Por Salba Planeta Tera!

E ARTÍKULONAN anterior a mustra bon kla ku hende no por sigui gasta e rekursonan natural di tera riba e ritmo aktual. Ta bèrdat ku lidernan di mundu a hasi esfuersonan atmirabel pa redusí polushon, rosamentu di mondi i otro problemanan ambiental. Kuminsando  ku e Konferensia di Nashonnan Uní Riba Medio Ambiente Humano na 1972, i siguí pa otro konferensianan kada tantu tempu, un total di 163 nashon a bini huntu pa respaldá e plannan di akshon. Pero kiko tabata e resultado? David Hunter, direktor ehekutivo di e Sentro pa Lei Ambiental Internashonal, ta bisa: “Desafortunadamente, apesar di tur e tratadonan, e plannan di akshon i otro instrumentonan aki, tòg no a logra para e deterioro mundial di nos medio ambiente.” De echo, Hunter ta agregá, “kasi tur e indikashonnan prinsipal ku medio ambiente ta dunando awe ta ku kosnan ta pió ku den e tempu di e Konferensia di Nashonnan Uní na 1992.”

Pakiko tabatin asina poko progreso despues ku hende tin mas ku 30 aña kaba ta trata ku problemanan di medio ambiente? Un motibu ta e nesesidat pa kresementu ekonómiko. Ekonomia di e nashonnan ta dependé di kuantu konsumidónan ta gasta. Mester tin empresanan ku ta produsí, lokual na nan turno, ta rekerí materia prima. Ta un sírkulo visioso den kua e medio ambiente ta sali komo e pèrdèdó. Kiko ta e solushon anto?

Pasonan Mal Dirigí

Beibel ta splika pakiko hende su esfuersonan pa dirigí nan mes a resultá den un frakaso total. Profeta Jeremias a bisa: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.” (Jeremias 10:23) E palabranan ei ta masha sierto!

Bo a yega di bishitá un hardin òf un parke? Ta dushi pa mira e gran variedat di palu, mata i flornan bunita! Pero un hardin nèchi drechá no ta bini di su mes. Ta hardineronan bon entrená ta dediká oranan largu pa snui e palunan, kòrta e yerbanan i mantené e flornan pa nan keda bunita. Imaginá bo kon nos hogar terenal lo tabata si henter e planeta a risibí e mesun tipo di kuido amoroso ku un hardin ta haña.

En realidat, e propósito di nos Kreadó tabata pa nos planeta a risibí e tipo di kuido ei. Segun e relato di kreashon den e Palabra inspirá di Dios, “SEÑOR Dios a kohe e hòmber i a pon’é den e hòfi di Edén pa kultiv’é i kuid’é.” (Génesis 2:15) Ademas, e famia humano a risibí e enkargo pa no solamente kuida Edén sino tambe ekstendé e Paradeis original ei te ora e kubri tera kompletu.—Génesis 1:28.

Lamentablemente, pa motibu di e desobedensia di Adam ku Eva, nan a bira imperfekto i a pèrdè e oportunidat pa kuida i ekstendé e fronteranan di Paradeis. (Génesis 3:1-6, 23) Komo desendientenan di e promé pareha humano ei, nos a heredá nan piká i imperfekshon. (Romanonan 5:12) Mal maneho di e rekursonan natural di tera ta djis un ehèmpel di hende su esfuersonan ekiboká pa dirigí nan mes. Bo por mira bon kla ku hende no ta kapas pa solushoná nan problemanan. Mester di yudansa di un otro fuente.

E Kaminda Ku Ta Hiba na Rekuperashon

Tempu ku Hesus tabata riba tera, el a siña su disipelnan resa pidi: “Ku bo reino bin. Ku bo boluntat sosodé na tera meskos ku den shelu.” (Mateo 6:10) Beibel ta siña nos ku bou di e Reino selestial di Dios, tera lo bira un paradeis. (Salmo 37:10, 11) Na e tempu ei palu- i matanan lo duna nan fruta plenamente den un ambiente limpi. (Salmo 72:16) Bou di guia di Dios, lo eliminá tur polushon for di tera, i humanidat lo siña kon pa biba na armonia kompletu ku e medio ambiente. Kon nos por ta sigur di esei?

Wèl, Beibel ta bisa ku tera lo “no kita [“tambaleá,” NW] for di su lugá nunka mas.” (Salmo 104:5) Na e debido tempu di Dios, tur hende ku ta na bida lo disfrutá di bendishonnan eterno manera bon salú, alimento na abundansia i bibienda adekuá. Lo bo ke siña mas tokante e propósito di Dios? Papia ku kualke Testigu di Yehova. Nan lo ta kontentu pa yuda bo mira for di Beibel kon planeta Tera por—i lo—wòrdu salbá!

[Plachinan na página 10]

Bou di e guia di Dios, humanidat lo biba na armonia ku e medio ambiente

[Rekonosementu]

Mucha muhé i kunukero: © Jeremy Horner/Panos Pictures