Un Bataya Kontinuo Kontra Awa

DI UN ESKRITOR DI SPIÈRTA! NA HULANDA

“Ku un avanse iresistibel laman ta inundá un pais grandísimo dos biaha pa dia; p’esei nos no sa sigur si e suela ta pertenesé na tera òf na laman. Un pueblo desafortuná ta biba ei riba seritunan haltu ku nan mes a traha. E seritunan aki ta mas haltu ku e máksimo nivel di awa konosí pa nan.”

KU E deklarashon ariba menshoná, e outor romano di promé siglo, Plinio e Bieu, a deskribí e bataya ku e habitantenan di e regionnan mas abou na kosta di Noordzee a hiba kontra laman. Awe e bataya aki ta kontinuá. De echo, rònt di mitar di e mas ku 16 mion habitantenan den e region ei ta biba i traha bou di nivel di laman.

Apesar di e bataya kontinuo, e habitantenan di Hulanda òf Paisnan Abou, manera nan ta yam’é tambe, no tin duele di nan mes. Bèrdat nan pais por ta plat i chikitu, * pero e ta entre e nashonnan mas riku di mundu. I pa straño ku por parse, gran parti di e prosperidat di Hulanda ta hustamente debí na e awa i nan bataya kontra dje.

Un motibu importante pakiko hulandesnan ta preferá di keda biba den e área aki di nan pais ta ku e tera ta fértil. E ta bon pa agrikultura, hortikultura i krio di bestia. I e pais  ta ekonómikamente bon situá pasobra e riunan prinsipal di Europa ta pasa dor di dje bai laman. Nada straño ku Hulanda—inkluso e haf di Rotterdam, ku ta e haf mas grandi di mundu—ta ser yamá e porta di Europa!

Hopi Tempu Kaba Ta Traha Dijk

Sin embargo, prosperidat no a bini di mes. Durante e último 900 añanan, hulandesnan a bin ta konstruí dijk pa protehá nan mes kontra e awa di tantu e riunan ku ta kore dor di e pais komo di laman. Dor di esei, awor tin míles di kilometer di dijk ku ta protehá Hulanda kontra awa di laman i di riu, loke en bèrdat ta un logro impreshonante!

Otro paisnan tambe tin dijk. Sin embargo, faktornan manera haltura di tereno ta hasi e dijknan di Hulanda algu indispensabel. Koos Groen, ko-outor di e buki Dijken, a bisa: “Si e poblashon kompletu di Suisa bai afó ku fakansi un aña largu, dia nan bini bèk, nan tera lo t’ei ainda. Si e hulandesnan hasi meskos, pa dia nan ta bèk mitar di nan tera i 75 porshento di nan kasnan lo a disparsé.” *

Awe miónes di hulandes ku ta biba bou di nivel di laman por drumi trankil anochi sin tin nodi preokupá ku awa lo drenta nan kas, pasobra e bataya kontra laman ta sigui konstantemente. Konsiderá e esfuersonan ku ta ser hasí pa mantené e playanan i e dùinnan.

Mantenshon di Playa i Dùin

Den transkurso di míles di aña, a forma un barera natural ku ta konsistí di playa i dùin ku ta protehá e region aki kontra laman. Pero eroshon ta debilitá e barera aki konstantemente. Pa kontrarestá esaki, barkunan spesial ta saka santu for di fondo di laman entre 9 pa 20 kilometer pafó di kosta i plam’é na e playa. For di 1970 te ku awe, mas ku 85 mion meter kúbiko di santu a ser saká i hibá kosta pa mantené e dùinnan di e pais den bon kondishon!

Sin embargo, no ta e poblashon humano so ta benefisiá di e konserbashon di dùin. Segun e korant hulandes NRC Handelsblad, “ounke e dùinnan ta okupá apénas 1 porshento di e superfisie di Hulanda, ei bo ta haña tres kuart di  tur tipo di para ku ta biba den e pais i dos tersera parti di tur tipo di mata mas desaroyá.”

