Mamanan Ta Enfrentá e Retonan ku Éksito

UN DI e retonan prinsipal ku hopi mama ta konfrontá awe ta ku nan mester traha pa yuda perkurá finansieramente pa nan famia. Ademas, pa un motibu òf otro, tin di nan tambe tin ku kria nan yunan nan so.

Margarita ta un mama soltero na Mexico ku ta lantando dos yu su so. “Tabata difísil pa eduká nan den sentido moral i spiritual,” el a remarká. “Un biaha mi yu hòmber adolesente a sali fiesta bin kas mitar burachi. Mi a spièrt’é ku si esei bolbe sosodé, lo mi no lag’é drenta den kas. Pues, e siguiente biaha ku esei a sosodé mi a ser’é pafó, ounke ku hopi doló na mi kurason. Afortunadamente, e no a bebe burachi mas.”

Poko despues, Margarita a kuminsá studia Beibel, i esei a yud’é inkulká norma i balor moral den su yunan. Awor ámbos yu ta predikadó di tempu kompletu komo Testigu di Yehova.

Ora e Esposo Ta den Eksterior

Hopi esposo den paisnan ménos desaroyá ta muda pa paisnan mas próspero en buska di trabou, lagando nan kasá atras pa kria e muchanan. Laxmi, un mama na Népal, a bisa: “Mi kasá tin shete aña den eksterior. E muchanan ta obedesé nan tata mas lihé ku ami. Si e tabata akinan riba un base regular pa hiba delantera, lo tabata mas fásil.”

Apesar di e difikultatnan, Laxmi ta trata ku e reto ku éksito. Komo ku e no tin hopi skol, el a hasi areglo pa otro hende yuda su yunan mas grandi ku nan hùiswèrk. Sin embargo, e ta presta atenshon spesial na nan edukashon spiritual dor di tene un estudio di Beibel semanal ku nan. Tambe e ta konsiderá un teksto di Beibel tur dia ku nan i regularmente e ta bai reunionnan kristian ku nan.

 Mamanan ku Edukashon Limitá

Un otro reto den algun pais ta e porsentahe relativamente haltu di analfabetismo bou di hende muhé. Dunando un ehèmpel di e desbentaha di ta un mama sin edukashon, Aurelia, na Mexico, un mama di seis yu a splika: “Mi mama semper tabata bisa ku hende muhé no ta supose di ta eduká. P’esei nunka mi no a siña lesa ni mi no por a yuda mi yunan ku nan hùiswèrk. Esei tabata doloroso. Pero komo ku mi no tabata ke pa nan sufri manera ami a sufri, mi a traha duru pa nan sí haña un edukashon.”

Asta ku un edukashon limitá, un mama por tin un gran influensia. E dicho aki ta sierto: “Eduká hende muhé i bo ta eduká e maestranan di hende hòmber.” Na Népal, Bishnu, mama di tres yu hòmber, tabata ántes un analfabeta. Pero su deseo pa siña bèrdatnan bíbliko i siña esei na su yunan, a motiv’é pa hasi berdadero esfuerso pa siña lesa i skirbi. El a sòru pa su yunan hasi nan hùiswèrk, i regularmente e tabata bai skol pa papia ku nan dosentenan tokante nan hùiswèrk.

Pa loke ta nan edukashon spiritual i moral, Bishnu su yu hòmber Silash a splika: “E kos ku mas mi tabata gusta di mi mama su esfuerso pa eduká nos tabata ku si nos a kometé un eror, e tabata duna nos ehèmpelnan bíbliko pa korigí nos. E método aki di duna edukashon tabata efektivo i a yuda mi aseptá e konseho.” Bishnu tabatin éksito den eduká su yu hòmbernan, i nan tur tres ta yònkumannan temeroso di Dios.

