Ta Pará Skirbí Ku Lo Mi Mir’é

Segun e relato di Rosalía Phillips

“Lo bo tin hopi éksito! Bo tin e talento pa yega basta leu!” Eseinan tabata e palabranan ku nos direktor musikal, sintá na su piano, a bisa mi djis promé ku e kortina di esenario a bai haltu. E kuater otro miembronan di e grupo a hasi un seña di bonbiní na mi. Ku mi bistí kòrá tur na payèt, mi tabata e kantante mas nobo den e grupo. Nèrvio a dominá mi. Ata mi aki den un di e teaternan di mas importante na Siudat di Mexico, hasiendo mi debut, kuminsando un karera den e mundu di farándula! Tabata mart di 1976, i tabata falta un luna pa mi a hasi 18 aña.

MI TATA a muri tres aña mas promé, i ainda e tabata bibu den mi memoria. E públiko tambe tabatin bon rekuerdo di dje. E tabata masha stimá i atmirá komo un di e mihó aktornan kómiko di e pais. El a aparesé den mas ku 120 pelíkula durante loke hopi bes ta ser yamá e époka di oro di sine mèksikano. Su nòmber, Germán Valdés, alias “Tin-Tán,” tabata aparesé riba entrada di teaternan rònt Sentro- i Suramérika i den e áreanan di abla spañó di Merka i Europa. Te awe, mas ku 30 aña despues di su morto, tur ora nan ta pasa su pelíkulanan na televishon.

For di tempu mi tabata un hobensita, mi kas tabata un lugá di enkuentro pa hende famoso. Mi mama ku su ruman muhénan a forma un trio di kantante ku tabata yama Las Hermanitas Julián. Su ruman hòmber Julio Julián tabata un tenor di ópera renombrá na Europa, miéntras ku su esposa spañó, Conchita Domínguez, tabata kanta soprano. Ademas, e rumannan di mi tata, Manuel “Loko” Valdés i Ramón Valdés, mihó konosí komo Don Ramón, tabata komediantenan famoso di televishon.

Studionan di filmashon i di grabashon, i tambe teaternan tabata lugánan konosí pa ami ku mi ruman Carlos, pasobra hopi bes ora mi tata tabata bai trabou i riba su giranan e tabata bai ku nos; den e forma ei e tabata tene e famia uní. Ki un kontraste grandi tabatin entre e ambiente superfisial di e mundu di farándula ei i nos hogar, kaminda a reina berdadero armonia i amor! Mi ta kòrda mi tata komo un hòmber masha tierno, yen di vitalidat i amor pa bida. E tabata sumamente generoso, tin biaha asta di mas. El a siña mi ku felisidat no ta bini di loke bo tin sino di loke bo ta duna.

 Un Kambio Devastador

Na fin di aña 1971, mi mama a duna ami ku mi ruman e notisia tristu ku dòkternan a diagnostiká ku nos tata tabatin un enfermedat inkurabel. Un aña i mei largu mi a mir’é sufri segun ku e tabata lucha bou di influensia di remedinan fuerte.

Te awe mi ta kòrda e dia ku mi a mira ambulans bini nos kas pa hib’é hospital. Mi tabata sa ku lo e no bolbe bèk nunka mas. Kasi mi no por deskribí mi doló. Mi a disidí ku ya ku e tabata sufriendo, ami tambe lo mester a sufri. Mi a paga un sigaria den mi plant’i man i a yora sin ku niun hende por a konsolá mi. Dia 29 di yüni 1973 mi tata a fayesé. Mi a kuminsá puntra mi mes: ‘Pakiko un hende asina bon, ku a trese asina tantu alegria, tin ku bai laga nos? Unda e ta awor? E por tende mi si mi papia kuné? Awor ku e no t’ei mas, ki nifikashon mi bida tin?’

Un Karera sin Propósito

Despues ku mi a tuma poko tempu pa rekobrá emoshonalmente, mi a kuminsá un estudio pa bira binnenhuisarchitect. Pero mi tabata poko rebelde, i mi a kita for di skol. Ami ku mi mama a disidí di sali mas tantu. Nos tabata bai fiestanan elegante den e mundu di entretenimentu. Hopi bes e anfitrion tabata kaba fiesta bisando, “Rosalía, lòs un di bo piesanan.” Nan tabata gusta mi stèm i e sintimentu ku mi tabata hinka den mi músika. Nan tabata bisa ku mi a heredá e talento di mi mayornan.

