Hóbennan Sa Puntra . . .

Kiko Si E Bisa Nò?

PROMÉ bo tabata konsider’é un amigu. Pero despues bo a kuminsá mir’é di otro manera. Podisé tabata su bon manera òf e manera ku e tabata smail ku bo ora e ta papia, a pone bo sinti bo atraí na dje. Sea kual sea e motibu, tempu a pasa i e no a mustra ningun interes romántiko den bo. P’esei bo a disidí di puntr’é si e ta interesá pa ta mas ku djis bo amigu. Pero pa bo gran desilushon, di un manera bondadoso pero tòg firme, el a bisa nò. *

Ta natural pa bo sinti bo di hùrt. Pero dominá bo sintimentunan; purba mira kosnan for di e perspektiva korekto. Sí, un yònkuman a bisa ku e no ta interesá den un relashon romántiko ku bo. Kòrda ku su desishon no ta kita nada di bo dignidat komo persona, ni e no ta nifiká ku otro hende no ta stima bo i respetá bo mas. De echo, e desishon di e yònkuman aki podisé tin mas di haber ku su metanan i prioridatnan personal ku nan tin di haber ku bo.

Si bo ta un kristian, bo por kòrda tambe ku ‘Dios no ta inhustu pa lubidá bo trabou i e amor ku bo a mustra pa su nòmber.’ (Hebreonan 6:10) Sonja * a ekspres’é asina aki: “Bo ta keda ku bo balor. Komo un persona soltero bo ta balioso pa Yehova.” Si pa e Haltísimo i otro hende bo ta di hopi balor, pakiko bo tin ku pèrdè rèspèt pa bo mes?

Podisé tòg bo ta sinti ku un kaminda bo a faya òf bo tin miedu ku kisas lo bo no ta un bon hende pa kasa kuné. Pero no ta pasobra bo no tabata e persona “korekto” pa e yònkuman aki, bo no por ta “nèt esun korekto” pa un otro persona. (Huesnan 14:3) Pues, en bes di pensa ku bo a frakasá den bo intento pa haña un bon kasá, bo tin ku realisá ku bo esfuersonan a logra un bon resultado: Bo a haña sa ku e yònkuman aki no ta pa bo. Dikon nos ta bisa esaki?

 E Tabata Esun Korekto pa Bo?

Beibel ta manda esposonan pa “stima nan esposa manera nan mes kurpa.” (Efesionan 5:28) Tambe e ta manda esposonan ‘duna onor’ na nan esposa. (1 Pedro 3:7) Pues den e kaso aki, por ta masha bon ku e yònkuman aki ta apresiá bo komo amiga. Pero dor di bisa nò, básikamente el a mustra ku aktualmente e no ta prepará pa stima bo ni onra bo komo esposa. E tin derechi di tuma e desishon ei. Pensa riba esaki: Si ta asina e ta sinti, lo e por ta realmente un bon esposo pa bo? Imaginá bo kon infelis lo bo tabata si bo a kasa ku un persona ku no ta stima bo ni apresiá bo manera e Skritura ta manda!

Loke tambe lo por yuda bo, unabes ku bo speransa pa un namorashon lo no bira realidat, ta di mira e yònkuman aki su akshonnan for di un otro ángulo. Tin bes enamorashon pasahero ta siega hende i nan no ta mira defisiensianan personal i spiritual ku pa otro hende ta bisto. Por ehèmpel, e no tabata konsiente ku bo sintimentunan p’e tabata birando mas profundo, òf e tabata stimulá bo sintimentunan konsientemente dor di asosiá konstant ku bo? Si ta e último ei el a hasi, esei lo no ta un indikashon ku e no ta kla pa ta un esposo kristian ku konsiderashon i ku sintimentu? Si ta asina, ta bon ku bo a haña sa ounke esei por ta doloroso.

Marcia a kuminsá sinti algu pa un yònkuman ora ku esaki a kuminsá dun’é hopi atenshon. Ora el a puntra e yònkuman kiko tabata su intenshon, esaki a bis’é ku e no tabata interesá den un relashon kuné. Kiko a yuda Marcia trata ku su desilushon? El a bisa: “E echo ku mi a bai tras di mi mente i no mi kurason a yuda mi trata ku mi sintimentunan.” Kòrdando riba e rekisitonan ku Beibel ta duna esposonan a yud’é realisá ku simplemente e yònkuman ei no tabata e esposo apropiá. Esaki a yud’é pasa over di su tristesa.

Andrea tabatin un eksperensia similar ku un yònkuman. Despues el a realisá ku e manera ku e yònkuman a trata kuné a mustra ku esaki no tabata madurá ainda. Ku tempu el a bin komprondé ku e yònkuman no tabata kla pa kasa, i e ta masha gradisidu ku Yehova a habri su wowo p’e mira esei. El a bisa: “Mi ta kere ku Yehova por protehá bo for di sirkunstansianan ku por hùrt bo pero bo tin ku konfi’é sí.” Klaru ku den hopi kaso un yònkuman ta komportá su mes bon i e ta bisa nò pa un motibu válido. Sea kual sea e kaso, kon bo por trata ku e sintimentunan ku ta bin komo resultado di esei?

Loke Bo Por Hasi Tokante Bo Sintimentunan

Kisas bo kurason tin mester di tempu pa aseptá e echo ku el a bisa nò. Bo kariño p’e a krese ku tempu, i ta tuma tempu tambe p’e mengua. Masha poko bes bo por eliminá sintimentunan romántiko manera bo ta paga un lus eléktriko. Tin dia ku e sintimentunan ei por ta hopi fuerte! Tene pasenshi ku bo mes. Segun ku tempu ta pasa e sintimentunan ei tambe ta mengua. Pero si bo ke pa e sintimentunan ei disparsé mas lihé, evitá di alimentá nan.

