For di Nos Lektornan

Balòn Mi a disfrutá di e artíkulo “E Evento di Balòn Mas Grandi na Mundu!” (8 di mart 2004) Mi mama di ku e tin gana di zueif un dia den un balòn, i ami tambe tin gana. Ora mi a lesa e artíkulo, mi no por a kere ku tin asina tantu balòn! Mi a gusta e potrètnan. Mi tin ocho aña.

J. L., Merka

Mata Remarkabel Nunka mi a lesa algu asina interesante i ekstraordinario manera e artíkulo “Un Sobrebibiente Remarkabel.” (8 di mart 2004) Welwitschia ta realmente un mata remarkabel. Ta kon e ta logra biba asina largu den e kondishonnan difísil ei? E tipo di artíkulonan aki ta revelá mas plenamente e sabiduria di nos ingenioso Kreadó, Yehova.

A. C., Rusia

Mi a lanta na Angola i vários bes mi tabatin e oportunidat di mira welwitschia. Kada bes e mata straño aki tabata fasiná mi. Pero mi tabatin pregunta tokante e hopi kreensianan ku hende en general tabatin relashoná kuné. Awor, 27 aña despues, mi a risibí e informashon ku mi tabata deseá.

A. O., Suisa

Mi tin mas ku 15 aña ta lesa Spièrta! Dor ku mi no por biaha, e tipo di artíkulonan aki ta yuda mi studia Yehova su kreashon en detaye. Si no tabata pa Spièrta!, nunka lo mi tabata sa ku welwitschia por a biba asina tantu tempu.

L. Z., Fransia

Grupo di Sanger Danki pa e artíkulo “E Punto di Bista Bíbliko: Bo Personalidat Ta Ser Determiná pa Bo Grupo di Sanger?” (8 di febrüari 2004) E asuntu aki tabatin mi un poko molestiá. Na skol nan a bisa mi ku bo personalidat no por ser determiná dor di bo grupo di sanger. Tambe mi a lesa den algun buki ku e práktika di usa grupo di sanger pa determiná personalidat ta konektá ku spiritismo. Pero mi konosé hende ku hopi bes ta papia di grupo di sanger i ta husga otro a base di esei. I nèt ora mi a kuminsá puntra mi mes kiko ta bèrdat òf mentira, e artíkulo aki a sali i mi por a komprondé e punto di bista bíbliko bon kla.

R. K., Hapon

Mi a haña e artíkulo hopi interesante. Na skol nan ta bisa ku un persona ku e tipo di sanger A ta presis i sensitivo i un persona ku sanger B ta suave. Hopi bes mi a puntra mi mes: ‘Ta asina mi ta?’ Pero mi a haña un alivio ora mi a siña ku kada persona tin su propio personalidat. Tambe mi por a rekonosé ku nos por kambia nos personalidat dor di someté nos mes n’e influensia di Dios su spiritu santu.

N. I., Hapon

Suku Hopi hende a bisa mi ku e artíkulo “E Sukunan di Bida” (8 di aprel 2004) indirektamente a promové un produkto popular di salú ku ta supose di kura malesa, inkluso kanser. Mi meta no ta pa kritiká boso artíkulo, pero mi preokupashon ta e hendenan ku ta us’é pa gana plaka òf pa promové nan ideanan.

P. K., Oustralia

“Spièrta!” ta reakshoná: E artíkulo “E Sukunan di Bida” ta djis informá di e deskubrimentu ku biólogonan a hasi relashoná ku e papel importante ku suku ta hunga den hende su salú. Niun ora so no tabata e intenshon p’e sirbi komo un apoyo pa un produkto en partikular. Ora “Spièrta!” ta duna informashon riba asuntunan di salú, e no ta rekomendá su lektornan ningun tipo di tratamentu en partikular. Sin importá ki tratamentu un kristian skohe, ta keda na dje p’e hasi sigur ku e ta reflehá sano huisio i no bai kontra prinsipionan bíbliko.