Hóbennan Sa Puntra . . .

Kon Mi Por Trata ku Frakaso?

“Mi a kaba di haña mi rapòrt, i mi a bolbe keda sin hal e mesun kuater vaknan. Mi a purba, pero atrobe, mi a bolbe faya.”—Lauren, 15 aña.

“Definitivamente, pa trata ku frakaso ta un lucha. Ta masha fásil pa bo kuminsá pensa negativo.”—Jessica, 19 aña.

FRAKASO. Kisas bo no ke ni pensa mes riba e palabra ei. Pero de bes en kuando nos tur ta haña nos konfrontá kuné. Sea ta un prufwèrk bo a traha malu, òf bo a hasi algu ku ta duna bo bèrgwensa, òf bo a desapuntá un persona ku bo stima, òf bo a kometé un eror serio ku tin di haber ku moralidat, frakaso por ta devastador.

Klaru ku tur hende ta faya. Beibel ta bisa: “Tur a peka i ta falta e gloria di Dios.” (Romanonan 3:23) Sin embargo, algun di nos tin difikultat pa rekobrá despues ku nos a kometé un fayo. Un hóben ku yama Jason a splika esei ku e palabranan aki: “Mi ta hopi krítiko ku mi mes. Si mi hasi un fout kisas hende lo hari i despues mayoria biaha nan lo lubidá. Pero ami sí no ta lubidá, mi ta keda pensa riba mi fayo.”

No nesesariamente ta malu pa un persona pensa riba e fayonan ku el a kometé, foral si esei ta motivá bo pa mehorá. Sin embargo, sigui kritiká bo mes konstantemente no ta bon i bo no ta logra nada ku esei. Proverbionan 12:25 ta bisa: “Ansha den kurason di hende ta hasié abatí.”

Konsiderá e ehèmpel di un hòmber den Beibel ku yama Epafrodito. Nan a mand’é Roma pa sirbi komo Pablo su asistente personal. Sin embargo, Epafrodito a bira malu i no por a kumpli ku su asignashon. De echo, finalmente ta Pablo tabata esun ku a kuid’é! Pablo a hasi areglo pa manda Epafrodito kas, i a informá e kongregashon lokal ku e hòmber fiel aki a bira deprimí tambe. Pa ki motibu? Pablo a splika: “Boso a tende ku e tabata malu.” (Filipensenan 2:25, 26) Ora Epafrodito a realisá ku otro hende a haña sa ku e tabata malu i ku e no por a kumpli ku su tareanan, probablemente el a sinti ku el a frakasá. Pues no ta straño ku el a bira deprimí!

Tin kualke manera pa evitá e sintimentunan doloroso aki di frakaso?

Konosé Bo Límitenan

Un manera pa redusí e chèns di frakasá ta di pone metanan realístiko i modesto pa bo mes. Beibel ta bisa: “Sabiduria ta serka e humildenan.” (Proverbionan 11:2; 16:18) Un persona modesto òf humilde ta konsiente di su limitashonnan. Ta bèrdat ku de bes en kuando ta bon pa tèst bo mes pa mehorá bo abilidatnan. Pero sea realístiko. Podisé simplemente bo no ta un eksperto den wiskunde ni bo no tin e agilidat i kordinashon di un atleta sobresaliente. Un  yònkuman ku yama Michael ta atmití: “Mi sa ku mi no ta bon den deporte. P’esei mi ta hasi deporte sí, pero mi no ta bai hasi kosnan ku mi sa ku mi no por logra.” E ta spliká: “Bo tin ku pone metanan ku ta na bo alkanse.”

Konsiderá e aktitut di Yvonne di 14 aña di edat, kende ta sufri di spina bifida (‘open rug’) i parálisis selebral. El a bisa: “Mi no por kana, baila, ni kore manera otro muchanan. I dor ku mi no por hasi manera otronan ta hasi, mi ta sinti mi frustrá. Mayoria hende no por ègt komprondé esei. Pero mi por trata ku mi frustrashon.” Su konseho? “No stòp. Djis sigui purba. Si bo faya òf hasi un kos robes , no entregá. Djis sigui hasi tur loke bo por.”

Na mesun tempu no tormentá bo mes dor di kompará bo mes inhustamente ku otro persona. Andrew di 15 aña a bisa: “Mi ta purba evitá di kompará mi mes ku otro persona pasobra nos niun no tin e mesun forsa ni abilidat.” Andrew su palabranan ta na armonia ku e palabranan di Beibel na Galationan 6:4: “Laga kada un saminá su mes obra, i e ora ei e lo tin motibu pa gaba solamente enkuanto su mes, i no enkuanto un otro.”

Ora Otro Hende Ta Spera Hopi di Bo

Sin embargo, tin bes bo mayornan, maestronan i otro hende ta imponé ekspektativanan haltu riba bo. I bo sa ku maske kuantu esfuerso bo hasi, lo bo no por komplasé nan. I pa hasi e asuntu mas pió, e personanan ei kisas ta ekspresá nan desilushon ku palabranan ku ta iritá òf podisé asta desanimá bo kompletamente. (Jòb 19:2) Probablemente bo ta realisá ku bo mayornan i otro hende no ta purba di hùrt bo deliberadamente. Manera Jessica a remarká, “hopi bes nan no ta ni realisá ku nan ta hasi bo daño. Tin biaha ta djis un mal komprondementu.”

Di otro banda, ta posibel ku nan ta mira algu ku abo no ta mira? Por ehèmpel, kisas realmente bo ta minimisá bo abilidatnan i balotá bo mes. En bes di ignorá nan sugerensianan, ta sabí pa “paga tinu na instrukshon.” (Proverbionan 8:33) Michael a splika: “E ta pa bo mes bon. Nan ke pa bo bira mas mihó, pa bo progresá. Tum’é komo un reto.”

