Museonan—Dikon Nan Ta Bal un Bishita?

WASHINGTON, D.C., e kapital di Merka, ta hala masha hopi turista. * Kiko ta atraé nan einan? Un di e atrakshonnan prinsipal ta Kas Blanku, e residensia ofisial di e presidente na Pennsylvania Avenue Num. 1600. E monumento históriko aki ta hala mas ku un mion i mei bishitante tur aña. Nan tin mag di kana pasa dor di sierto salanan ku ta dekorá na estilo di diferente periodo di historia. E salanan ta mueblá ku muebelnan balioso di antik i tambe ku porselana i bestèk di antik.

Un otro edifisio impreshonante ta Kapitolio, e sede gubernamental di e pais aki di kasi 300 mion habitante. Segun ku bo ta kana dor di e salanan i gangnan di Kapitolio, lo bo mira estatua di lidernan famoso di pasado. Si bo ta alerta, lo bo por asta mira tambe un òf otro senador famoso kana pasa. Pero no ta tur turista ta bin Washington pa mira e edifisionan aki. Hopi di nan ta ser atraí na e sentronan di kultura ku tin den e stat aki: e museonan i galerianan di arte.

Tin asina tantu museo i galeria den Washington, D.C., ku lo ta imposibel pa trata nan tur, i pa bo bishitá nan tur bo mester keda pa un bishita hopi largu na Washington. Laga nos wak kuantu nos por eksplorá durante un bishita di djis un par di dia.

Un Museo di Museonan

Sin ningun duda, e sentro ku mas ta interesá bishitantenan ta e Instituto Smithsonian. Dikon? Pasobra e no ta simplemente ún museo; e ta henter un kolekshon di museo i di sentronan di konosementu. E Kastel Smithsonian ta fásil pa identifiká riba e Paseo Nashonal (òf National Mall, esaki ta un koredor di yerba di un kilometer i mei ku tin Kapitolio na un punta i e Monumento di Washington na e otro punta). E kastel ta e edifisio kolorido trahá di piedra di santu kòrá ku ta resaltá na banda robes di e famoso  koredor ora bo ta kara pa e obelisko di e Monumento di Washington.

Kua ta e lugá mas popular di e kompleho Smithsonian? Den nos era di siensia, esei ta e Museo Nashonal di Aire i Espasio, ku segun un buki di guia turístiko, “ta e museo mas bishitá na mundu.” Dikon e ta asina popular? E tin 23 galeria ekstenso, i su eksibishonnan, di kua hopi ta kologá for di plafòn, ta ilustrá e historia eksitante di bulamentu. E inmenso galeria Echonan Memorabel di Bulamentu ta asta show e avion di motor Flyer, ku ta e avion ku Orville Wright a usa pa su biahe históriko na Kitty Hawk, Nort Carolina, na 1903. Djis pegá tin e avion di Charles Lindbergh, Spirit of St. Louis, ku el a laga traha spesialmente p’e por a gana e premio pa e promé vuelo solo ku a krusa Oséano Atlántiko na 1927. I klaru ku tin eksibishonnan moderno di navenan espasial ku a marka historia i tambe di barankanan ku hende a bin kuné for di luna.

Ta Plaka Ta Atraé Bo?

Djis zùit di e koredor, i na un distansia ku bo por kana for di e Monumento pa Konmemorá Washington, tin un edifisio ku ta hala míles di siudadano kurioso, kendenan probablemente ta kana ku muestranan di e produkto ku ta sali for di e lugá aki: sèn di papel! Ta e Kas di Moneda. E tour di 40 minüt ta mustra e proseso di graba i imprimí ku ta nesesario pa traha e biyetenan di dòler ku hende ta usa den nan transakshonnan diario. Pa aña, nan ta imprimí sèn di papel ku ta bal mas ku 140 mil mion dòler! Akaso e papel spesial ku nan ta usa ta un sekreto di Estado? Pa kuantu tempu un biyete di dòler ta keda den sirkulashon? Ki pasonan nan ta tuma pa kontrarestá e trahamentu di plaka falsu? Tur e preguntanan aki i hopi mas ta ser kontestá durante e tour aki.

Banda di e Kas di Moneda tin un edifisio úniko ku a habri na 1993, i ku ta atraé bishitante for di rònt mundu. Ta e Museo Merikano pa Konmemorá Holokousto, un lugá ku ta pone bo para pensa.

Un Museo pa Konmemorá Asesinato Masal i Sobrebibensia

E nòmber Holokousto ta bin di un palabra griego usá den Beibel ku ta nifiká un ofrenda  kimá kompletu. (Hebreonan 10:6) Sin embargo, relashoná ku e museo aki, “Holokousto ta referí na e persekushon i destrukshon sistemátiko ku estado a patrosiná di hudiunan europeo na man di Alemania nazi i su kolaboradónan entre 1933 i 1945.” Hudiunan tabata e víktimanan prinsipal, pero e strategia di Estado tabata tambe pa purba eliminá e dos tribunan gitano roma i sinti, hendenan desabilitá, polakonan, prezunan soviétiko di guera, homoseksualnan, Testigunan di Yehova i disidentenan polítiko.