Na un di e fiestanan ei, e kompositor i direktor di Arturo Castro i Su Castronan 76 a tende mi kanta i a invitá mi pa djòin su grupo. Na promé instante, mi no a gusta e idea mashá. Ounke mi a stima músika i mi tabata toka guitara i komponé for di tempu mi tabatin 14 aña, mi no kier a bira un artista profeshonal. Pero mi mama a keda insistí pa mi dal bai, i asina yuda mi famia finansieramente. Pues finalmente, mi a aseptá. Esei a hiba na mi debut deskribí anteriormente.

For di kuminsamentu di mi karera, mi tabatin trabou konstantemente. Nos grupo a hasi un gira rònt Mexico, i nos tabata duna presentashon dos biaha riba un anochi. Nos a traha na Guatemala, Venezuela, New York i Las Vegas. Mi a keda ku e grupo dos aña largu. Despues mi a haña un oferta pa hunga den pelíkula. Mi a haña dos papel sekundario den pelíkula i un ròl prinsipal, pa kua mi a gana dos premio importante.

Un dia mi a risibí un yamada di e kompania di televishon mas importante di e pais. Nan a ofresé mi un kontrakt eksklusivo ku lo a permití mi bira un di nan aktrisnan prinsipal i tambe protagonista den un novela ku a karga mi nòmber. Esei lo a hiba mi n’e tòp di e mundu di entretenimentu. Lo mi a risibí un salario fabuloso, asta si mi no a traha regularmente. E sintimentu ku mi no a meresé tur esei i miedu di pèrdè mi libertat a pone mi nenga e oferta. Mi a aseptá sí pa hunga den e novela, pero ku e kondishon ku lo mi por a sigui studia arte dramátiko na universidat. Tòg, mi no tabata felis. Loke a molestiá mi ta ku otro aktornan tabatin ku lucha hopi aña pa por haña un papel prinsipal, miéntras ku ami a hañ’é djis pasobra mi ta yu di Tin-Tán.

Despues mi a kuminsá graba disko. Mi promé grabashon tabata un piesa p’e novela. Mi mes a komponé tantu e letranan komo e músika. Despues mi a graba den un studio famoso na Lònden. Mi a graba mas piesa, pelíkula i novela. E promé páginanan di sekshon di farándula den korantnan a kuminsá presentá artíkulonan tokante mi, pues bo por bisa ku mi a alkansá e tòp di éksito. Tòg mi a sinti falta di algu. Mi tabata mira kon arogante i opseshoná e aktornan tabata, i tambe tabatin hopi inmoralidat i falta di sinseridat entre nan. Mi a pèrdè konfiansa den hende.

Un dia den e otoño di 1980, mi a mira mi tio Julio na un reunion di famia. El a disidí di bandoná ópera, i mi a skuch’é papia tokante un paraiso ku Dios a primintí. Tio Julio a bisa ku inhustisia i tristesa lo disparsé for di tera i ku amor lo prevalesé. Tambe el a bisa ku e nòmber di e Dios berdadero ta Yehova. Loke a atraé mi mas tantu tabata ora mi a tende ku den Paraiso nos sernan kerí lo wòrdu resusitá. Mi a keda enkantá ku e posibilidat di mira mi tata atrobe.  Nunka mi a stòp di sinti su falta i anhelá su sosten i kariño. Lo ta algu maravioso di por mir’é bèk atrobe! Pero den mi sintimentunan di mas profundo esei a parse mi imposibel. Tio Julio a duna mi un Beibel i a invitá ami ku mi mama pa asistí na un kongreso di Testigunan di Yehova ku lo a bai tuma lugá den un par di siman. Nos a bis’é ku podisé nos lo a bai.

