For di Nos Lektornan

Bestianan di Kas Masha danki pa e seri “Kon Bo Ta Mira Bestianan di Kas?” (8 di mart 2004) Mi a gusta foral e manera ku e artíkulonan tabata skirbí, e ta reflehá amor i konsiderashon pa ku bestia. Lo mi duna mi veterinario un ehemplar di e revista. Artíkulonan manera esakinan ta motivá hende ku ta stima bestia pa hala mas serka Yehova.

O. M., Italia

Últimamente ta mi so ta biba, p’esei mi a kuminsá kria dos yu di pushi. Ounke nan ta duna mi hopi goso, mi ta komprondé tambe e importansia di no trata nan komo si fuera ta hende nan ta. E artíkulo aki a yuda mi komprondé e nesesidat di ta balansá relashoná ku bestianan di kas.

K. O., Hapon

E artíkulonan tabata ekselente i a yuda mi pa ta balansá den mi sintimentunan pa ku mi bestianan di kas. Lo mi kier a menshoná ku ora un persona kuminsá kria un pushi òf un kachó, e mester konsiderá e posibilidat pa laga sterilis’é. Un motibu pakiko ta mata asina hopi kachó i pushi tur aña ta pasobra no tin sufisiente hende ku ke tuma nan pa kria na kas.

C. B., Merka

“Spièrta!” ta reakshoná: Danki pa hala atenshon di nos lektornan riba e punto aki.

Boso artíkulo a bisa ku den Dios su mundu nobo, “tur bestia, tantu di kas komo salbahe, lo ta na pas ku otro.” Ta rasonabel pa pensa ku bestianan yagdó lo no eksistí mas?

D. B., Canada

“Spièrta!” ta reakshoná: For di tempu ku hende a kai den piká, hopi kos riba nos planeta a sali for di balansa. Ta tempu lo bisa eksaktamente kon e profesianan di Beibel ku ta menshoná ku lo tin armonia entre bestia den e Paradeis, lo kumpli. Pero nos tin pleno konfiansa ku nos Kreadó lo eliminá tur loke ta dañino for di nos planeta.—Salmo 37:10, 11.

Kanamentu Danki pa boso artíkulo “Dikon Ta Bon pa Kana?” (8 di mart 2004) Ta bon pa sa ku un hende por redusí e riesgo di haña malesa di kurason i hersenbloeding, dor di djis kana! E artíkulo a laga mi realisá ku pa demasiado tempu mi tabatin un bida di sinta hopi. Lo mi sigui e konseho pa kana regularmente.

L. B., Suesia

Sèks via Telefon Mi ke ekspresá mi gratitut pa e artíkulo “Hóbennan Sa Puntra . . . Kiko Tin di Malu den Sèks via Telefon?” (8 di mart 2004) Mi tabatin e eksperensia amargo di enfrentá e problema serio aki. E konsekuensianan a perhudiká mi spiritualmente, hibando na mas piká serio ku a pone mi pèrdè privilegionan den e kongregashon kristian. Ku Yehova sigui duna boso su sabiduria segun ku boso ta perkurá pa artíkulonan ku ta yuda nos keda spiritualmente fuerte.

J. H., Spaña