Hanbok—E Trahe Nashonal di Korea

Di un eskritor di Spièrta! na Repúblika di Korea

KOREANONAN no ta bisti paña solamente pa tapa kurpa. Un ehèmpel di esaki ta e trahe tradishonal di Korea ku yama hanbok.

Un Diseño Úniko

E trahe hanbok ta konsistí di un blusa estilo di bolero i un saya largu, di proporshon úniko. * Den algun kaso, e saya ta kuater biaha mas largu ku e blusa. Dor di esei, asta un muhé kòrtiku ku tiné bistí ta mustra mas haltu ku e ta.

E trahe hanbok kasi no tin ploi i ta simpel kosé. E manganan di e blusa ta habri manera ala, miéntras ku e saya ta span bai abou for di altura di pechu i baha elegantemente te na suela. Nan ta mara un tipo di streki inusual ku ta para nèt riba pechu. E dos puntanan di e streki ku ta sali for di e kònòpi i baha bai abou parti dilanti di e blusa ta asina largu ku nan ta yega kasi na ènkel. Hopi hanbok tin tambe diseñonan floral i motifnan di liña masha bunita bòrdá rònt di e manganan i e garganta di e blusa i tambe riba e saya. Sí, e midínan, e manera ku e ta kosé i e kolónan di e hanbok tur ta kombiná pa hasié un trahe berdaderamente elegante.

Un Trahe Útil

E diseño práktiko di hanbok ta resaltá su bunitesa. Siendo ku e trahe aki por lo general ta trahá di fibra natural, ta fásil pa bistié henter aña. Por ehèmpel, un hanbok ku ta trahá di fibra di mata manera ramie òf hennep tin bon ventilashon, lokual ta yuda esun ku tiné bistí keda fresku durante zomer, ounke e hanbok ta tapa kasi henter kurpa. Otro tipo di material ta yuda konserbá e kayente di kurpa, lokual ta hasi nan mas adekuá pa wenter.

 Hanbok ta konfortabel tambe. E karakterístika aki no tin nada di haber ku moda pero el a desaroyá komo un nesesidat práktiko ku a eksistí hopi siglo pasá tempu ku e hendenan tabata hasi hopi uso di kabai den e área aki. E revista Culture & I ta bisa: “Nan a traha paña ku por a adaptá n’e klima friu, ku a permití nan yag i move di un lugá pa otro.” P’esei, ginetenan koreano a evitá kualke tipo di paña ku a stroba nan di move bon. Sí, e koreanonan ku ta gusta bisti hanbok awe mester ta gradisidu na nan antepasadonan p’e komodidat físiko ku e ta duna!

Un otro karakterístika interesante di hanbok ta e tradishon di antaño di usa koló pa propósitonan simbóliko. Den pasado, hopi bes e gremio di e hendenan na poder tabata bisti kolónan bunita, miéntras ku hende komun tabata bisti prinsipalmente na blanku. Tambe, bo por a identifiká un muhé soltera na su kombinashon di bistí hel ku kòrá. Despues ku e kasa, e koló di su hanbok a reflehá e nivel sosial di su kasá. Awendia, na un fiesta di kasamentu mama di e brùit lo mester tin un trahe ros, miéntras ku por lo general mama di e brùidehòm ta bistí na blou. Dor di e kustumber aki ta masha fásil pa identifiká nan.

Hanbok Djawe

Despues di e Guera Koreano (1950-53) a bini un kampaña di modernisashon. Dor di esei, den e dékada di 1970 hanbok a bai for di moda i na su lugá a bini e estilonan di paña di e mundu oksidente. Pues loke un tempu tabata un trahe kasual di tur dia a keda den kashi di paña, i tabata sak’é solamente pa kasamentu, dia di fiesta i otro okashonnan spesial.

Sin embargo, den tempunan mas resien, hanbok ta hasiendo un comeback. Por ehèmpel, na 1996 nan a hasi un esfuerso pa bolbe hasi e estilo popular dor di proklamá e promé djasabra di luna komo “e dia pa bisti hanbok.” Fábrikanan di paña a bini ku hanboknan nobo spesialmente diseñá pa atraé hóbennan. Aparentemente e idea di bai bèk na nan kustumbernan tradishonal a duna e koreanonan sierto satisfakshon, pasobra e hanbok moderno a haña un bon aseptashon. Den un era kaminda hopi di e último estilonan ta enfatisá sensualidat, hanbok ta un ehèmpel refreskante di un trahe bunita i desente.—1 Timoteo 2:9.

[Nota]