu ku nan tabata esklabo na Egipto.—Numbernan 11:5.

Pero kiko a hasi e smak di siboyo asina gustá den diferente kultura? Algu ku sigur a kontribuí na esei ta su komponentenan di suafel, lokual ta dun’é un aroma hopi spesial i hasié un tiki pikante. I su ásido sulféniko ta forma e supstansia ku ta okashoná e lágrimanan bon konosí.

Hopi Mas ku Djis un Ko’i Kome

Siboyo ta hopi benefisioso pa salú di hende. E ta kontené supstansianan nutritivo manera kalsio, fòsfòr i vitamina C. Pero atraves di historia, siboyo a haña su balor spesialmente pa su efektonan medisinal. Te ku awe hende ta us’é pa kombatí vários enfermedat, manera fèrkout, inflamashon di garganta, aderverkalking, malesa di ader di kurason, diabétis i asma. Tambe segun ekspertonan siboyo ta yuda kombatí infekshon, kolesteròl, inflamashon, trombósis i kanser.

Siboyo ta bini na diferente koló: blanku, hel, maron, bèrdè, kòrá i püs. Bo por hañ’é pa kome fresku, kushiná, den bleki, den zür, seku, na puiru, fini di slais òf dou-dou. Pues, ounke siboyo ta pon’é bo yora un tiki, e no ta un bèrdura maravioso?