Pero kiko bo tin ku hasi si bo ta sinti ku loke bo mayornan òf otro hende ta eksigí ta ègt irasonabel i ku lo bo frakasá sigur? E ora ei lo ta sabí pa papia ku nan—ku rèspèt, pero na un manera franko—i laga nan sa kon bo ta sinti. Huntu boso lo por pone algun meta ku ta mas realístiko.

“Frakasonan” Ora di Kumpli ku Responsabilidatnan Spiritual

Hóbennan entre Testigunan di Yehova tin e reto pa kumpli ku nan asignashonnan komo ministernan di Dios. (2 Timoteo 4:5) Si bo ta un kristian hóben, kisas algun biaha bo ta sinti ku bo no ta sufisiente kapas. Podisé bo ta sinti ku bo komentarionan n’e reunionnan no ta dje bon ei. Òf kisas bo tin problema pa splika e mensahe di Beibel na otro hende. Jessica por ehèmpel, a studia Beibel ku un otro mucha muhé tiner. Pa un tempu e studiante di Beibel a progresá bon. Pero diripiente e mucha muhé ei a disidí ku e no ke sirbi Dios. Jessica ta kòrda: “Mi a sinti komo si fuera mi a faya.”

Kon Jessica a trata ku e sintimentunan ei? Promé, e tabatin ku realisá ku ta su studiante  a rechasá Dios i no é. Loke tambe a yud’é ta meditashon riba e ehèmpel bíbliko di Pedro, un hòmber temeroso di Dios ku tabatin vários debilidat. Jessica a splika: “Beibel ta mustra ku Pedro a vense su debilidatnan, i Yehova a us’é den hopi manera pa promové interesnan di Reino.” (Lukas 22:31-34, 60-62) Klaru ku si bo tin ku mehorá bo abilidatnan komo maestro, ta bon pa bo hasi mas esfuerso pa logra esei. (1 Timoteo 4:13) Sea dispuesto pa risibí yudansa serka rumannan maduro den e kongregashon ku por siña bo i entrená bo.

Pero kisas ta e sirbishi di kas pa kas ta loke bo ta haña mas difísil. Jason ta atmití: “Kada bes ku un doño di kas keda sin skucha ta komo si fuera mi a frakasá.” Kon e ta trata ku e sintimentu aki? “Mi tin ku kòrda ku no ta ami realmente a faya.” Sí, el a logra hasi loke Dios a mand’é hasi: prediká! I ounke nos tin ku atmití ku no ta fásil ora hende rechasá bo, no ta tur hende lo rechasá e mensahe di Beibel. “Ora mi topa un persona ku ta skucha,” segun Jason, “mi sa e ora ei ku tur mi esfuerso ta bale la pena.”

Erornan Grave

Kiko si bo a kometé un eror grave, òf asta un piká serio? Ana di 19 aña a kometé un fayo asina. * E ta atmití: “Mi a faya ku e kongregashon, mi famia i spesialmente ku Yehova Dios.” Pa bo rekobrá, bo tin ku repentí i buska yudansa spiritual serka e ansianonan den e kongregashon. (Santiago 5:14-16) Ana ta kòrda e palabranan di konsuelo di un ansiano: “El a bisa ku apesar di tur e kosnan robes ku Rei David a hasi, tòg Yehova tabata dispuesto pa pordon’é, i David a rekobrá. Esei a yuda mi.” (2 Samuel 12:9, 13; Salmo 32:5) Bo tambe tin ku hasi tur loke bo por pa edifiká bo mes spiritualmente. Ana a bisa: “Mi ta lesa e buki di Salmonan bes tras bes, i e tekstonan ku ta animá mi, mi ta skirbi den un skref.” Ku tempu un persona por rekobrá di un fayo grave. Proverbionan 24:16 ta bisa: “Un hende hustu ta kai shete bes, i ta lanta atrobe.”

Rekobrá di Bo Fayo

Ta klaru ku asta frakasonan relativamente chikí por hasi doló. Kiko por yuda bo rekobrá di nan? Promé ku tur kos, enfrentá bo fayonan realístikamente. Michael ta rekomendá: “En bes di djis pensa ku bo ta un frakaso kompletu, wak kiko ta bo fayo i kiko ta e kousa. Asina bo por mehorá e próksimo bes.”

Tambe bo por evitá di tuma bo mes muchu na serio. Tin “un tempu pa hari”—i podisé esaki por nifiká hari bo mes tambe! (Eklesiastés 3:4) Si bo ta sinti bo desanimá, hasi algu ku bo por hasi bon, manera un hòbi òf un deporte. Ora bo ta “riku den bon obra”—manera kompartí bo fe ku otro hende—esaki por yuda bo pensa mas positivo tokante bo mes.—1 Timoteo 6:18.

Por último, kòrda ku “Yehova ta miserikòrdioso i kompasivo . . . Lo e no sigui señalá falta pa semper.” (Salmo 103:8, 9, NW) Jessica ta bisa: “Mi ta sinti ku mas mi hala serka Yehova Dios, mas sigur mi ta sinti mi di su apoyo i yudansa den tur loke mi ta pasa aden.” Sí, ta un konsuelo pa sa ku apesar di bo fayonan bo tin balor den bista di bo Tata selestial.

[Nota]

[Plachi na página 14]

Si bo ta sinti bo aplastá dor di e eksigensianan ku hende ta pone riba bo, buska un manera respetuoso pa ekspresá loke bo ta sinti

[Plachi na página 15]

Trahando riba kosnan ku bo por hasi bon por yuda kita sintimentunan di ku bo a frakasá