“Mare Nan Por Tabata Sa!”

DESPUES di a kaba skol sekundario, den un tempu ku hopi hóben ta fiha nan bista riba metanan materialista, David tabatin otro plan. Na sèptèmber 2003, e huntu ku un amigu di dje a muda for di Illinois, Merka, bai Repúblika Dominikana. * Davey, manera su amigunan i famia tabata yam’é, a disidí di siña spañó i djòin Kongregashon Navas di Testigunan di Yehova den nan obra di siña hende Beibel. E kongregashon a lag’é sintié na kas. Juan, e úniko ansiano dje kongregashon ei, a bisa: “Kiko ku bo pidi Davey e tabata hasi pa bo. Semper e tabata kla pa yuda otro hende, i e rumannan tabata stim’é.”

Davey tabata stima su asignashon. El a skirbi un amigu di dje na Merka: “Mi ta pasando e mihó momentunan di mi bida aki. E ministerio ta hopi refreskante! Nos ta papia rònt di 20 minüt na kada kas pasobra e hendenan ke tende tur loke bo tin di bisa nan. Mi ta dirigiendo seis estudio di Beibel kaba, pero nos tin mester di mas yudansa. Na un reunion, nos kongregashon di 30 publikadó di Reino tabatin un asistensia di 103 persona!”

Lamentablemente, dia 24 di aprel 2004, un aksidente a kosta bida di e hóben Davey i di un otro yònkuman di e mesun kongregashon. Te na su morto, Davey tabatin un gran entusiasmo pa e trabou ku e tabata hasiendo, i el a animá otro hóbennan na su pais natal pa djòin e. “Esei lo kambia bo manera di mira kosnan,” el a bisa un hóben Testigu.

Un kambio di punto di bista ku Davey mes a eksperensiá tabata relashoná ku kos material. Algu ku su tata ta kòrda di dje ta ku un biaha ku el a bin bishitá nan, algun hende a invit’é p’e bai ski. El a puntra kuantu esei ta kosta. Ora nan a bis’é kuantu, Davey a laga sa ku e no ta pensa mes di bai ski pa asina tantu plaka miéntras ku pa e mesun montante ei lo e por biba pa hopi luna na Repúblika Dominikana!

Davey su entusiasmo tabata kontagioso. Un hóben di su pais natal a bisa: “Ora mi a tende tur loke Davey tabata hasiendo i kon felis e tabata, el a pone mi realisá ku mi tambe por logra e kosnan ei. Davey su morto a pone mi meditá riba kiko hende lo bisa di mi si ami muri, i si lo mi tin un impakto positivo asina riba nan bida.”

Komo Testigu di Yehova, e mayornan i rumannan di Davey tin tur konfiansa ku Dios lo resusitá Davey den e binidero mundu nobo di hustisia. (Juan 5:28, 29; Revelashon 21:1-4) Miéntras tantu, ta un konsuelo pa nan ku Davey a usa su bida den e mihó manera posibel, esta, pa sirbi su Kreadó. (Eklesiastés 12:1) Reflehando riba su desishon pa sirbi kaminda e nesesidat ta mas grandi, Davey a yega di bisa: “Mi ta simplemente deseá pa tur hóben hasi algu asin’aki i sinti loke ami ta sinti. No tin nada mas mihó ku sirbi Yehova ku tur loke nos tin. Mare nan por tabata sa!”

[Nota]