E Liña di Defensa A Bira Mas Kòrtiku

Na 1932, hulandesnan a traha un dijk pa sera entrada di laman, e asina yamá Afsluitdijk di 32 kilometer largu. Den un tiru e dijk aki a kambia Zuider Zee for di un binnenwater di laman pa un lago, konosí komo IJsselmeer. Na mes momentu el a redusí e kosta di e pais di 1.900 kilometer pa un poko mas ku 1.300 kilometer.

Rònt di 20 aña despues, na 1953, despues ku un inundashon desastroso a mata 1.835 hende, konstruktornan di dijk a kuminsá un proyekto mas grandi ainda. Nan meta tabata pa sera tur entrada di laman den e parti zùitwèst di e pais ku eksepshon di esnan ku ta hiba n’e hafnan di Rotterdam i Antwerpen. Ku tempu, e Delta Plan aki, manera nan a yama e proyekto, a redusí e kosta di e pais mas ainda, i awor e ta 622 kilometer largu.

Protekshon Kontra Riu

E menasa di awa no ta bini di laman so sino tambe di e riunan ku ta pasa dor di Hulanda promé ku nan yega laman. Pa fin di wenter, despues di un periodo largu di áwaseru i na momentu ku e eis den e serunan kuminsá dirti, e gran kantidat di awa ku ta bini di paisnan manera Suisa, Alemania, Fransia i Bèlgika ta basha den e riunan aki i drenta Hulanda.

E kantidat enorme di awa ei por kousa problema serio. Por ehèmpel, na febrüari 1995, e riunan ku ta pasa meimei di e pais a subi asina tantu ku nan a kuminsá teme ku e dijknan por a kibra bou di e preshon. Si esei a sosodé, awa lo a inundá e áreanan tras di e dijknan ku hopi meter. Groen, sitá anteriormente, a bisa: “Ta poko hende ta ègt realisá kiko por a pasa si e dijknan ku ta wanta riu a kibra.”

Un “Badkuip” sin Dak

Distinto for di kualke otro pais, Hulanda ta konosí pa su poldernan, esta, “terenonan  nobo” bou di nivel di laman, rondoná pa dijk. Te na final di siglo 19, nan tabata regulá e nivel di awa den e poldernan ku mulina di bientu. Awendia nan ta usa pòmp kontrolá dor di kòmpiuter pa hasi e trabou. Peter Nowak, kende ta mantené un pòmp banda di Amsterdam, a splika kiko esaki ta kome bebe.

El a bisa: “Bo por kompará un polder ku un badkuip. Hopi bes un polder ta situá vários meter bou di nivel di laman. E dijknan rònt di e polder ta strob’é di yena ku awa. Pero un dijk no ta un dak. Áwaseru pisá por pone e parti paden, òf e badkuip, yena ku awa. Pa prevení e problema serio aki, ta pòmp e awa saka afó ku forsa. Pero unda e awa mester bai?”

Un polder ta kontené un ret di kanal ku ta dirigí e awa n’e pòmpnan. Pa e kanalnan aki no verstòp, kada kunukero mester limpia e kanalnan riba su tereno. Despues e pòmp ta manda e awa ku ta di mas for di e polder den un boezem, esta, un sistema ingenioso di lago i kanal ku ta fungi komo un depósito di awa pafó di e polder. Ora e awa den e boezem pasa su nivel máksimo, ta lag’é basha bai laman durante mareo abou.

Nowak a sigui splika: “Pa e ekonomia hulandes ta hopi importante pa mantené e nivel korekto di awa den e polder. Durante e zomernan seku, ta laga awa drenta pasobra kunukeronan tin mester di awa den nan kanalnan pa nan yerbanan òf kultivonan. Den algun di e poldernan aki nan ta kultivá flor, ku ta un di e produktonan di eksportashon mas famoso di e pais.”

Bibando Kaminda un Tempu Tabatin Laman

Den siglo 20, hulandesnan no tabata mira e poldernan komo simpel kunuku mas; nan a kuminsá mira nan komo mas lugá di biba. Mei siglo pasá, ora e planifikadónan di stat a kuminsá diseñá statnan den polder, nan no tabatin muchu eksperensia kon pa organisá komunidatnan nobo. Sin embargo, awe, si bo bishitá e poldernan, lo bo mira ku e planifikadónan di stat a logra establesé komunidatnan habitabel riba loke un tempu tabata fondo di laman! Pakiko bo mes no ta bai tira un bista?

