E Tera di Moneda Grandi

TOKA NA

E Tera di Moneda Grandi

Di un eskritor di Spièrta! na Guam

LEU aya den e inmenso Oséano Pasífiko, bo ta haña e islanan di Yap. Bunitesa tropikal i un klima konfortabel ta hasi e grupo di isla aki un refugio agradabel pa biaheronan ku ta buska privasidat. Pero hopi bes e turistanan ta keda masha straño di mira kon e hendenan ta laga nan plaka di spar riba kaya.

Na tur parti di e islanan aki, bo por mira piedra plat den forma di disko dilanti edifisionan i kantu di kaminda. E diskonan ei, ku yama rai den e idioma lokal, ta forma e moneda lokal di Yap. Ounke algun hende ta warda nan monedanan di piedra na kas, mayoria ta usa “banko” di pueblo. N’e lugánan aki no tin bewaker ta para vigilá ni kahero pa yuda kliente. Kisas bo no ta mira un edifisio mes. En bes di warda plaka den un kaha fuerte, e “bankonan” aki tin nan biennan gewon pafó. Ei na aire liber tin mas disko di piedra, kada un ku un buraku meimei, ta para lèn kontra palu di koko i muraya. Algun di e piedranan aki tin un diameter di kuater meter i ta pisa mas ku sinku tòn.

Kaminda abo ta biba, kisas bo ta kana ku sèn den bo saku, pero aki e monedanan ta asina grandi ku nan no ta pas ni den un outo. For di 1931 nan no a traha ningun di e monedanan aki mas. Pero ainda nan ta moneda legal riba e islanan. Di unda e monedanan straño aki a bini?

Difísil pa Optené

Segun leyenda, hopi tempu pasá, un grupo di biahero di Yap a yega n’e isla di Palau i a haña algun di su bunita piedranan. Nan a hiba nan bèk na Yap, i einan e pueblo a disidí di usa nan komo moneda. Nan a kuminsá kòrta e piedranan den forma di disko, paresido na luna yen, pero ku un buraku meimei.

Pa loke ta e material ku e hendenan di Yap a usa, nan tabata masha selektivo. Nan a preferá mineralnan ku awe nos konosé komo aragonit i kalsit. Aragonit, ku ta wòrdu hañá den tera, ta un supstansia ku ta wòrdu hañá tambe den pèrla, i kalsit ta e komponente prinsipal den marmer. Tur dos ta keda hopi bunita ora kòrta nan ábilmente, pero ningun di nan dos ta ser hañá na Yap. Pues e hendenan di Yap a sigui bai buska piedra na Palau. Palau ta keda rònt di 400 kilometer zùitwèst di Yap, un biahe di sinku dia riba un laman peligroso den kanoa ku vlòt pegá na dje.

Na Palau, despues ku e hendenan di Yap a haña pèrmit di e hefe di e isla, nan a kuminsá e trabou di koba den baranka masivo. Ku uso di hèrmèntnan primitivo, nan tabata kòrta pidanan grandi di piedra for di kuebanan bou di tera i duna nan forma di disko. Por a tuma lunanan i tin biaha añanan di trabou ku martin ku beitel pa traha djis un di e monedanan ei!

Nan tabata traha buraku den e piedranan pa por a pasa palu largu i duru dor di nan riba kua nan por a karga e piedranan aki hiba kant’i playa. Ei nan tabata pone e monedanan nobo riba kanoa òf vlòt di bambu. Pa transportá un pida grandi, e trahadónan tabata pon’é para den awa i despues traha un vlòt grandi rònt di dje. Ku bientu den e belanan i brasa fuerte tras di e remanan, nan tabata hiba e vlòt ku e monedanan nobo pa Yap.

Tur e trabou aki tabata sosodé na man, i e proseso tabata peligroso. Sí, hopi tabata esnan ku a sufri leshon òf muri ora nan tabata kòrta i move pidanan masivo di baranka riba tera. I e biahe bèk pa Yap tambe tabatin su peligernan kuné. Rònt di Yap i Palau tin moneda di piedra visibel den fondo di laman, loke ta indiká ku no ta tur e monedanan ni tur hende ku a hala e monedanan a yega Yap sano i salvo. Sin embargo, kada moneda bou di awa ta pertenesé na un hende di Yap. Nan tin mes balor ku e piedranan den forma di disko riba tera.

