Bunita i Dushi!

BISHITÁ un hardin di flor, i bo sentidonan lo tin un eksperensia dushi i agradabel. Bo bista ta gosa di e flornan su koló i forma i tambe di nan diseñonan kompliká. Bo ta hole nan fragansia. Bo ta fula vários tekstura di nan pétalonan. Pero kiko di bo sentido di sabor? Bo por haña plaser tambe den e sabor di flor? Den algun pais, hende tin siglonan ta disfrutá di e sabor di flornan komibel. Si bo tin un di e siguiente flornan den bo hardin di flor òf bo hòfi di bèrdura, kisas bo tambe por disfrutá di e eksperensia. *

E Rosa Romántiko

Rònt mundu, rosa (famia di Rosa) ta probablemente e flor mas konosí i mas gustá. Fuera di e sortonan primario, tin míles di sorto ku hende a krusa ku otro. Komo ku faktornan manera e tipo di tera i temperatura ta influensiá sabor di flor, ta konsehabel pa purba un pétalo di e rosa òf di kualke otro flor promé ku bo disidí di us’é komo kuminda. Probablemente lo bo ripará ku e base di e pétalo ta un tiki marga. Si ta asina, kòrta e parti ei afó, òf si bo ta sirbi henter e flor, kome solamente e parti mas ariba.

E lista di plato ku bo por enrikesé ku rosa ta kasi sinfin. Purba flor di rosa den salada, kisas ku un tiki keshi suave i nechi di chòp. Usa pétalo machiká di rosa kòrá komo un èkstra ingrediente den bo sous faborito pa agregá sabor i koló. I dikon no duna bo spaguèti e toke final di pétalo di rosa kòrtá na repi-repi? Tambe rosa lo realsá e sabor di eiskrim i di bo ko’i bebe faborito.

Flor di Pampuna

Registronan ku ta data for di siglo 16 ta indiká ku hende tabata usa flor di un tipo di pampuna, zucchini (Cucurbita pepo), komo kuminda na kontinente di Amérika. I ta parse ku indjannan merikano tabata kome solamente e flornan machu (esnan ku ta krese riba stelchi largu i delegá) pa asina duna flornan hembra (esnan ku tin un fruta chikititu nan tras) chèns di reprodusí. Promé ku kushiná e flornan, kita e blachinan di pafó ku tin manera sumpiña fini riba nan. Por laga òf por kita e pistilo (stamper) di e flor. Den platonan prinsipal i sòpi, e sabor suave di flor di pampuna ta kombiná bon ku zeta di oleifi, maishi tierno i e pampuna mes. Pa un sabor mas fuerte, hasa e flornan den un tiki zeta i agregá siboyo, konofló, yerba i speserei di bo gustu. Tambe bo por yena e flornan ku un meskla di keshi, siboyo i yerba, anto sera e puntanan. Bati algun blanku di webu, agregá e dòlnan, i dòp e flornan den e meskla ei. Por último, dòp e flornan den paneermeel, hasa nan den hopi zeta, i disfrutá di nan sabor úniko!

E Kolorido Viooltje

Viooltjes di dos òf tres koló (Viola wittrockiana) típikamente tin plèki pretu riba nan pétalo, lokual ta duna nan un aparensia un poko straño. Segun Encyclopædia Britannica, ekspertonan ta kere ku viooltjes di hardin ta un sorto kultivá di esun di mondi (Viola tricolor), ku tin koló lila, blanku i hel. Viooltjes di mondi tambe ta komibel, pero e buki Edible Flowers—From Garden to Palate (Flornan Komibel—For di Hardin te den Boka) ta bisa ku si kom’é na “kantidatnan grandi [e] por ta venenoso.” E flor ta duna hopi sabor  i ta drecha e aparensia di salada di bèrdura i salada di fruta. Usa henter e flor, i agreg’é djis promé ku sirbié i despues ku bo a pone binager den e salada.Tambe bo por sirbié riba bo sòpi faborito.

Un di tres flor komibel di e famia di Viola ta maarts viooltjes (Viola odorata), ku ta kombiná hopi bon ku postre i ko’i bebe. (Wak e kuadro “Flornan Dushi pa Ko’i Bebe.”) Ningun otro flor di e famia di Viola ta ser konsiderá komibel.

E Leli Bibitu

E tantísimo blachinan largu i fini ku ta sali for di e batata di daglelie (famia di Hemerocallis) ta algu típiko di e mata aki. No mester konfundí su flornan ku tin un bida kòrtiku ku otro flor di e mesun famia, Liliaceae. Ya for di hopi tempu hende ta usa daglelie den kushina, i e flor su koló ta varia di hel pa kòrá. Si kushiná e flor aki un tiki asina, por sirbié komo bèrdura. Un otro posibilidat ta di kombiná su pétalonan ku ingredientenan di bo gustu pa traha un pasta moli i kaba has’é. Dekor’é ku un flor hinté.

Algun Otro Flor Komibel

E flor di yucca (famia di Yucca), ku ta krese spesialmente den klimanan seku òf semi-seku, ta riku na vitamina i kalsio. * Kome solamente e pétalonan; si nan ta un  poko marga lo bo tin ku herebé nan un tiki pa kita e marga. Flor di lamunchi (Citrus limon), flor di apelsina (Citrus sinensis) i flor di menta (famia di Mentha) ta masha dushi pa agregá na ko’i bebe, salada i postre. *

No tin duda ku flor ta un regalo pa nos sentidonan i un ingrediente importante pa nos disfrutá di bida. Nan realmente ta duna nos mas motibu pa gradisí nos amoroso Kreadó.

[Nota]

[Kuadro/Plachinan na página 26]

FLORNAN DUSHI PA KO’I BEBE

Pone un pétalo òf un flor chikí den kada hòki di bo baki di traha eis promé ku bo basha awa aden. Pon’é den frizer manera kustumber. Usa e blòkinan di eis aki den bo ko’i bebe faborito.

[Rekonosementu

Adaptá for di El Cultivo de Hierbas.

[Kuadro/Plachinan na página 26]

DUSHI DI FLOR

Bati un blanku di webu, i usa un kuashi pa hunta un kapa fini riba kada flor limpi i seku. Hasi sigur di kubri tur e pétalonan kompletamente. Ku un sefta, sprengu suku di puiru pokopoko riba e pétalonan. Sagudí kita e ekseso di suku, i pone e flornan seka pa vários ora.

[Rekonosementu

Adaptá for di Cook’s Thesaurus.

[Kuadro na página 26]

PREKOUSHONNAN IMPORTANTE

Tin flor ta venenoso. Hasi sigur kua ta esnan komibel. Si bo ta duda, no kome nan.

No kome ningun flor ku a ser tratá ku pestisida òf ku kualke otro kímiko. (Esaki hopi bes ta e kaso di flornan ku bo ta kumpra na floristeria, hardineria i algun lugá ku ta kultivá i bende mata.) Kome solamente flornan kultivá orgánikamente i ku ta plantá leu for di kantu di kaminda.

Personanan ku tin asma òf alergia pa sierto mata no mag kome flor.

Meskos ku fruta i bèrdura, mester laba flor bon, spesialmente si ta bai kome nan kurú.

[Plachi na página 25]

Rosa

[Plachi na página 25]

Flor di pampuna

[Plachi na página 25]

Viooltjes

[Plachi na página 25]

Daglelie

[Plachi na página 26]

Flor di lamunchi