Mi A Disidí di Kambia Mi Bida

Un anochi mi tabata huma riba kama miéntras mi tabata lesa e Beibel ku mi tio a duna mi. Loke mi a lesa den e buki di Proverbionan a pone mi yega n’e konklushon ku lus, komprondementu i bida a originá ku Dios, miéntras ku skuridat, konfushon i morto a bini for di un fuente kontrario. E mesun anochi ei, mi a paga e último sigaria ku mi a yega di huma i a warda mi mama yega kas. Ku awa na wowo, mi a pidié yuda mi tuma algun desishon grandi. Despues, mi a bai n’e teater kaminda mi tabata ensayando e papel di Cordelia den e obra Rei Lear di Shakespeare. Mi a stòp di aktua i a kibra ku mi frei, ku tabata un di e aktornan prinsipal.

Sin embargo, ainda mi no a siña sirbi Dios, pues mi no tabatin nada pa lèn ariba. Mi a kai den un depreshon profundo. Mi a resa pidi Dios yuda mi haña e sintimentu ku mi ta ègt pertenesé na algu pa loke mi ta komo persona, i no pa kualke talento heredá òf un nòmber di hopi fama. Mi a pone fin na tur mi asosiashonnan i aktividatnan regular.

E Kaminda pa Berdadero Éksito

Meimei di mi konfushon, mi a kòrda e invitashon ku tio a duna mi pa asistí na un kongreso. Mi a yam’é, i el a hiba mi e stadion. Loke mi a mira ei a konmové mi. Mi a mira hende nèchi bistí ku no tabata papia palabra malu ni huma, i no tabata purba impreshoná niun hende. Loke mi a tende for di Beibel a pone mi kòrda loke mi a lesa den e buki chikitu titulá E Beibel realmente ta Palabra di Dios? * ku mi a haña na kas djis despues ku mi tata a muri.

Rònt di e tempu aki nan a ofresé mi un otro papel prinsipal den un novela. Mi a gusta e papel, ya ku el a parse di sostené e balornan ku ta agradá Dios ku mi a siña n’e kongreso. En bista di esei, mi a aseptá e ròl. Di otro banda, e pasashi di Beibel aki a sigui pasa den mi mente: “No uni boso mes den yugo desigual ku inkrédulonan, pasobra . . . ki komunion lus tin ku skuridat?”—2 Korintionan 6:14.

E deseo pa agradá Dios tabata bira ora pa ora mas fuerte den mi. Mi kier a bai un reunion na Salòn di Reino ku mi tio i tanta. Nan kongregashon tabata un ora for di mi kas, pero e siguiente tres diadumingunan mi a bai. Mi tio a disidí di hiba mi na un kongregashon den mi bisindario. Nos a yega nèt ora e reunion tabata kabando, i ei mi a topa Isabel, un mucha muhé di mi edat. E tabata bondadoso i no tabata un hende ku idea. Ora mi tio a introdusí mi na dje komo Rosalía Valdés, e no a presta niun tiki atenshon na mi nòmber. Esei a hasi mi masha kontentu. El a ofresé pa studia Beibel ku mi na mi mes kas.

Nos a kuminsá studia Beibel usando e buki E berdad cu ta hiba na bida eterna. * Isabel a adaptá su mes gustosamente na mi programa. Tin dia e tabatin ku warda mi te anochi lat, ora mi a kaba ku filmashon di e novela. Mi tabata hopi gradisidu ku aki tabatin un persona interesá den mi simplemente pasobra mi kier a siña e bèrdatnan di Beibel! E tabata un persona onesto i ku masha bon manera, esta, kualidatnan ku mi a kere ku un hende por a haña solamente dor di studia filosofia i arte. Nos a hasi areglo pa studia pa hopi ora, tin biaha vários bes pa siman.

 Na prinsipio tabata difísil pa mi pa eliminá mi ideanan robes, pero gradualmente e bèrdat di Beibel a kuminsá remplasá nan. Mi ta kòrda kon e siguiente promesa di Dios a lanta mi ánimo: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.” (Salmo 37:10, 11) Ademas, e speransa di mira mi tata atrobe den Paraiso a kuminsá bira real pa mi. Hopi bes mi tabata pensa riba e palabranan di Hesus: “No straña boso di esaki, pasobra e ora lo yega den kual tur ku ta den graf lo tende su bos, i lo sali; esnan ku a hasi bon, pa un resurekshon di bida.”—Juan 5:28, 29.

