Dòkternan den un Mundu Ku Ta Kambia

Na aña 1174, Maimonides a keda nombrá komo dòkter privá di e gobernantenan di Egipto i e tabata pasa mayoria di su tempu na palasio. El a skirbi kiko tabata pasa tur dia ora ku e yega kas: “Mi ta kome algu liviano, e úniko kuminda ku mi ta kome den bintikuater ora. Kaba mi ta bai atendé mi pashèntnan i skirbi resèpt i instrukshon pa nan malesanan. Pashèntnan ta keda drenta sali te ora anochi sera, i tin biaha . . . mi ta asina agotá ku apénas mi por papia.”

ETRABOU di dòkter semper a rekerí sakrifisio propio. Pero e mundu djawe den kua dòkternan ta praktiká medisina ta kambiando rápidamente. Nan orario di trabou te ainda por ta mes agotador ku esun di Maimonides. Pero akaso hende ta respetá dòkternan mes tantu ku na ántes? Kon sirkunstansianan nobo a afektá dòkternan su estilo di bida típiko? I kon desaroyonan resien a kambia e relashon entre dòkter i pashènt?

Un Kambio den Relashon

Tin hende ainda ta kòrda e tempu ku un dòkter por a kana ku tur su remedinan den su maletin pretu. Den e tempu ei—meskos ku awor—hende tabatin sintimentu miksto pa ku dòkter. Hende tabatin masha atmirashon i rèspèt pa mayoria dòkter debí na nan abilidat, rango i étika. Sin embargo, na mesun tempu nan por a ser kritiká pa e tarifa ku nan ta kobra, zundrá pa nan frakasonan i denunsiá pa nan aparente falta di kompashon.

Pero tòg hopi dòkter tabatin e gran satisfakshon di yuda vários generashon di e mesun famia. Nan tabatin kustumber di bishitá hopi pashènt na kas, i den áreanan di kunuku tin biaha nan tabata keda kome òf asta keda drumi ora di yuda ku hañamentu di yu. Hopi dòkter personalmente tabata traha e remedi pa nan pashèntnan. Dòkternan generoso tabata duna tratamentu grátis na hende di poko rekurso i nan tabata disponibel 24 ora pa dia, 7 dia pa siman.

Klaru ku te ainda tin algun dòkter ta traha asina, pero na hopi lugá e karakter di e relashon entre dòkter i pashènt a kambia. I probablemente e kambio durante último dékadanan tabata hopi mas grandi ku e kambio durante siglonan anterior. Kon bin e kambionan aki a tuma lugá? Laga nos wak promé e asuntu di bishitá pashènt na kas.

Kiko A Pasa ku Bishitá Pashènt na Kas?

Bishitá pashènt na kas tabata e manera akustumbrá di praktiká medisina, i den algun pais ainda esei ta e kaso. Pero mundialmente e kustumber ei ta menguando. E korant The Times of India a bisa: “E dòkter di kas ku típikamente tabatin un manera trankilisante di papia i di trata ku pashènt, ku tabata konosé e famia íntimamente i ku tabata dispuesto pa pasa na kas ki ora ku tabata nesesario, ta birando mas i mas skars den un era di spesialista i di superspesialista.”

Debí na e gran oumento di konosementu médiko, hopi dòkter a spesialisá nan mes den sierto ramo i ta traha komo parti di un grupo, e  resultado ta ku pashèntnan kisas ta mira un otro dòkter kada biaha ku nan ta malu. Konsekuentemente, hopi dòkter no por tin e relashon di largu plaso mas ku famianan manera ántes tabata e kustumber.

E kambio di stòp di bishitá pashènt na kas a start un siglo pasá, tempu ku dòkternan a kuminsá hasi mas uso di tèst di laboratorio i di ekipo di diagnostiká. Na hopi lugá, agensianan di salubridat a kuminsá mira e asuntu di bishitá pashènt na kas komo un manera inefisiente pa usa dòkternan su tempu. Awe, mayoria pashènt por haña transpòrt pa bai un ofisina di dòkter. Ademas, servisionan médiko ousiliar i di emergensia ta hasi trabou ku ántes tabata na enkargo di dòkter.

Kambio di Sirkunstansia

Den e mundu djawe masha poko dòkter ta independiente. Mayoria bes ta agensianan gubernamental òf kompanianan di kuido di salú ta perkurá servisionan médiko ku ta duna trabou na dòkternan. Sin embargo, hopi dòkter no ta gusta ku tin un terser partido den e relashon entre dòkter i pashènt. E agensianan ei hopi biaha ta rekerí di dòkternan pa nan wak mas pashènt den ménos tempu. Dr. Sheila Perkins, un dòkter di kas na Gran Bretaña, a bisa: “Mi tin ku wak ún pashènt kada shete pa dies minüt. I gran parti di e tempu ei mi tin ku usa pa hinka informashon di e pashènt den kòmpiuter. Ta resta masha tiki tempu pa kultivá un relashon ku e pashènt. Esei por ta masha frustrante.”

E mundu kambiá den kua dòkternan ta praktiká medisina awor ta un mundu kaminda pashèntnan a haña mas poder. Un tempu “òrdu di dòkter” tabata lei. Pero den hopi pais awe, dòkternan ta obligá na informá e pashènt di opshonnan di tratamentu ku tin i di nan posibel resultadonan di manera ku e pashènt por aprobá un tratamentu despues di komprondé loke e ta enserá. E relashon entre dòkter i pashènt a kambia. Tin hende ta opiná ku awor un dòkter ta simplemente un eksperto di sierto téknika i prosedura pero ku ta e pashènt tin ku tuma hopi di e desishonnan.

Den nos sosiedat ku ta kambiando rápidamente, un kantidat grandi di dòkter ta hende muhé. Dòkternan femenino hopi biaha ta mas popular pasobra hende ta haña ku nan ta mihó skuchadó. Pues, nan influensia riba e profeshon médiko aparentemente ta hasié mas kompasivo.

Mayoria hende ta apresiá un dòkter ku ta komprondé e sintimentunan di e pashèntnan i e strès ku nan tin. Pero ta rasonabel pa puntra: Kuantu pashènt ta komprondé e sintimentunan di nan dòkter i e strès ku nan tin? Esaki sigur lo por mehorá e relashon entre dòkter i pashènt. E siguiente artíkulo por yuda den esei.

[Plachi na página 3]

Maimonides

[Rekonosementu]

Brown Brothers

[Plachi na página 4]

Ántes, dòkternan hopi bes a bishitá pashènt na kas