Mama Su Papel Onorabel

MAMA su papel hopi biaha ta ser balotá i asta menospresiá. Un par di dékada pasá, hende a kuminsá rebahá e papel di kuida yu. Nan punto di bista tabata ku esei ta ménos importante ku un karera i ta asta un forma di opreshon. Ounke mayoria hende lo haña e aktitut ei ekstremo, tòg por lo general hende ta laga mamanan sinti ku ser un ama di kas i kuida yu ta un okupashon inferior. Tin hende ta asta haña ku un muhé mester tin un karera pafó di kas pa e por realisá su pleno potensial.

Sin embargo, hopi esposo i yu a siña apresiá e papel di mama den famia. Carlo, kende ta sirbi na e sukursal di Testigunan di Yehova na Filipina, a splika: “Mi ta akinan awe debí na e edukashon ku mi mama a duna mi. Mi tata tabata un persona hopi estrikto i a kastigá bo mesora, pero Mama a yuda nos dor di splika i rasoná riba asuntunan. Mi ta ègt apresiá su manera di siña nos.”

Peter, na Suráfrika, ta bin di un famia di seis yu. Nan a ser kriá dor di un mama ku tabatin un edukashon limitá. Nan tata a bandoná e famia. Peter ta kòrda: “Komo kriá di kas i hasiendo trabou di limpiesa, Mama no a gana mashá. Tabata difísil pa e paga skol pa nos tur. Hopi bes nos tabata bai drumi ku hamber. Djis paga pa e dak riba nos kabes tabata un reto. Apesar di tur e difikultatnan aki, Mama nunka no a entregá. El a siña nos pa nunka kompará nos mes ku otro hende. Si no tabata pa su  dedikashon ku kurashi, nunka nos lo tabatin e éksito ku nos a logra den bida.”

Un esposo nigeriano, Ahmed, a ekspresá kiko e ta pensa di e yudansa ku su esposa a dun’é den kria nan yunan: “Mi ta apresiá e papel di mi esposa. Ora mi no ta na kas, mi tin e konfiansa ku e muchanan ta bon kuidá. En bes di sinti ku mi kasá ta kompetí ku mi, mi ta gradisié i mi ta laga e muchanan sa ku nan tin ku respet’é meskos ku nan ta respetá mi.”

Un hòmber palestino ta kla pa elogiá su esposa su éksito komo mama: “Lina a logra hopi ku nos yu muhé i ta kontribuí mashá na e spiritualidat di nos famia. Na mi opinion, su éksito ta debí na su kreensianan religioso.” Lina ta un Testigu di Yehova i ta sigui prinsipionan bíbliko ora e ta eduká su yu muhé.

Kua ta algun di e prinsipionan aki? Kiko nos por bisa di e manera ku Beibel ta mira mama? Kon mamanan den pasado a haña un posishon di dignidat i rèspèt komo edukadó di nan yunan?

Un Punto di Bista Balansá di Mama

Ora Dios a krea hende muhé el a asign’é un papel onorabel den e areglo di famia. E promé buki di Beibel ta bisa: “SEÑOR Dios a bisa: ‘No ta bon pa e hòmber ta so; lo mi traha un yudadó p’e ku ta pas kuné.’” (Génesis 2:18) Pues Dios a perkurá e promé muhé, Eva, komo e parti pa komplementá Adam. Eva tabata pas perfektamente komo un  ayudante p’e. E tabata parti di Dios su propósito pa nan produsí yu i kuida nan i tambe kuida e tera i su bestianan. E lo mester a perkurá e estímulo intelektual i e sosten di un berdadero kompañera. Adam tabata hopi felis ku e bunita regalo aki ku el a haña di e Kreadó.—Génesis 1:26-28; 2:23

Mas despues, Dios a duna instrukshon enkuanto kon mester trata hende muhé. Por ehèmpel, mester a mustra onor na mamanan israelita i no tabatin mag di trata nan ku despresio. Si un yu hòmber a “maldishoná su tata òf su mama,” lo el a risibí kastigu di morto. Anto Beibel a urgi hóbennan kristian pa “obedesé [nan] mayornan.”—Levítiko 19:3; 20:9; Efesionan 6:1; Deuteronomio 5:16; 27:16; Proverbionan 30:17.