Antonia, kende ta biba na Mexico, ta un mama ku ta kriando dos yu. El a bisa: “Mi a kaba skol básiko so. Nos tabata biba den un pueblito isolá, i e skol sekundario di mas serka tabata hopi leu. Pero mi tabata ke pa mi yunan haña mas edukashon ku loke ami a haña, p’esei mi a dediká hopi tempu na nan. Mi a siña nan e álfabèt i tambe kon pa konta. Mi yu muhé por a spèl su nòmber i skirbi tur e lèternan di álfabèt promé ku el a kuminsá bai skol. Pa ora mi yu hòmber a bai kleuterschool ya e por a lesa bon kaba.”

Riba e pregunta kiko el a hasi pa duna nan un edukashon spiritual i moral, Antonia a splika: “Mi a siña nan relatonan di Beibel. Promé ku mi yu muhé por a papia, e por a konta relatonan di Beibel dor di usa gesto. Mi yu hòmber a duna su promé parti di lesamentu públiko di Beibel na nos reunionnan kristian na edat di kuater aña.” Hopi mama ku edukashon limitá ta trata ku éksito ku e reto di ser edukadó.

Resistiendo Kustumbernan Perhudisial

Un kustumber bou di e pueblo tzotzil di Mexico ta ku nan ta bende nan yu muhénan den matrimonio na edat di 12 òf 13 aña. Hopi bes nan ta bende e mucha ku hòmbernan hopi mas bieu ku ke un di dos òf di tres kasá. Si e hòmber no ta satisfecho ku e mucha, e por debolb’é i haña su plaka bèk. Petrona a konfrontá e kustumber aki na mucha. Su mama a ser bendé pa bira esposa di un hòmber, el a haña un yu i a divorsiá, tur esaki pa ora e mama tabatin  13 aña! E promé yu ei a muri, i nan a bende e mama di Petrona dos biaha mas despues di esei. Na tur, e mama a duna lus na ocho yu.

Petrona no kier tabatin un bida asina i el a splika kon el a logra evitá esei: “Ora mi a kaba skol básiko, mi a bisa Mama ku mi no kier a kasa pero ku mi kier a sigui bai skol. Mama a bisa mi ku e no por a hasi nada al respekto i ku lo mi tin ku papia ku mi tata.”

Tata a bisa mi: “Mi ta bai kasa bo. Bo por papia spañó. Bo por lesa. Kiko mas bo ke? Si ta skol bo ke bai, bo mes lo tin ku paga p’e.”

Petrona a splika: “Pues, esei ta loke mi a hasi. Mi tabata bòrda tela pa haña plaka pa kubri mi gastunan.” Asina el a evitá ku nan a bend’é. Despues ku Petrona a bira grandi, su mama a kuminsá studia Beibel, i esei a duna e mama e kurashi pa inkulká normanan basá riba Beibel den e ruman muhénan chikí di Petrona. E mama por a siña nan di su propio eksperensia kiko ta e resultadonan tristu di e kustumber di bende mucha muhé yòn den matrimonio.

Un otro kustumber entre hopi pueblo ta ku tatanan so mag disipliná e yu hòmbernan den famia. Petrona a splika: “Hende muhé tzotzil ta ser siñá ku nan ta inferior na hende hòmber. E hòmbernan ta masha dominante. Mucha hòmber chikí ta imitá nan tata, i nan ta bisa nan mama: ‘Bo no tin nada di bisa mi. Si mi tata no bisa mi hasié, mi no ta hasié.’ Pues, mamanan no por eduká nan yu hòmbernan. Pero awor ku mi mama a studia Beibel, e tabatin éksito den instruí mi ruman hòmbernan. Nan a siña Efesionan 6:1 i 2 for di kabes: ‘Yunan,  obedesé boso mayornan. . . . Onra bo tata i bo mama.’”

Mary, un mama na Nigeria, tambe a komentá: “Kaminda ami a lanta, e kultura di e pueblo no ta permití un mama siña ni disipliná su yu hòmbernan. Pero siguiendo e ehèmpel bíbliko di Loida i Eunise—e wela i mama di Timoteo—mi tabata desididu pa no permití kustumbernan lokal stroba mi di siña mi yunan.”—2 Timoteo 1:5.

