Biba Kompañá Ta un Bon Fundeshi pa Matrimonio?

DOS hende di e sekso opuesto ku ta biba kompañá “a bira un fenómeno komun den sosiedatnan industrialisá rònt mundu,” segun e revista Journal of Marriage and Family. Anto “alrededor di mitar di parehanan ku ta kompañá ta mira esei komo un manera pa evaluá nan kompatibilidat promé ku kasa.” Supuestamente anto, biba kompañá “mester eliminá inkompatibilidat i hasi matrimonionan ku ta tuma lugá despues mas stabil,” segun e Journal.

“Sin embargo, evidensia ta indiká e konklushon kontrario,” Journal a sigui bisa. “Entre parehanan kasá, esnan ku a biba kompañá promé ku nan kasa sa tin ménos satisfakshon den matrimonio, ta pasa ménos tempu huntu den e mesun aktividatnan, tin desakuerdonan matrimonial mas intenso, tin ménos sosten di nan pareha, ménos éksito den solushoná problema, [i] mas informe di problemanan matrimonial . . . Ademas, kompará ku parehanan ku a drenta direktamente den matrimonio, parehanan ku a biba huntu promé, ta kore mas riesgo di desintegrashon matrimonial [divorsio].”

Manera e estudio aki ta demostrá, loke por parse sabí for di un punto di bista humano kisas en realidat ta masha imprudente. E echo aki ta enfatisá e bèrdat di e palabranan di Jeremias 10:23: “No ta keda na hende pa dirigí su pasonan.” Ta muchu mas sabí pa akudí na Dios su Palabra, Beibel, ku ta perkurá hopi konseho ekselente riba e tema di matrimonio! (2 Timoteo 3:16) Por ehèmpel, Beibel ta bisa tokante e relashon matrimonial: “Un hòmber lo bandoná su tata i su mama i lo uni ku su esposa. I nan lo bira ún karni.”—Génesis 2:24; Mateo 19:5.

Dor di obedesé e instrukshon divino ei—en bes di sigui tras di rasonamentu humano eróneo i hopi bes inkonsistente—parehanan tin hopi chèns ku nan matrimonio lo ta berdaderamente felis i duradero.—Proverbionan 3:5, 6.