Bou di guia di e esposo, e mama mester tabata e edukadó di tantu yu muhé komo yu hòmber. Un yu hòmber a haña e òrdu pa ‘no bandoná e siñansa di su mama.’ (Proverbionan 6:20) Ademas, Proverbionan kapítulo 31 ta duna “e mensahe di peso ku [Rei Lemuel] su mama a dun’é komo korekshon.” Sabiamente el a instruí su yu hòmber pa evitá mal uso di bebida alkohóliko, bisando: “No ta pas pa reinan bebe biña, ni pa alto funshonarionan bisa: ‘Unda tin bebida intoksikante?,’ pa e no bebe i lubidá loke ta dekretá i trose e kaso di kualke di e yunan di aflikshon.”—Proverbionan 31:1, 4, 5, NW.

Ademas, lo ta sabí pa tur yònkuman ku ta pensando riba matrimonio pa konsiderá e deskripshon ku e mama di Rei Lemuel a duna di “un muhé birtuoso” òf “un esposa kapas”[NW]. El a bisa: “E bal muchu mas ku rubí.” Anto despues di deskribí e kontribushon importante ku un esposa asina ta hasi na un famia, e mama di e rei a bisa: “Ser atraktivo ta engañoso i bunitesa ta banidat, ma un muhé ku ta teme SEÑOR, esei lo wòrdu elogiá.” (Proverbionan 31:10-31) Klaramente anto, nos Kreadó a traha hende muhé pa nan okupá un puesto di onor i responsabilidat den e famia.

Den e kongregashon kristian tambe esposa- i mamanan ta ser onrá i apresiá. Efesionan 5:25 ta bisa: “Esposonan, stima boso esposa.” E yònkuman Timoteo, kende su mama i wela a siñ’é for di chikí pa respetá “e skrituranan santu,” a risibí e siguiente konseho inspirá: ‘Trata e muhénan mas bieu manera mama.’ (2 Timoteo 3:15; 1 Timoteo 5:1, 2) Pues, un hòmber mester respetá un hende muhé mas grandi komo si fuera e tabata su mama. Dios realmente ta duna balor na hende muhé i ta otorgá nan un posishon digno.

Ekspresá Bo Apresio

Un hòmber ku a lanta den un kultura kaminda hende muhé ta ser konsiderá komo inferior a konta: “Mi a risibí un edukashon ku a drei rònt di hende hòmber, i mi a opservá e maltrato di hende muhé i un falta di rèspèt pa nan. Pues mi tabatin un lucha pa mira hende muhé manera e Kreadó ta mira nan: komo un komplemento—òf kompañera i ayudante—den e hogar i komo parti di un tim den dunamentu di edukashon na e yunan. Ounke ta difísil pa mi ekspresá palabranan di elogio na mi esposa, mi ta rekonosé ku e bon kosnan ku tin den mi yunan ta debí na su trabou.”

Sí, mamanan ku ta asumí nan responsabilidat komo edukadó por sinti nan mes orguyoso di nan papel. E ta un karera digno. Ku tur derecho nan ta meresé elogio i ekspreshonnan sinsero di apresio. Tin asina hopi kos ku nos ta siña for di mama, por ehèmpel, bon kustumbernan ku ta yuda nos durante henter nos bida, bon manera ku ta asina importante pa bon relashon, i den hopi kaso un edukashon moral i spiritual ku ta tene hóbennan den bon kaminda. Abo resientemente a ekspresá apresio na bo mama pa loke el a hasi pa bo?

[Plachi na página 9]

Peter su mama a siñ’é pa no entregá

[Plachi na página 10]

Ahmed ta masha gradisidu p’e yudansa di su esposa den lanta nan yunan

[Plachi na página 10]

E esposo di Lina ta atribuí e bon komportashon di nan yu muhé na e kreensianan religioso di Lina