Un otro kustumber mas ku ta hopi praktiká den algun pais ta loke tin hende ta yama “sirkunsishon femenino,” pero ku awor por lo general nan ta yama mutilashon genital femenino (MGF). Ta un operashon ku ta kita parti òf mayoria di e órgano genital eksterno di un mucha muhé. Waris Dirie, un modelo bon konosí i embahadora spesial di e Fondo di Poblashon di Nashonnan Uní, ta e persona ku a duna publisidat na e kustumber aki. Na armonia ku kustumber lokal di Somalia, Waris su mama a somet’é na mucha na MGF. Segun un informe, entre ocho pa dies mion hende muhé i mucha muhé na Medio Oriente i Afrika ta kore e riesgo di eksperensiá MGF. Asta na Merka, segun kálkulo, tin 10.000 mucha muhé ta na peliger.

Ki kreensia ta e base pa e práktika aki? Tin hende ta pensa ku e órganonan genital femenino ta pekaminoso i ku nan ta hasi un mucha muhé impuru i pues ta bira imposibel pa kas’é. Ademas, nan ta kere ku dor di kòrta òf kita e órganonan genital, esei ta un garantia di e mucha su virginidat i fieldat. Si e mama no kumpli ku e kustumber aki, esei por pone su kasá i e komunidat lokal rabia pisá kuné.

Sin embargo, hopi mama a bin realisá ku no tin ningun motibu legítimo—religioso, médiko ni higiéniko—pa apoyá e práktika doloroso aki. E dokumentario nigeriano Repudiating Repugnant Customs (Repudiá Kustumbernan Repugnante) ta revelá ku hopi mama ku kurashi a nenga di someté nan yu muhénan na e práktika aki.

Sí, mamanan rònt mundu ku éksito ta protehá i eduká nan yunan apesar di hopi reto. Nan esfuersonan ta ser realmente apresiá?

[Kuadro/Plachi na página 5]

“Estudio tras di estudio a demostrá ku no tin ningun strategia di desaroyo efektivo den kua hende muhé no ta hunga un papel sentral. Ora hende muhé ta plenamente enbolbí, e benefisionan ta bira bisto inmediatamente: famianan ta mas salú i mihó alimentá; nan entrada, sèn di spar i reinvershon ta oumentá. I loke ta konta pa famianan ta konta tambe pa komunidatnan i, a largu plaso, pa paisnan kompletu.”—Sekretario General di Nashonnan Uní Kofi Annan, 8 di mart 2003.

[Rekonosementu]

UN/DPI photo by Milton Grant

[Kuadro/Plachinan na página 8]

El A Hasi Sakrifisio pa Nos

Juliano, un yònkuman di Brazil, a bisa: “Ora mi tabatin sinku aña, mi mama tabatin un karera prometedor. Pero ora mi ruman muhé a nase, el a disidí di bandoná su trabou p’e por a kuida nos. Konseheronan na trabou a purba konvens’é pa no kita. Nan a bis’é ku despues ku su yunan kasa i bai for di kas, tur loke el a hasi pa nan lo a bai pèrdí, i ku bon mirá, e tabata invertí den algu ku lo no a dun’é ningun ganashi. Pero mi por bisa ku nan tabata ekiboká. Nunka lo mi lubidá su demostrashon di amor.”

[Plachinan]

Juliano su mama pará huntu ku su yunan; na man robes: Juliano na edat di sinku aña

[Plachinan na página 6]

Bishnu a siña lesa i skirbi i despues a yuda su yu hòmbernan haña un bon edukashon

[Plachinan na página 7]

Antonia su yu hòmber chikí ta duna partinan di lesamentu di Beibel na reunionnan kristian

[Plachinan na página 7]

Petrona ta un boluntario na e sukursal di Mexico di Testigunan di Yehova. Su mama, kende ku tempu a bira Testigu, ta siñando Petrona su rumannan chikí

[Plachi na página 8]

Waris Dirie ta un konosido bosero kontra mutilashon genital femenino

[Rekonosementu]

Photo by Sean Gallup/ Getty Images