Ki Futuro Ta Spera e Práktika di Medisina?

ORA bo puntra tokante ki futuro ta spera dòkternan, esei hopi bes ta hiba na spekulashon relashoná ku avansenan den teknologia i na e pregunta si esakinan lo libra dòkternan di tareanan rutinario ya asina nan por dediká mas tempu na e pashènt komo persona. Naturalmente e futuro di dòkternan ta estrechamente ligá ku e kuestion mas grandi di kiko tin den futuro pa humanidat. Dos buki bíbliko ku ta duna informashon tokante e futuro ei ta konta e historia di Hesus i su apòstelnan. Ta un dòkter a skirbi ámbos buki.

Dikon ta masha interesante ku nos tin e punto di bista di un dòkter den e relatonan aki? Kiko nan tin di haber ku e futuro pa dòkter i pashènt? Dikon algun dòkter ansiosamente ta spera e tempu ora ku nan profeshon lo no ta nesesario mas?

Hopi dòkter ta bon opservadó. Lukas, yamá “e dòkter stimá,” a skirbi dos buki bíbliko, i el a duna deskripshonnan detayá di algun di e hendenan enfermo ku Hesus i tambe e apòstelnan a kura. (Kolosensenan 4:14) Pues Lukas ta yuda nos konsiderá e preguntanan: E kosnan aki realmente a sosodé? I si ta asina, kiko esaki ta nifiká pa dòkter i pashènt awe?

Eksaminashon di Evidensia Médiko

Lukas tabatin oportunidat pa verifiká e naturalesa milagroso di e kurashonnan ku a tuma lugá dor di entrevistá hende ku tabata testigu di nan. Ademas, el a biaha ekstensamente ku apòstel Pablo. Aparentemente, Pablo a kura vários hende den presensia di Lukas. Segun ku nos ta konsiderá e dòkter su relato di dos di e kurashonnan ei, tuma nota di kuantu detaye el a inkluí.

 Lukas ta duna e ora, fecha i lugá di e siguiente suseso: Tabata meianochi riba e promé dia di siman, i un grupo di kristian tabata den un sala na di tres piso di un kas na Troas, den e provinsia romano di Asia. (Echonan 20:4-8) Nos ta lesa e detayenan aki: “Tabatin un hóben ku yama Eutiko, kende tabata sintá den bentana, i el a pega un soño profundo; i ora Pablo a keda papia asina tantu, soño a poderá di dje di tal manera ku el a kai for di e di tres piso, i nan a lant’é morto for djabou.” E ora ei ku e poder di Dios, Pablo a kura e hóben su leshonnan i a restor’é na bida. Despues di kome, “nan a bai ku e hóben, bibu, i a keda mashá konsolá.”—Echonan 20:9-12.

Tambe Lukas ta informá ku e tabata huntu ku Pablo na Malta. Nan tabata serka “e hòmber prinsipal” di e isla, Publio, kende a mustra hospitalidat na nan, ora ku Pablo a hasi un otro milager. Tabata trata di un hòmber kende su malesa, den e tempu ei promé ku e era di antibiótika, lo por tabata un peliger pa su bida. Lukas ta konta: “E tata di Publio tabata drumí malu ku keintura i disenteria; i Pablo a drenta bai mir’é i despues ku el a hasi orashon, el a pone su mannan riba dje i a kur’é. I despues ku esaki a sosodé, e otro hendenan di e isla ku tabatin malesanan tabata bin serka dje i tabata wòrdu kurá.”—Echonan 28:7-9.

 Kiko A Konvensé e Dòkter?

Lukas a skirbi e relatonan ei den e buki di Echonan tempu ku su lektornan ainda por a verifiká e echonan dor di papia ku e hendenan enbolbí. Relashoná ku loke el a skirbi den e buki bíbliko ku ta karga su nòmber, Lukas a skirbi: “[Mi] a investigá tur kos kuidadosamente for di prinsipio . . . pa bo por sa e bèrdat eksakto tokante di e kosnan.” (Lukas 1:3, 4) Loke e dòkter aki a mira i a investigá a konvens’é ku e siñansanan di Hesus tabata bèrdat. E kurashonnan milagroso tabata parti di e siñansanan ei, i a duna un base pa kere e profesia bíbliko ku Dios ku tempu lo eliminá malesa. (Isaias 35:5, 6) Komo un dòkter ku tabata kustumbrá di trata ku sufrimentu, Lukas lo mester a hañ’é hopi alentador pa kontemplá un tempu ora ku su profeshon lo no ta nesesario mas. Abo ta haña tal perspektiva atraktivo?

Ta interesante ku ta esaki ta loke tin den futuro pa hende ku ta stima Dios, sin importá unda nan ta biba riba tera. Beibel ta primintí ku bou di e Reino di Dios, “ningun habitante lo no bisa: ‘Mi ta malu.’” (Isaias 33:24) Hopi dòkter djawe a yega na e konklushon ku tin un base lógiko pa kere e promesanan di Beibel.

‘Esei A Atraé Mi Hopi’

Dr. Jon Schiller, un dòkter di kas na Norteamérika a bisa: “Meskos ku mayoria hende, mi a studia medisina pa yuda hende ku ta sufri di malesa. E speransa di un mundu sin malesa a atraé mi hopi. Mi a kuminsá asistí na e reunionnan di Testigunan di Yehova despues ku na universidat mi a sigui un lès di historia di sivilisashon oksidental. E lès ei a mustra ku religionnan tabata e kousa di kantidat di problema,  i den mi opinion nan tabata tambe hipókrita den e manera ku nan a usa Beibel. P’esei mi a puntra mi mes: ‘Kiko Beibel realmente ta bisa?’

