El A Siña Esei for di Spièrta!

PERLA, un hobensita di ocho aña, ta den klas dos na Veracruz, Mexico. Un dia su yùfrou a puntra ken sa kon largu un bayena ta. Na promé instante ningun mucha no a kontestá. E ora ei Perla a hisa man i a bisa: “Un bayena por bira 14 meter largu i pisa 16 tòn.”

Sorprendí, e yùfrou a puntr’é: “Unda bo a siña esei?”

“For di e revista Spièrta!,” Perla a kontestá. “Si yùfrou ke mi por mustra yùfrou.” Normalmente Perla tin edishonnan resien di Spièrta! den su tas di skol pa kompartí ku otro hende. Pa kasualidat e tabatin e edishon di 8 di sèptèmber 2003 (na spañó), ku tabatin e artíkulo “Nos Enkuentro Memorabel ku Bayena Shinishi.”

Perla su yùfrou gustosamente a aseptá un ehemplar di e revista. No solamente el a les’é sino ku e kier a keda kuné tambe. Algun alumno tambe tabata ke un ehemplar, pues Perla a buska e revista pa nuebe di nan. Perla a haña hopi elogio di su yùfrou, i awor e ta hiba e revista Spièrta! kada dos siman p’e.

Djis despues di e eksperensia aki, Perla a asistí na un kongreso di distrito di Testigunan di Yehova. Promé ku Perla a bai, su yùfrou a bis’é ku lo e keda kontentu si e trese un regalo for di e kongreso p’e. Pues Perla a hiba e buki Siña for di e Gran Maestro p’e, un buki ku a keda presentá e zomer ei.

Mas despues e yùfrou a bisa algun di su alumnonan: “Perla ta un bon ehèmpel, pasobra e no ta interesá solamente den su bukinan di skol, sino tambe ta studia otro informashon útil i asta ta kompartié ku nos.”