Abo a yega di bisa ku bo no ta sinti bo muchu kómodo ku e idea di dal un keiru bou di nivel di laman? Esei ta komprendibel, pero hopi hende a keda sorprendí ora nan a haña sa ku nan a hasi esei kaba sin ku nan a realisá. Por ehèmpel, si bo a yega di pasa di tránsito na Aeropuerto Schiphol, banda di Amsterdam, bo avion a baha riba loke un tempu tabata fondo di un lago. E echo ku bo no a ni ripará ku bo tabata komo kuater meter bou di nivel di laman ta demostrá ku e dijknan na Hulanda te ainda ta den bon estado!

[Nota]

[Kuadro/Plachinan na página 18]

Asambleanan BOU DI NIVEL DI LAMAN

Un di e dos Salònnan di Asamblea di Testigunan di Yehova na Hulanda ta keda sinku meter bou di nivel di laman. Un Testigu di Yehova a remarká: “Dos biaha pa aña, ora nos ta riba kaminda pa nos asamblea, nos ta kòrda hopi bes riba e palabranan di Dios ku tin pará skirbi na Jòb 38:8 i 11: ‘Ken a sera e laman ku portanan i a bisa: “Te aki bo ta yega, ma no mas leu; i aki bo olanan orguyoso lo para”?’ E palabranan aki ta pone nos kòrda ku e manera ku Yehova por kontrolá e forsa inkreibel di awa ta muchu mas superior ku e proyektonan hidróuliko di ingenieronan humano, maske kon impreshonante nan logronan por ta.”

[Kuadro na página 19]

Ken Ta Mantené e DIJKNAN?

Mester mantené i tin biaha drecha e dijknan i sistemanan di drenahe. For di Edat Medio bini ariba, outoridatnan lokal i regional enkargá ku maneho di awa, e asina yamá huntanan di awa, a kumpli ku e responsabilidat aki. E huntanan aki a ser fundá riba un prinsipio di tres stap: interes, pago i bos. Esun ku tin interes den dijknan safe mester paga p’e maneho i mantenshon. Pero e tin derecho di bisa tambe kon tin ku kuida e interesnan ei i kon mester gasta e plakanan ku a ser kolektá pa esei.

Desde siglo 12 tin hunta di awa na Hulanda. Aktualmente tin mas ku 30. E outoridatnan di kada provinsia tin e poder pa forma, disolvé i regulá e huntanan ei. Ademas, ta keda na e huntanan pa determiná e tamaño i konstelashon di e “ehérsito di dijk.” E miembronan di e ehérsito aki ta biba den e área ku nan tin ku protehá. E kuido i siguridat di nan mes famia i di nan komunidat ta un bon motivashon pa nan. Den e dianan ku e nivel di awa ta haltu, nan ta patruyá e dijk, kla pa drenta akshon ku saku di santu i otro ekipo pa prevení kualke buraku. E huntanan di awa aki tin hopi tempu kaba ta garantisá ku e dijknan ta keda bon mantené.

[Mapanan na página 16]

(See publication)

Sin dùin i dijk, e área blou aki lo ta mayoria biaha bou di awa

[Plachi na página 17]

A konstruí dijknan inmenso pa protehá e áreanan mas abou situá tras di e dijknan

[Plachi na página 17]

Tur aña mester bolbe yena miónes di meter kúbiko di santu

[Plachi na página 18]

Ta masha normal pa outonan kore na un nivel mas abou ku barku

[Plachi na página 18]

E desaster di dijk na 1953

[Rekonosementu pa Potrèt na página 17]

Ámbos potrèt: Met vriendelijke toestemming van het Nederlandse Ministerie van Verkeer en Waterstaat

[Rekonosementu pa Potrèt na página 18]

E dos potrètnan ariba: Met vriendelijke toestemming van het Nederlandse Ministerie van Verkeer en Waterstaat