For di Nos Lektornan

Mucha Desfigurá E eksperensia di Mailyn a konmové mi mashá. (“Un Kara Nobo pa Mailyn,” 8 di yüni 2004) Ora mi a lesa kon e mucha di 11 aña aki ta lucha ku un malesa teribel, i apesar di esei ta papia ku otro hende tokante su speransa basá riba Beibel, esaki a animá mi.

M. B., Italia

E manera positivo ku Mailyn i su famia ta mira kosnan tabata un gran animashon pa mi. Den e mundu djawe, medionan di komunikashon ta pone demasiado énfasis riba aparensia personal. Esaki por ta desanimante. Mi ke pa Mailyn sa ku pa mi su berdadero bunitesa ta masha bisto. Mi ta spera ku lo mi tin e oportunidat pa alegrá huntu kuné ora Yehova dun’é un kara nobo den Su mundu nobo. Mailyn su fe a hasi mi mas fuerte.

M. S., Merka

Djis akí mi tin ku hasi un operashon pa kita un pechu. Ora malesa afektá bo aparensia, bo mester tin fortalesa i kurashi pa bo no bira deprimí. Mailyn su kurashi i optimismo a fortalesé mi. Mi ke bisa Mailyn esaki: Mi ta deseá bo tur kos bon. Ami ta haña bo masha bunita!

G. R., Fransia

Mi a nase ku un desabilidat físiko ku ta konosí komo hazelip. Hopi bes e muchanan na skol tabata keda wak mi straño. Tin di nan asta tabata skupi mi. Mi ta kere ku loke a yuda mi haña kurashi i konfiansa den mi mes ta e instrukshon basá riba Beibel ku mi mama a duna mi. Pero te ku awor ku mi tin 31 aña, ainda mi ta sinti mi malu ku mi aparensia. P’esei e eksperensia di Mailyn a konmové mi mashá. Mi sa ku ta ku e yudansa di Yehova nos por vense kualke otro difikultat ku nos lo haña nos kuné.

T. S., Hapon

Mailyn a konvensé mi ku felisidat i kontentamentu no ta dependé di aparensia físiko. E úniko manera pa haña felisidat i satisfakshon ta dor di sirbi i stima nos Dios. Mailyn su ehèmpel tabata un estímulo pa mi.

A. T., Filipina

Maltrato Durante Enamorashon Mi a keda masha gradisidu pa e artíkulo “Hóbennan Sa Puntra . . . Dikon E Ta Trata Mi Asina Malu?” (8 di yüni 2004) Mi tabatin un frei ku tabata abusá di mi. Ki ora ku un kos a bai robes, e tabata bisa ku ta mi falta. Dor ku mi a lanta den un famia ku tabatin violensia i insulto, mi a kere ku su komportashon tabata algu normal. Awor mi ta kontentu ku mi a terminá e relashon ei; mi eks-frei a demostrá ku lo e no por ta un bon kasá.

Anónimo, Belize

E artíkulo a ekspresá mi sintimentunan. Promé i durante mi matrimonio, mi a pasa den e tipo di situashonnan ku boso a deskribí. E violensia sikológiko ku mi a eksperensiá a kaba ku mi rèspèt propio. Mi ta spera ku e artíkulo ta motivá hopi hende pa analisá nan relashon durante enamorashon. Ta masha sabí pa siña konosé otro bon promé ku kasamentu, pa asina evitá e problemanan ei.

M. M., Alemania

Fe bou di Prueba Mi a disfrutá di e artíkulo “E Fe di un Famia Ta Pasa den Prueba.” (8 di mei 2004) Mi tin dies aña di edat i mi tin inflamashon di tripa, e asina yamá enfermedat di Crohn. Mayoria parti di último wenter mi a keda drenta hospital sali, te ora ku finalmente dòkternan a diagnostiká mi malesa. E artíkulo aki realmente a yuda mi haña mas konfiansa i tambe kurashi pa trata ku mi malesa. Mi ta anhelá e dia ku mi por biba den Paradeis, kaminda nos lo no tin e problemanan aki mas.

M. H., Merka