Kuantu Nan Ta Bal?

Despues ku un hende kumpra un kos i paga ku rai, por lo general e doño nobo ta laga e piedra kaminda e ta. Hopi di nan ta na nan lugá aktual pa hopi dékada i ta bastante leu for di kas di nan doñonan aktual. Ladronisia no ta un problema.

Si un ladron haña gana di kohe un moneda di piedra, lo e mester tin hopi forsa pa his’é bai kuné. Ademas, e mester tin sufisiente kurashi, pasobra e bisiñanan sa bon ken ta doño di kada wil di piedra i nan tin masha rèspèt pa derecho di propiedat.

Kon bo ta determiná e balor di un moneda di piedra? Na promé lugá, bo ta tuma nota di su tamaño, su bunitesa natural i e kalidat di e eskultura. Despues bo ta konsiderá su historia. Kon bieu e ta? Tabata difísil pa kob’é, sak’é i kòrt’é? Bida di e hendenan ku a transport’é pa Yap tabata na peliger? Tin ku asta a pèrdè nan bida? Finalmente, kiko ta e posishon sosial di e personanan enbolbí den e transakshon? Moneda di piedra den man di un hefe tin mas balor ku esun ku un hende gewon tin.

Na 1960, ora un banko stranhero a kumpra un moneda di piedra ku tabata un meter i mei hanchu, e historia di e piedra ei a bira konosí pa e mundu di pafó. Aparentemente e tabata den sirkulashon for di 1880. Un tempu el a sirbi pa paga trahadó ku a konstruí un kas. Na un otro okashon e habitantenan di un pueblo a regal’é na hende di un otro pueblo bisiña pa nan presentashon di un baile spesial. Despues un doño di kas a us’é pa paga un suministro di plachi di zink pa dak. Tur e transakshonnan aki a tuma lugá sin ku e piedra a move for di su sitio original, i nan no a tene ningun registro tampoko. Tur hende riba Yap sa presis ken ta doño di e piedranan i e historia tras di nan.

Mas Grandi No Ta Semper Mihó

Ora a introdusí rai sentenáres di aña pasá, e monedanan di piedra tabata asina skars i balioso ku ta solamente e hefenan por a poseé nan. Despues, na kabamentu di siglo 19, hèrmèntnan di heru i barku di karga a hasi posibel pa kòrta i transportá hopi mas di e monedanan aki, inkluso e grandinan. Ounke e monedanan mas nobo ta mas grandi ku esnan mas bieu, nan tin ménos balor ya ku nan no a ser trahá segun e sistema tradishonal ku a eksigí muchu mas esfuerso.

Na 1929 un konteo ofisial a mustra ku tabatin 13.281 piedra—mas ku e poblashon di e islanan! Segunda Guera Mundial a trese un kambio den esei. Trupanan a konfiská hopi di e monedanan di piedra i a kibra algun di nan pa traha pista di aterisahe i lugánan fortifiká. Ta mitar di e diskonan di piedra so a sobra. Hende ku ta gusta suvenir i kolekshonistanan privá tambe a bai ku hopi di nan. Awe, gobièrnu ta konsiderá e monedanan di piedra aki komo un tesoro kultural i ta duna nan protekshon legal.

Na Yap, plaka no ta krese na palu, pero ainda e hendenan ta laga nan rikesa riba kaya pa tur hende mira!

[Mapanan na página 20]

(Pa e teksto den su formato kompleto, wak e publikashon)

Hapon

OSÉANO PASÍFIKO

Filipina

Saipan

Guam

Yap

Palau

[Rekonosementu]

[Plachi na página 21]

“Banko” di moneda di piedra

[Plachi na página 22]

Algun di e monedanan aki na Yap por pisa mas ku sinku tòn

SPIÈRTA!