Loke na promé instante a atraé mi na e Salòn di Reino di Testigunan di Yehova tabata e hendenan amabel, kendenan tabata un dushi kontraste ku hopi di mi konosínan. Un Testigu a aserká mi i a ofresé pa bishitá mi pa papia tokante Beibel. Loke a impreshoná mi tabata ku sin importá kiko mi a puntr’é, el a mustra mi e kontesta den Beibel.

Mas mi edat ta subi, mas mi ta apresiá ku mi ta un Testigu di Yehova. Ora bo kuminsá komo dòkter hóben, bo tin e speransa di logra algu ku ta bale la pena. Pero mas i mas mi ta topa personanan desilushoná ku ta sinti ku nan no a ègt logra masha kos den bida. Mi ta kere ku un di e kosnan mas maravioso di ta un Testigu di Yehova ta ku nos tin un speransa pa futuro i un propósito den bida. Sea ku nos ta dòkter, mekániko òf un hende ku ta hasi trabou di limpiesa, nos sa ku loke nos ta hasiendo den nos sirbishi na Dios ta algu ku ta bale la pena; nos ta hasiendo algu pa Yehova. I esei ta duna nos satisfakshon.”

“Dor di Apliká Prinsipionan Bíbliko Nos Bida di Famia A Drecha”

Dr. Krister Renvall ta un dòkter na Finlandia, i semper e ta gusta papia ku mucha. El a konta: “Un dia mi a papia ku un mucha muhé di 12 aña ku tabatin kanser terminal. El a duna mi un buki titulá Berdadero paz i siguridad—di ki fuente? * E mucha ei su ekspreshonnan di fe durante e fasenan final di su malesa a impreshoná mi, pero mi no a haña tempu pa lesa e buki. De echo, e tempu ei mi tabata asina drùk ku trabou na un klínika na Helsinki, ku esei a afektá mi famia.

Sin embargo, poko tempu despues mi esposa a saka e buki for di den rèki i a kuminsá les’é. El a keda konvensí mesora ku loke e tabata lesa ta e bèrdat. Un Testigu di Yehova a bishit’é i a kuminsá studia Beibel kuné. Na prinsipio mi esposa tabatin un poko miedu di bisa mi esei. Pero ora el a bisa mi, mi di: ‘Kualke kos ku por yuda nos famia ta bonbiní.’ Mi a kuminsá partisipá den e estudio. Dor di apliká prinsipionan bíbliko nos bida di famia a drecha i nos a haña un punto di bista nobo pa ku bida. Mi a keda enkantá di siña tokante e speransa di un mundu sin malesa; a parse mi lógiko ku Dios lo tin un propósito asina pa humanidat. Den poko tempu ami ku mi kasá a batisá, i finalmente henter e famia. E mucha chikí ku a papia ku mi pa promé bes a muri, pero de echo, su fe ta sigui biba.”

Den nos mundu ku ta kambiando rápidamente dòkternan tin mas i mas strès, lokual ta hasi nan sakrifisio pa yuda hende enfermo un kos realmente digno di elogio. Pero pronto nos lo eksperensiá e kambio di mas grandi ku nunka ku lo afektá humanidat. Hopi dòkter awe ku konfiansa ta spera ansiosamente riba e futuro ku e Palabra di Dios ta primintí: un mundu sin malesa! (Revelashon 21:1-4) Esaki ta un tópiko ku ta bale la pena pa nos investigá personalmente.

[Nota]

[Kuadro/Plachinan na página 10, 11]

“MI A REALISÁ KU BIDA TIN UN PROPÓSITO”

“Tempu ku mi tabata traha ku muchanan di skol ku desabilidat, mi a ripará ku e mayornan ku tabata Testigu di Yehova a destaká. Nan a parse mihó prepará pa dil ku un yu ku desabilidat ku otro mayornan den e mesun situashon. Tambe mi a ripará ku nan tabata mihó eduká di loke lo bo a spera di hende den nan ramo di trabou. Mi a atmirá nan fe. Dosentenan di e teoria di evolushon a kaba kasi kompletamente ku mi fe. No opstante, mi estudio di medisina a laga mi intrigá pa e prosesonan relashoná ku bida.

Na mesun tempu mi a kuminsá realisá ku mi no tabata sa kon pa lanta mi yunan. Kiko mi mester prohibí nan? Kiko mi mester animá nan pa hasi? Kiko lo mi por a duna nan komo un propósito den bida? Mi propio bida a pèrdè sentido. Mi a asta resa pa yudansa.

Ta e ora ei Testigunan di Yehova a trese un revista pa mi tokante kon pa korigí i disipliná mucha ku amor. Mi a haña ku e prinsipionan bíbliko ku e revista a splika tabata realmente práktiko, i p’esei mi a aseptá ora nan a ofresé mi un estudio di Beibel. Mi a siña dikon Yehova a krea bida i pakiko Hesus a muri, i mi a bin realisá ku bida tin un propósito. (Juan 3:16; Romanonan 5:12, 18, 19) Evolushon a bruha mi manera di pensa. Esta un alivio mi a sinti ora mi a siña ku malesa i morto no tabata parti di Dios su propósito original! Te awe mi ta haña berdadero satisfakshon den siña hende sinsero kon Dios pronto lo kura tur malesa.”

[Plachinan]

Helena Bouwhuis a traha komo dòkter pa muchanan di skol na Hulanda

[Plachinan na página 9]

E dòkter i eskritor bíbliko Lukas tabata Pablo su kompañero di biahe ora ku e apòstel a kura e tata di Publio i a resusitá Eutiko

[Plachinan na página 10]

Dr. Jon Schiller, Merka

[Plachinan na página 10]

Dr. Krister Renvall, Finlandia