Un Paradeis Rekobrá for di Desierto

Di un eskritor di Spièrta! na Lituania

DEN e último parti di siglo 18, e habitantenan di un pueblo di piskadó a sinti ku nan pueblo tabata destiná na destrukshon. Pa añanan largu un dùin gigantesko di santu tabata move pokopoko den direkshon di nan pueblo. En bano nan a purba desviá e dùin dor di traha un barera triangular di palu. Pa aña 1797, e dùin a tapa e pueblo kompletu.

Esaki ta solamente ún episodio den un drama ku a dura 80 aña, durante kua dùinnan a tapa mas ku un dozein di pueblo i kombertí Curonian Spit, un pida tereno di  100 kilometer na kosta di Laman Báltiko di loke awe ta Rusia i Lituania, den un desierto. E kousanan pa e destrukshon ei i e restorashon di e region—ku awor ta un atrakshon turístiko prinsipal—ta forma un historia fasinante.

Víktima di Mal Maneho i Invashon

Pa hopi siglo, e santu riba e tereno di Curonian Spit tabata kubrí ku vegetashon bèrdè i abundante. E selva tabata yen di bestia ku e pueblo lokal por a yag riba dje. Na prinsipio di siglo 18, e área a bira importante komo parti di un ruta postal entre Wèst Europa i e Imperio di Rusia. Ora e poblashon a oumentá durante un periodo di pas, e tounan di bestia a kome te kaba ku tur e yerba bèrdè delikado ku a kubri e tereno, i hende a kap demasiado palu for di e selvanan. E habitantenan no a realisá kon delikado e kapa di vegetashon ku nan tabata dependé di dje tabata.

E selva a risibí su gòlpi mortal ora un ehérsito ruso a invadí e lugá na 1757 i a kap e palunan pa traha sentenáres di boto plat pa nan por sitia Königsberg (Kaliningrad), un stat importante na Prusia. Durante e siguiente dékadanan, bientu a forma dùinnan di santu i a kousa e desaster ku nos a menshoná anteriormente.

Por a restorá un paisahe ku a ser destruí dje forma ei? Entre e personanan ku a pensa ku sí tabatin Georg David Kuwert, un trahadó di servisio di pòst desididu, i su tata, Gottlieb. Na 1825, nan a bolbe kuminsá planta palu riba e tereno di e ‘spit.’ E tabata un lucha largu i agotador. Pa mas ku un siglo, sentenáres di hende a traha riba e proyekto aki. Promé, nan mester a stabilisá e tereno ku un sorto di yerba ku raisnan ku ta bai profundo i ku ta bona den santu. Nan a planta diferente sorto di palu di pino resistente i berkeboom riba sentenáres di hèktar. Finalmente nan a gana e bataya. Awor mas o ménos 70 porshento di e tera seku tin vegetashon  atrobe. Kiko lo bo haña si bo bishitá e spit awor?

Paradeis pa Turista

Awendia Curonian Spit ta haña te ku 8.000 turista pa dia. Esei no ta nada straño pasobra e spit tin un variashon enorme di atrakshon. Sea ku bo ta subi seru, kore baiskel òf ta kore keiru den outo, e esenario ta kambia masha lihé. Den e selvanan tin eland biná, zoro i porko salbahe. Mas o ménos shen sorto di para ta biba eiden, i tur aña kasi un mion para ta pasa riba e spit durante nan biahe di migrashon. Tin 900 variedat di mata, i ainda tin hopi dùin ounke awor nan ta okupá solamente 12 porshento di e tereno.

Algun di e dùinnan di santu ta yega un altura di 50 meter. Ora bo haña bo na un lugá kaminda rònt di bo no tin nada otro sino santu i shelu, esei ta un eksperensia inolvidabel. Segun ku bo ta subi, bo ta mira ku algun dùin tin e forma tradishonal den kua bientu a forma nan. Ora bo yega n’e tòp di e dùin formá manera un punta skèrpi, kaminda bientu ta supla e santu den banda pa hala e dùin un paso mas leu riba su biahe, bo ta haña bo ku un bista masha impreshonante. Bo ta mira kon e strepi smal di tereno ku bo ta pará riba dje ta sigui bai na un distansia leu, i ta dekorá ku pueblo, selva, plèkinan bashí rondoná ku palu i faro. Na un banda tin e olanan drentando for di Laman Báltiko; na e otro banda, tin e awanan mas kalmu di Curonian Lagoon.

E bishitantenan ta haña e aire friu di laman refreskante. Hopi ta disfrutá dor di sùrf riba laman òf nabegá den yate; otronan ta dal un kaminata trankil atraves di un di e pueblonan n’e estilo di antaño. E kasnan di fèrf ku koló bibu i nan dak di pal’i maishi òf di panchi ta konserbá e atmósfera di tempunan mas trankil di hopi añanan pasá. E holó fuerte di piská ku ta ser prosesá pa konserbá nan i e nètnan habrí abou na suela pa seka, ta rekordá esnan ku ta di fakansi ku piskamentu semper tabata e fishi prinsipal di e habitantenan di e spit. Windwijzer ta masha komun ya ku e piskadónan ta masha interesá den e direkshon di bientu. E windwijzernan a bira algu artístiko akinan, i hende a hasi estudio interesante di nan. Kada boto di bela tabatin unu riba su master, i el a sirbi pa identifiká e pueblo for di kua e boto a bini. Loke ta fasinante tambe ta e pidanan di amber (barnsteen) ku bo por haña tin bes kantu di laman. Foral riba dianan di áwaseru turistanan ta bishitá museonan ku ta ekshibí hoyanan di amber. Den algun di nan bo por mira restunan di mata i insekto.

Pues no ta nada straño ku e representante di Lituania pa e Organisashon Edukashonal, Sientífiko i Kultural di Nashonnan Uní a deskribí Curonian Spit komo un paradeis. E ta un paradeis ku a ser rekobrá for di tera ku a ser ruiná dor di mal maneho i guera. Ta klaru ku rònt mundu ainda tin hopi lugá ku hende ta sigui ruiná. Pero Beibel ta duna nos e garantia ku pronto bou di e Reino di Dios henter e planeta lo ser kombertí den un paradeis bunita kaminda hende rekto lo biba pa semper.—Isaias 65:17, 21-25; 2 Pedro 3:13, 14.

[Mapanan na página 16]

(Pa e teksto den su formato kompleto, wak e publikashon)

LAMAN BÁLTIKO

LITUANIA

CURONIAN SPIT

Curonian Lagoon

RUSIA

Kaliningrad

[Plachinan na página 16, 17]

Tin hopi para, mata i dùin na Curonian Spit

[Rekonosementu]

Tres potrèt chikitu abou: Gedimino Graz̆ulevic̆iaus nuotrauka

Para i yerba: Gedimino Graz̆ulevic̆iaus nuotrauka; background: UAB „Laiko spalvos“

POTRÈT: A. VARANKA

[Plachi na página 18]

Porkonan Salbahe

‘Knobbelzwaan’

Amber

[Rekonosementu]

Tres potrètnan ariba: Gedimino Graz̆ulevic̆iaus nuotrauka

[Plachi na página 18]

Curonian Spit ta atraé míles di turista diariamente