E Punto di Bista Bíbliko

Duna Mucha e Atenshon Ku Nan Mester

E Yu di Dios tabatin tempu pa dediká na mucha? Algun di su disipelnan a pensa ku nò. Na un okashon nan a purba stroba e chikitinnan di yega serka di Hesus. Pero el a reakshoná bisando: “Laga e muchanan bin serka mi; no stroba nan.” E ora ei, ku amor el a risibí un grupo di mucha i a papia ku nan. (Marko 10:13-16) Asina Hesus a mustra ku e ta dispuesto pa duna atenshon na mucha. Kon mayornan awe por sigui su ehèmpel? Dor di eduká nan yunan korektamente i dediká tempu na nan.

Ta klaru ku mayornan responsabel ta hasi tur esfuerso pa perkurá bon pa nan yunan i ta evitá di maltratá nan. Nos por asta bisa ku ta “natural” pa mayornan mustra rèspèt i konsiderashon pa nan yunan. Sin embargo, Beibel ta spièrta ku hopi hende den nos tempu lo no tin “kariño natural” mas. (2 Timoteo 3:1-3, NW) I pa esnan ku sí tin un interes amoroso den nan yunan, semper tin algu mas pa siña pa asina bira un mihó mayor. P’esei, e siguiente prinsipionan di Beibel ta rekordatorionan ku ta bonbiní serka mayornan ku ke lo mihó pa nan yunan.

Eduká Nan sin Iritá Nan

Dr. Robert Coles, un famoso maestro i sikiatra ku ta hasi investigashon, a yega di bisa: “Mucha tin un sentido moral ku ta desaroyando. Na mi opinion ta Dios ta duna nan e sentido aki, i nan tin un deseo fuerte pa guia moral.” Ken tin ku satisfasé e hamber i set aki pa guia moral?

Na Efesionan 6:4, e Skritura ta urgi: “Boso, tatanan, no provoká [“iritá,” NW] boso yunan na rabia, ma lanta nan den e disiplina i instrukshon di Señor.” Bo a ripará ku e teksto ta enkargá e tata partikularmente ku e responsabilidat di inkulká den su yunan un amor pa Dios i un apresio profundo pa Su normanan? Den e promé versíkulo di Efesionan kapítulo 6, apòstel Pablo a referí na tantu e tata komo e mama ora el a bisa yunan pa nan ta ‘obedesidu na nan mayornan.’ *

Klaru ku si e tata ta ousente, ta e mama e ora ei tin ku asumí e responsabilidat aki. Hopi mama soltera tabatin éksito den lanta nan yunan den e disiplina i instrukshon di Yehova Dios. Sin embargo, si e mama kasa, ta e esposo kristian mester hiba delantera. Di buena gana e mama mester sigui e guia ku e esposo ta duna pa eduká i disipliná nan yunan.

Kon bo ta disipliná òf eduká bo yunan sin “iritá” nan? No tin fórmulanan sekreto, foral pasobra kada un yu ta diferente. Pero mayornan mester pensa bon kon nan ta duna disiplina, pa semper nan hasié ku amor i rèspèt pa nan yunan. Ta interesante ku e asuntu di no provoká boso yunan ta ser ripití den e Skritura na Kolosensenan 3:21. Einan, Pablo ta bolbe spièrta e tatanan: “No provoká boso yunan, pa nan no pèrdè ánimo.”

Tin mayornan ta grita nan yunan. Esaki sin duda ta provoká òf iritá nan yunan. Pero Beibel ta urgi: “Laga tur amargura, furia, rabia, griteria i kalumnia wòrdu kitá for di boso, huntu ku tur malisia.” (Efesionan 4:31) Beibel ta  bisa tambe ku un “sirbidó di Señor no mester ta pleitadó, ma kariñoso ku tur hende.”—2 Timoteo 2:24.

Duna Nan Bo Tempu

Duna bo yunan e atenshon ku nan tin mester ta nifiká tambe ku bo ta dispuesto pa sakrifiká plaser i komodidatnan personal na fabor di e bienestar di bo yunan. Beibel ta bisa: “E palabranan aki, ku mi ta ordená bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.”—Deuteronomio 6:6, 7.

Awendia obligashonnan finansiero ku ta eksigí hopi tempu i esfuerso di hende ta pone ku ta masha poko mayor por ta huntu ku nan yunan henter dia. Apesar di esei, e buki di Deuteronomio ta enfatisá ku mayornan tin ku saka tempu pa dediká na nan yunan. Pa nan por hasi esei, nan mester ta bon organisá i dispuesto pa hasi sakrifisio. Pero mucha tin mester di e atenshon ei.

Konsiderá e resultadonan di un estudio ku nan a hasi ku mas di 12.000 teenager. E konklushon di e investigadónan tabata: “Un relashon emoshonal fuerte ku un mayor ta e mihó garantia pa salú di un teenager i e barera di mas fuerte pa evitá ku e mucha ta komport’é di un manera ku su bienestar ta na peliger.” Sí, yunan tin un deseo fuerte pa atenshon di nan mayornan. Un mama a yega di puntra su yunan: “Si boso por a haña tur loke boso ta deseá, kiko ta e kos ku boso lo tin mas gana di dje?” Nan tur kuater a respondé: “Mas tempu huntu ku Mami ku Papi.”

Pues ser un mayor responsabel ta nifiká ku bo ta hasi sigur ku e nesesidatnan di bo yunan ta ser satisfasé, inkluso nan nesesidat di edukashon spiritual i di tin un relashon estrecho ku nan mayornan. E ta nifiká yuda bo yunan bira adultonan kapas, respetuoso i onesto ku ta trata nan próhimo ku bondat i ku ta duna gloria na nan Kreadó. (1 Samuel 2:26) Sí, ta ora ku mayornan ta eduká i disipliná nan yunan di akuerdo ku e prinsipionan di Dios, nan ta mayornan responsabel.

[Nota]

[Plachi na página 13]

Gritamentu por kousa angustia pa un mucha

[Plachi na página 13]

Dediká tempu na bo yunan