Por ehèmpel, evitá di kritiká bo mes dor di sinta repasá kada palabra i gesto ku bo a ekspresá ora bo a deklará bo sintimentunan na e yònkuman. Si bo no dominá e pensamentunan ei, lo bo kuminsá kere ku e no tabata ke men ègt nò, òf ku si bo purba aserk’é di un otro manera kisas e por aseptá. Aseptá e echo ku bo no por kambia su sintimentunan. Ku tur probabilidat, maske kon bo a aserk’é, su kontesta lo tabata meskos.

Soñamentu lantá por ta un otro trampa. Bo ta krea un kuadro mental den kua boso dos ta biba felis pa semper. E fantasianan aki por parse di ta konsolá bo, pero nan no ta real. Ora nan terminá, bo ta bolbe sinti bo bashí i ku un doló inmenso. E siklo aki di plaser i despues un doló insoportabel lo por sigui pa hopi tempu si bo no hasi esfuerso pa stòp e.

Hasi esfuerso pa eliminá e soñonan ei for di bo mente. Ora nan bin, lanta i kana un ratu. Hasi trabou físiko, algu ku ta pone bo pensa riba otro kos. Konsentrá riba kosnan ku ta edifiká, no kosnan ku ta deprimí bo. (Filipensenan 4:8) Na prinsipio esaki lo por ta difísil, pero ku tempu, lo bo gana e bataya i haña pas i trankilidat.

Apoyo di amigunan será tambe por yuda. (Proverbionan 17:17) Sin embargo, Sonja ta  duna e atvertensia aki: “No ta bon pa tur bo amigunan ta personanan soltero, di e mesun edat, i deseoso pa kasa. Bo tin mester di amigunan mas grandi tambe, ku por yuda bo mira kosnan den e perspektiva korekto.” I kòrda, tin un persona ku por duna bo asta mas yudansa pa bo vense bo doló.

Yehova—Un Amigu i Apoyo

Ora un hòmber fiel den tempu di antigwedat a hañ’é ku desepshon, el a resa pidi Yehova yudansa. Kiko tabata e resultado? El a skirbi: “Ki ora ku mi ta angustiá i preokupá, bo ta konsolá mi i hasi mi kontentu.” (Salmo 94:19, Today’s English Version) Yehova lo konsolá i sostené abo tambe si bo ehersé fe den dje i hasi orashon na dje. Esei ta loke Andrea a hasi. El a bisa: “Orashon ta masha importante pa yuda bo pasa over di e doló i sigui padilanti.” Sonja tambe a bisa meskos di orashon: “E ta yuda bo haña un balor propio ku no ta dependé di e echo ku si hende ta gusta bo òf laga.”

Ounke niun hende no por komprondé bo sintimentunan plenamente, Yehova sí ta komprondé bo. El a krea hende ku e deseo pa stima i ser stimá den matrimonio. E sa di e poder di atrakshon romántiko, i e sa kon pa kontrol’é. E por yuda bo vense doló fuerte di kurason, pasobra 1 Juan 3:20 ta bisa: “Dios ta mas grandi ku nos kurason i sa tur kos.”

Keda Balansá

Ounke matrimonio por ta un fuente di gran felisidat, e no ta e úniko fuente. Tur hende ku ta sirbi Yehova por ta felis, i no hende kasá so. Den sierto sentido, hende soltero tin asta algun bentaha riba hende kasá. Nan no ta sufri di e “tribulashon den e bida aki,” ku 1 Korintionan 7:28 ta menshoná. E “tribulashon” aki ta referí na e strès i angustianan ku tur pareha kasá ta haña nan kuné. Tambe personanan soltero tin mas libertat i por usa nan bida mas fásil den e sirbishi di Yehova. P’esei Beibel ta siña: “Esun ku duna su bírgen pa kasa ta hasi bon, ma esun ku no dun’é pa kasa ta hasi mihó ainda.” (1 Korintionan 7:38) Asta si bo tin deseo fuerte pa kasa, meditashon riba e siñansanan bíbliko aki por yuda bo keda balansá i saka lo máksimo for di bo sirkunstansianan aktual.

Algun amigu ku bon intenshon lo por bisa bo: “No wòri, lo yega e dia ku lo bo haña un persona magnífiko.” I ta bèrdat ku ounke un persona a rechasá bo, esei no ta nifiká ku lo bo keda bo so pa semper. Apesar di tur kos, un mucha muhé kristian ku yama Candace ta rasoná di e manera aki: “Mi tin konfiansa den Yehova. Mi no ta ferwagt ku e mester duna mi un esposo pa mi ta felis. Pero mi sa ku lo e duna mi loke mi tin mester pa yena e bashí ei.” E manera positivo di pensa aki a yud’é pasa over di e desilushon romántiko ku el a hañ’é kuné.

Hopi bes e intentonan pa kuminsá un relashon amoroso den e mundu aki ta frakasá, pero esei ta e kaso ku hopi matrimonio tambe. Si bo pone bo konfiansa den Yehova i obedesé su konseho, e por yuda bo remplasá desilushon ku goso. Bo por tin e mesun eksperensia ku Rei David, kende a skirbi: “Señor, tur mi deseo ta bo dilanti; i mi suspiro no ta skondí pa bo. Pasobra mi ta spera riba bo, o SEÑOR; abo lo kontestá, o Señor mi Dios.”—Salmo 38:9, 15.

[Nota]

[Plachinan na página 14]

Probechá di e yudansa ku Dios ta perkurá