Ora mi a kaba ku e novela, mesora otro ofertanan a drenta su tras. Ounke e proyektonan ei lo por a hasi mi mas famoso, si mi a partisipá den nan, esei lo a nifiká ku lo mi a aprobá inmoralidat, idolatria i otro ideanan falsu. Mi a siña ku Satanas ta un persona real i ku e no ke pa nos sirbi Yehova. P’esei mi a nenga e ofertanan i a kuminsá asistí na tur e reunionnan. Naturalmente, ni mi mama ni mi ruman hòmber no a komprondé pakiko mi tabata desperdisiando asina tantu oportunidat i asina tantu plaka. Na mesun tempu, nan por a mira un transformashon den mi. Mi tabata kambiando for di un persona infelis i deprimí pa unu bibitu i yen di goso. Por fin, mi bida a haña un propósito!

Mi a sinti e deseo pa kompartí loke mi tabata siñando ku otro hende i djis despues mi a bira un publikadó di e bunita mensahe dje Reino di Dios. Ora mi tabata prediká, tin biaha tabata difísil pa kapta e doño di kas su atenshon; hopi tabata rekonosé mi komo aktris. Na mas ku un okashon, ami ku mi kompañera a yega kas di hende nèt na momentu ku nan tabata wak e novela ku mi tabata hunga aden. E hendenan no por a kere ku ta ami tabata pará na nan stupi!

Dia 11 di sèptèmber 1982, mi a batisá komo símbolo di mi dedikashon na Yehova. Awor mi bida tabatin un berdadero propósito, i mi tabatin un otro tipo di karera mi dilanti. Isabel su entusiasmo p’e ministerio a motivá mi. E tabata traha komo pionero regular, manera nan ta yama e ministernan di Testigunan di Yehova ku ta traha full-time den sirbishi. No a tarda muchu ku mi tabata kompañ’é segun ku e tabata studia Beibel ku otro personanan. Isabel a bira mi mihó amiga.

Práktikamente mi a legumai mi trabou komo artista, pues ami ku mi mama tabatin ku kontentá nos ku un nivel di bida mas abou. Miéntras tantu, mi a komponé músika pa mi di kuater disko, lokual a inkluí algun kantika tokante mi balor- i kreensianan nobo. Mi a skirbi un kantika tokante e speransa firme ku mi tabatin di mira mi tata atrobe. E título ku mi a duna e kantika ta: “Ta Para Skirbí—Lo Mi Mir’é.” Ora mi a kant’é promé bes pa mi mama, esei a konmov’é profundamente. El a sinti mi konvikshon genuino. Mi a keda kontentu di mi alma ora el a ekspresá su deseo di studia Beibel. Dos aña despues, el a batisá komo sirbidó di Yehova. Te n’e dia djawe e ta aktivo den su sirbishi.

Segun ku tempu a pasa, a bira mas fásil pa mi nenga oferta di trabou. I ora mi a haña mi enfrentá ku prueba òf tentashon, mi tabata imaginá mi e esena maravioso di mi tata huntu ku nos den un bunita paraiso, lokual a fortalesé mi konfiansa i determinashon pa sigui sirbi Yehova.

Un dia nan a pidi mi pa aktua den e vershon spañó di e programa pa mucha, Sesame Street. Mi a pensa ku lo mi no por hasié i mi a informá e produktor ku mi prinsipionan bíbliko lo no a permití mi promové kosnan manera dia di fiesta i selebrashon di kumpleaño. E produktor a kontestá mi ku si mi a aseptá e trabou, lo el a respetá mi kreensianan i ku nos lo por a firma un kontrakt ku lo a kontené e detayenan spesífiko ei di mi posishon. P’esei mi a aseptá i a filma 200 episodio. Esei tabata mi último proyekto komo aktris.

Tabatin un kontrakt mas pendiente ainda ku e kompania di grabashon; pues mi a graba dies di mi komposishonnan kuné, inkluso e kantika ku mi a komponé tokante mi tata i resurekshon. Mi a haña oportunidat pa kanta e kantika ei na televishon i na algun presentashon personal, durante kua semper mi a menshoná mi kreensianan. Sin embargo, e kompania a  kuminsá pone preshon riba mi pa mi presentá un imágen mas sensual. Ei mi a entregá mi retiro.

