Hóbennan Sa Puntra . . .

Kiko Mi Tin Ku Hasi Ora un Otro Mucha Ta Konta Mi Su Problemanan?

“E mucha muhé aki ta bai mi skol. Su mama i su tata ta den divorsio, i su puntonan a kuminsá baha. I normalmente e ta konta mi su problemanan di famia.”—Janèt, 14 aña di edat. *

“Un mucha muhé na mi skol a konta mi ku el a tene relashon seksual ku un mucha hòmber. I ora el a sali na estado, el a kometé aborto sin ku su mayornan sa mes.”—Mira, 15 aña di edat.

IMAGINÁ ku bo ta kòmbersando ku un amigu òf un kolega di skol. Diripiente e ta deshogá su mes i ta konta bo un problema. * Podisé e tin problema ku kosnan típiko pa teenager manera, paña, plaka, aparensia, pareunan òf su puntonan. Di otro banda, kisas e tin problema ku ta hopi mas serio i difísil.

E situashon na Merka ta mustra bon kla kon serio problemanan ku hóbennan ta konfrontá por ta. Segun e revista Newsweek, “Institutonan Nashonal di Salú Mental (NIMH) ta kalkulá ku 8 porshento di adolesente i 2 porshento di mucha (algun tin asta 4 aña) tin síntomanan di depreshon.” Un otro enkuesta a remarká: “Mas o ménos 97 mucha muhé di kada 1.000 entre 15 pa 19 aña di edat—un mion teenager merikano—ta sali na estado tur aña. Mayoria di nan—78 porshento—no ta sali na estado intenshonalmente.” Ademas tin miónes di hóben ku ta biba den un ambiente instabil na kas. Míles di nan ta víktima di abusu físiko òf seksual. Mas ku mitar di e studiantenan ku ta den nan último añanan di skol sekundario na Merka a yega di bebe burachi. Un kantidat alarmante di hóben tin iregularidat ku komementu.

P’esei anto, no ta nada straño ku hopi hóben tin mester di un persona pa nan papia kuné i konfia nan problemanan! I hopi bes e promé persona ku nan ta aserká ta un di nan pareunan. Kiko bo mester hasi si ta abo ta e pareu ku nan ta skohe? Si bo ta un kristian esaki sigur lo no ta un sorpresa pa bo. Segun e mandato di Beibel kristiannan mester ta “un ehèmpel” den nan kondukta i ser rasonabel. (1 Timoteo 4:12; Filipensenan 4:5, NW) P’esei, por ta masha bon ku otro hóbennan—inkluso esnan ku no ta Testigu di Yehova—ke konfia bo nan problemanan. Pero  kon abo tin ku trata ku un situashon asina? Kiko bo tin ku hasi si bo sinti ku loke el a bisa bo ta difísil pa bo trata kuné?

Sea un Bon Skuchadó

Beibel ta bisa ku tin “un tempu pa keda ketu i un tempu pa papia.” (Eklesiastés 3:7) Ora un persona tin un problema i e ke papia ku bo, hopi bes e mihó kos ku bo por hasi ta djis skucha. De echo, Beibel ta kondená un persona ku ta sera su orea pa “sklamashon di e pober.” (Proverbionan 21:13) Podisé a tuma bo kompañero hopi tempu promé ku el a haña e kurashi pa papia tokante e asuntu. E echo ku bo ta dispuesto pa skucha podisé ta hasi ku ta bira mas fásil p’e ekspresá su mes. Un hóben kristian ku yama Hiram a bisa: “Normalmente mi ta simplemente laga e otro persona papia. Mi ta lag’é bisa loke e tin riba su kurason, i mi ta purba mustra empatia p’e.” Di igual manera, Vincent a remarká: “Tin hende ku ke djis papia.”

Pues tin bes bo kompañero no ta ferwagt ku bo ta solushoná su problemanan. Podisé tur loke e tin mester ta un bon skuchadó. P’esei, skuch’é! Purba evitá di laga e ambiente rònt di bo desviá bo, òf di interumpié innesesariamente. E echo ku bo t’ei i ta skuch’é so por ta un gran yudansa p’e. Esaki ta mustra ku bo ta realmente interesá den dje.

Pero esaki ta nifiká ku bo no tin ku reakshoná mes, esta, no bisa nada-nada? Hopi ta dependé di e tipo di problema. Mayoria bes, un kontesta bon pensá i bondadoso ta apropiá. (Proverbionan 25:11) Por ehèmpel, si ta un konosí a hañ’é ku un tragedia personal, lo ta mihó pa mustr’é ku bo ta sinti p’e. (Romanonan 12:15) Proverbionan 12:25 ta bisa: “Ansha den kurason di hende ta hasié abatí, ma un bon palabra ta hasié kontentu.” Podisé loke e persona tin mester ta un poko animashon. Ekspresá bo konfiansa ku e persona lo por trata ku su problema ku éksito. Ekspreshonnan manera “Mi por komprondé dikon bo ta sinti asina” òf “Ta duel mi ku bo a haña bo den e situashon aki,” por laga bo kompañero sa ku bo ta sinsero i ku bo ke yud’é.

No opstante, Proverbionan 12:18 ta spièrta: “Tin hende ta papia sin pensa, manera hinká di spada.” Ta importante pa bo evitá komentarionan manera, “Ma e kos ei no ta nada,” òf “Ai, purba lubid’é,” òf “Bo no tin nodi sinti bo asina.” Ademas, tene kuidou pa bo no purba minimisá seriedat di un problema dor di hasi wega ku e asuntu. Fásilmente bo kompañero lo por yega n’e konklushon ku bo no ta respetá su sintimentunan.—Proverbionan 25:20.

