Nos Tur Tin Mester di Amigu

“Un amiga ta un persona ku bo por papia abiertamente kuné tokante tur kos, un persona ku bo por bèl ki ora ku ta.”—Yaël, Fransia

“Un amiga ta komprondé ora bo ta di hùrt i ta sinti e mesun doló ku bo ta sinti.”—Gaëlle, Fransia

“TIN un amigu ku ta mas pegá ku un ruman.” (Proverbionan 18:24) For di un 3.000 aña pasá ku e palabranan ei a keda skirbí den Beibel, te ku awe, naturalesa humano no a kambia. Ketu bai amistat ta mesun importante pa hende su estado mental ku kuminda i awa ta pa hende su kurpa. Sin embargo, hopi hende tin difikultat pa satisfasé e nesesidat básiko aki di amistat. Soledat ta un kos komun. “Nos no tin ku buska leu pa mira algun di e kousanan,” segun Carin Rubenstein i Phillip Shaver den nan buki In Search of Intimacy (En Buska di Intimidat). Nan ta menshoná faktornan manera “mobilidat ekstenso”—e echo ku hende ta kambia di kas ku frekuensia—“statnan impersonal patapata di kriminalidat,” i e echo ku “kontakto direkto ku otro hende den komunidat a ser remplasá pa wakmentu di televishon i vidio na kas.”

Tambe bida moderno ta kaba ku nos tempu i energia. Letty Pogrebin a skirbi den su buki Among Friends (Entre Amigu): “Den un siman, un habitante di un stat djawe ta bin den kontakto ku mas hende ku un habitante di un pueblo di siglo 17 a topa den un aña òf asta den henter su bida.” Siendo ku kisas nos konosé sentenáres di hende, lo por ta difísil pa presta sufisiente atenshon na personanan individual pa nos por kultivá i mantené amistatnan íntimo.

Asta na lugánan ku no muchu tempu pasá tabatin un ritmo di bida mas trankil, kondishonnan sosial ta kambiando rápidamente. Ulla, kende ta biba na Ost Europa, ta bisa: “Nos tabatin kustumber di ta hopi, hopi será ku nos amigunan. Pero awor hopi di nan ta kompletamente apsorbá den nan trabou òf den aktividatnan personal. Tur ora bai tur hende ta drùk, i nos ta sinti kon pokopoko nos amistatnan bieu ta habri for di otro.” Den e ambiente purá-purá di nos tempu moderno, kisas nos no ta duna masha importansia na mantené nos amistatnan.

Pero nos ta keda ku e intenso nesesidat di tin amigu. Foral hóbennan ta sinti e nesesidat aki. Manera Yaël, sitá ariba, ta splika, “ora bo ta yòn, bo tin ku sinti ku bo ta ser aseptá i ku bo ta pertenesé na un grupo, sinti ku bo ta será ku un hende.” Sea nos ta hóben òf bieu, nos tur tin mester di amistatnan felis i íntimo. I apesar di e difikultatnan, tin hopi kos ku nos por hasi pa haña berdadero amigu i keda ku nan. E siguiente artíkulo lo trata esaki.