Bendishonnan den Sirbishi di Dios

Na desèmber 1983, ami ku Isabel a bishitá e fasilidatnan di Testigunan di Yehova na Brooklyn, New York. Ei mi a topa e hòmber ku despues a bira mi kasá, Russell Phillips. Nos a skirbi otro pa kasi dos aña. Mi ta kòrda kla-kla e dia ku mi a kuminsá mi sirbishi komo pionero regular; Russell a manda un bukèt di rosa pa mi for di New York!

Pa un aña largu mi a traha pionero ku Isabel. Despues el a ser invitá pa sirbi n’e sukursal di Testigunan di Yehova na Mexico. Su kòmbersashonnan tokante su asignashon nobo a lanta den mi e deseo pa oumentá mi sirbishi i, si tabata Yehova su boluntat, pa mi tambe sirbi na Bètel.

Russell tabata un otro bendishon den mi bida. Grásias na su amor pa Yehova i Su organisashon, mi a siña stima sirbishi di tempu kompletu. E tabata stima Bètel i a sirbi na Bètel na Brooklyn pa tres aña. Despues ku nos a kasa, nos a sirbi huntu komo pionero regular na Colorado, Merka. Despues, nan a invitá nos pa sirbi komo trahadó internashonal den konstrukshon na sukursalnan nobo den otro paisnan. Grandi tabata nos sorpresa ora nos a haña sa ku nan a asigná nos pa bai sirbi na Mexico! Na aprel di 1990, nos a aseptá gustosamente e privilegio gososo di bira miembro di e famia di Bètel na Mexico. E ehèmpel di Russell tabata un tremendo estímulo pa mi. Mi a atmirá e spiritu di sakrifisio propio ku a motiv’é pa bandoná su pais natal i famia pa promové interesnan di Reino aki na Mexico.

Ami ku Russell a disfrutá hopi di nos privilegio di sirbishi n’e sukursal di Mexico. Pero kosnan a kambia diripiente ora mi a sali na estado. E notisia a kohe nos di sorpresa. No opstante, semper nos a atmirá mayornan ku a lanta nan yunan den e kaminda di e bèrdat, i ku un kurason gradisidu nos a aseptá esaki komo un asignashon nobo. Na òktober 1993, Evan a nase, i dos aña i mei despues, Gianni. Ounke lantamentu di yu ta rekerí esfuerso kontinuo, kada biaha ku nos dos yunan di 11 i 8 aña di edat ekspresá nan propio fe ora nan ta den sirbishi, esei ta duna nos hopi satisfakshon.

Aktualmente Russell ta sirbiendo den un Komité Regional di Konstrukshon di Salòn di Reino, i ami resientemente a kuminsá bèk ku e sirbishi di tempu kompletu komo pionero. Durante e último 20 añanan, mi por a yuda 12 miembro di mi famia, i tambe 8 otro hende, siña e bèrdat di Beibel i sirbi Yehova.

Ora mi yunan puntra mi, ‘Mami, tabata difísil pa bo laga e mundu di farándula?’ mi ta sita e palabranan di apòstel Pablo: “Mi ta konsiderá tur kos komo pièrdè kompará ku e balor superior di konosé Kristu Hesus mi Señor, pa kende mi a sufri pièrdè di tur kos, i ta konsiderá nan komo basura, pa mi por gana Kristu.” (Filipensenan 3:8) Mi ta hopi gradisidu ku Yehova a reskatá mi for di un bida bano i sin propósito i a permití mi bira parti di su pueblo maravioso! Nunka mi ta kansa di gradisié pa e hopi bendishonnan ku el a perkurá pa medio di su Yu, Hesukristu. Hopi bes mi ta kanta gososamente e kantika ku mi a skirbi tokante mi tata. Mi tin konfiansa ku lo mi mir’é atrobe.

[Nota]

[Plachi na página 24]

Ami huntu ku mi mayornan i mi ruman hòmber tempu mi tabatin un aña

[Plachi na página 26, 27]

Kantando ku Arturo Castro i Su Castronan 76

[Rekonosementu]

Angel Otero

[Plachi na página 28]

Ami huntu ku mi famia awe

[Rekonosementu pa Potrèt na página 24]

Activa, 1979