Pero kiko si bo no sa kiko pa bisa? Djis sea onesto. Bisa bo amigu ku ounke realmente bo no sa kiko pa bisa, bo ta kuné i ku bo ke yud’é. Puntr’é: “Kiko mi por hasi pa yuda bo?” Sí, podisé tin algun kosnan útil ku bo por hasi pa aliviá su karga.—Galationan 6:2.

Duna Konseho Amigabel

Kiko si bo ta haña ku bo kompañero tin mester di konseho? Klaru ku komo un persona hóben, bo no tin masha eksperensia. (Proverbionan 1:4) P’esei podisé bo no ta kualifiká pa duna konseho riba tur problema. Sin embargo, Salmo 19:7 den e Tradukshon di Mundu Nobo ta bisa: “E rekordatorio di Yehova ta digno di konfiansa, e ta hasi hende sin eksperensia sabí.” Sí, ounke bo ta “sin eksperensia” bo por tin sufisiente konosementu di prinsipionan bíbliko pa yuda un kompañero ku tin mester di yudansa. (Proverbionan 27:9) Sin ku bo ta dun’é konseho na un manera iritante òf dominante, pakiko no kompartí algun punto for di Beibel kuné? Si bo no sa sigur kua prinsipio bíbliko ta aplikabel den su kaso, hasi un poko investigashon. Atraves di añanan e rúbrika “Hóbennan Sa Puntra . . . ,” den e revista aki a publiká hopi konseho bíbliko riba un variedat di tópiko. Un otro fuente balioso di informashon ta e buki Loke hovenan sa puntra—Contesta práctica. *

 Podisé bo por logra bon resultado dor di relatá bo propio eksperensianan. Kisas bo por tin asta algun sugerensia práktiko. Sin imponé bo propio punto di bista riba dje, bo por splik’é kiko a yuda bo. (Proverbionan 27:17) Pero kòrda sí ku kada situashon ta diferente. Loke a funshoná den bo kaso kisas no ta funshoná pa tur hende.

Palabranan di Koutela

No dediká demasiado tempu na problemanan di hóbennan ku no ta teme Yehova òf ku no ta respetá normanan kristian. Hopi di nan problemanan kisas ta resultado di nan estilo di bida ku no ta na armonia ku Beibel. Intentonan pa yuda un persona ku ta menospresiá konseho di Beibel, por resultá den frustrashon pa bo i e persona. (Proverbionan 9:7) Tambe bo por haña bo ta tende un kantidat di bobedat òf asta palabranan opseno. (Efesionan 5:3) Pues si un kòmbersashon ta laga bo sinti bo inkómodo, tuma kurashi i bisa e persona ku bo no por yud’é solushoná su problema òf ku bo ta sinti bo inkómodo ku e tópiko ei.

Tene kuidou ora un miembro di e sekso opuesto ta buska manera pa kompartí su sintimentunan íntimo ku bo. Beibel ta spièrta ku e kurason por ta engañoso òf traishonero. (Jeremias 17:9) Asosiashon estrecho por lanta sintimentunan romántiko i por hiba asta na inmoralidat seksual.

Ademas, no kai den e trampa di primintí ku lo bo no bisa niun hende. Sea modesto i rekonosé ku kisas e persona ku ta papia ku bo tin mester di mas yudansa ku abo lo por duna.—Proverbionan 11:2, NW.

Ora Yudansa di Otronan Ta Nesesario

Den hopi kaso e mihó kos ku abo por hasi ta buska yudansa di otronan pa bo por yuda e persona. Mira, e mucha muhé ku nos a sita na prinsipio, a bisa: “Ègt mi no tabata sa kon pa yuda mi kolega di skol. P’esei mi a papia ku un ansiano di kongregashon tokante e asuntu, i el a duna mi algun bon konseho pa mi por a yud’é.” Sí, den e kongregashon kristian di Testigunan di Yehova, tin hòmbernan eksperensiá ku por yuda bo. (Efesionan 4:11, 12) E ansianonan a sugerí Mira pa animá su kolega di skol pa papia ku su mayornan. E mucha muhé a sigui Mira su konseho. Mira a bisa: “Su situashon a mehorá. Awor e ke sa mas di Beibel.”

Awor kiko si un kompañero kristian konta bo algu konfidensial? Klaru ku lo bo ke hasi tur loke ta rasonabel pa yud’é. (Galationan 6:10) Si bo ta teme ku e ta desviando for di e normanan moral di Yehova, no tene miedu di “papia bèrdat” kuné. (Efesionan 4:25) Sea onesto, pero no hustu den bo mes bista. E echo ku bo ta dispuesto pa papia frankamente kuné ta un señal ku bo ta un berdadero amigu.—Salmo 141:5; Proverbionan 27:6.

Den un situashon asina, ta masha importante pa bo animá bo amigu pa buska yudansa, serka su mayornan, un ansiano òf un kristian maduro ku e ta respetá. Si un periodo di tempu rasonabel a pasa i e no a papia ku ningun hende, abo lo tin ku papia ku un otro persona p’e. (Santiago 5:13-15) Pa bo hasi esei lo bo tin mester di kurashi, pero esaki ta mustra ku bo realmente ta interesá den dje i ku bo ke lo mihó p’e.

Klaru ku Yehova no ta ferwagt ku bo tin ku solushoná problema di tur hende. Pero ora un persona konfia bo su problemanan, bo no tin nodi sinti bo inútil. Apliká loke bo a siña komo kristian, i duna prueba ku bo ta un berdadero “amigu.”—Proverbionan 17:17.

[Nota]

[Plachi na página 23]

Den algun kaso kisas bo tin ku buska yudansa pa un amiga ku ta den problema