For di Nos Lektornan

Moisés Mi a kaba di lesa e seri di artíkulo “Moisés—Hende òf Mito?” (8 di aprel 2004) Mi tin ku atmití sí ku mi no a spera di haña asina tantu informashon komo reakshon riba e deklarashonnan di akadémikonan ku ta pretendé ku Moisés ta un persona fiktisio. Mi tin sigur ku si un persona sinsero lesa djis un parti so di e seri aki, esei lo ta sufisiente pa fortalesé su fe den Yehova.

Y. M., Rusia

Puntualidat Masha danki mes pa e artíkulo “Sea Puntual!” (8 di aprel 2004) Komo ku mi ta sirbi den e kongregashon, mi ta un kabes di famia i mi tin mi trabou tambe, tin hopi kos ku ta tuma di mi tempu. Ounke mi a saka benefisio di e sugerensianan ku a aparesé den revistanan anterior, ta bon pa mira un artíkulo manera esaki atrobe. Loke mi a gusta foral ta e deklarashon: “Nos Kreadó tabata ke pa nos ta konsiente di tempu.” Esei realmente a pone mi mira e asuntu den e perspektiva korekto. Por fabor, sigui skirbi artíkulonan práktiko manera esun aki.

J. S., Merka

Hopi bes mi ta gusta laga kos te na último momentu, i ounke mi no ta yega lat, mi ta drumi di mas. Mi a yega di pasa den hopi eksperensia peligroso dor ku mi tin ku rùsh. E artíkulo aki a animá mi pa ta mas fleksibel den e manera ku mi ta programá mi tempu.

Y. W., Hapon

Mal Kustumber Mi no por keda sin skirbi i ekspresá mi apresio pa e artíkulo “E Punto di Bista Bíbliko: Ta Posibel pa Vense Mal Kustumber?” (8 di aprel 2004) Mi tin hopi tempu ta luchando ku un problema di peso. Mi ta pèrdè peso, pero despues mi ta bolbe subi di peso bèk. Ounke e artíkulo no a trata ku e problema spesífiko ei, e informashon ta aplikabel. El a yuda mi analisá mi mal kustumbernan i mira kon nan a kontribuí ku mi peso a subi. Masha danki mes pa rekordá nos ku Yehova ta konsiente di nos asuntunan personal ku nos ta luchando kuné i ku e ta interesá den nan.

M. S., Merka

Diskoteka Danki pa e artíkulo “Hóbennan Sa Puntra . . . Kiko di Diskoteka pa Hóbennan?” (8 di mei 2004) Mi ta di akuerdo ku e lugánan ei no ta pa kristiannan. Ta duel mi ku mi no a konosé Yehova mas promé den mi bida tempu ku mi tabata bai e tipo di lugánan ei.

L., Indonesia

Pa mi ta onesto, mi a yega di bai lugánan kaminda mi no mester a bai. Mi gusta baila i semper mi tabatin un preteksto. Pero e siguiente dia mi tabata sinti mi kulpabel. No ku ami tabata hasi malu; pero mi a sinti asina pa motibu di loke tur hende rònt di mi tabata hasi. E artíkulo aki a saka e bèrdat di diskotekanan na kla: hopi di nan ta peligroso i inmoral.

D. K., Oustralia