E promé impreshon ku bo ta haña ora bo kana drenta den e edifisio no ta di un kaluroso bonbiní. Kamponan di konsentrashon nazi tabata diseñá pa intimidá hende. E museo ta reflehá e sintimentu ei. Loke bo ta mira rònt di bo ta un struktura masha haltu mes, menasante, impersonal, trahá di stal i blòki manera un fábrika. For di e Sala di Testimonio na e promé piso, bo por hisa kara wak e dak di stal i glas ku tin riba e di tres piso. E bista dor di e dak, segun e deskripshon den un foyeto ofisial, “ta trosí, deformá i poní na un ángulo straño.” E arkitekto su intenshon tabata pa krea un ambiente den kua e bishitante ta sinti ku “tin algu robes akinan.”

E museo tin sinku piso, pero e área prinsipal pa públiko haña tour ta di piso kuater pa piso dos, i nan ta sugerí bo pa kuminsá bo tour na piso kuater. Bo ta hasi e tour riba bo mes i e por dura dos pa tres ora. Debí na e plachinan detayá di e persekushon i asesinato di e víktimanan, ta ser rekomendá pa no laga mucha bou di 11 aña bishitá e Eksibishon Permanente. Na promé piso tin un eksibishon separá pa mucha ku yama E Relato di Daniel. E ta duna e historia di e Holokousto for di e punto di bista di un mucha den Alemania nazi.

 E leftnan pa bai di kuater piso ta manera kònteiner di stal, friu i menasante. E relato históriko di Holokousto ta kuminsá riba e piso aki i ta abarká e “Atake Nazi,” 1933-39. Aki bo ta mira kon propaganda trosí di nazi a logra kontrolá e poblashon aleman i inkulká miedu i teror, spesialmente den kurason di miónes di hudiu europeo. Kiko bo por mira na di tres piso?

E piso aki tin e tema alarmante “Solushon Final,” 1940-45. Segun e guia pa bishitante, e “ta deskribí e ghetonan, deportashonnan, trabou di katibu i kamponan di konsentrashon, i e implementashon di e ‘Solushon Final’ [eliminashon di e hudiunan i otro hende] mediante instrumentonan di destrukshon manera e eskuadronnan móbil di matansa i e kamponan di morto.”

E di dos piso tin un tema mas positivo: “Último Kapítulo.” E ta splika “reskate, resistensia, liberashon i esfuerso di e sobrebibientenan pa rekonstruí nan bida.” Na un banda di e piso tin e Sentro Edukativo di Wexner, ku tin algu di sumo interes pa hopi Testigu di Yehova. Tin vários kòmpiuter kaminda e bishitante por buska e relatonan di algun di e Testigunan ku a sufri i, den algun kaso, asta sakrifiká nan bida.

Por ehèmpel, bo por sigui e relato heroiko di Helene Gotthold, di Dortmund, Alemania. E tabata mama di dos yu, i el a insistí ku e mester asistí na reunionnan kristian apesar di e prohibishon nazi. Nan a ehekut’é ku guiotina na desèmber 1944. Bo por mira hopi relato mas di víktima- i mártirnan di e era di kampo di konsentrashon.

Na e piso aki tin tambe e remarkabel Toren di Bida (konosí tambe komo e Toren di Kara), ku ta tres piso haltu. E ta un kolekshon di sentenáres di potrèt di habitantenan hudiu di Eishyshok (konosí tambe komo Eisiskes), un pueblito ku ta keda den e pais ku awe ta Lituania. E potrètnan a ser saká entre 1890 i 1941. E tabata un komunidat hudiu ku a prosperá pa 900 aña. Anto na 1941 un eskuadron móbil di matansa di SS (Einsatzkommando) a masakrá henter e poblashon hudiu den apénas dos dia! Segun registronan ofisial nazi, nan a eliminá 3.446 hudiu: 989 hòmber, 1.636 muhé i 821 mucha. Burokrasia nazi tabata masha kabal.

Na di dos piso bo ta haña tambe e Sala di Rekuerdo, ku tin tekstonan di Beibel—manera Deuteronomio 30:19 i Génesis 4:9 i 10—inskribí riba e murayanan di marmer. Tambe tin vários evidensia di e persekushon di Testigunan di Yehova, manera e triángulo püs ku nan tabatin ku bisti komo nan identifikashon. Wak bon i purba rekonosé e Testigunan segun ku bo ta tuma e tour. Tin hopi rasgo mas di e museo ku  ta bale la pena bo investigá, inkluso e sekshon grandi di investigashon ku tin na di sinku piso.

Ora bo sali for di e museo i bo ta bèk riba kaya, lo bo hala un rosea di alivio. Pero laga nos sigui pa e museo di mas nobo na Washington, unu ku ta abarká un otro tipo di historia ku tambe a inkluí intento di genosidio.

Un Berdadero Museo di Amérika

E museo mas resien den e kolekshon di museo Smithsonian ta konmemorá e promé habitantenan di Amérika. Ta trata aki di mas ku 500 tribu di merikano nativo ku tabata okupá e pais aki promé ku europeo òf afrikano a pone pia na tera. Esaki ta e Museo Nashonal di Indjan Merikano (NMAI), situá na e Paseo Nashonal banda di e Museo di Aire i Espasio. El a keda inougurá dia 21 di sèptèmber 2004. Bo por identifiká e museo fásilmente na su diseño úniko di liñanan kurvá. E murayanan eksterior di e edifisio di 23.000 meter kuadrá ta di pleister ku kalki kasota for di Minnesota. E ta dun’é e aparensia di “baranka di piedra di stapel riba otro ku a haña su forma dor di kobamentu di bientu i awa.”

Kiko bo por spera di haña den e museo ei? E sinku eksibishonnan inougural prinsipal “ta presentá aproksimadamente 7.000 opheto for di e kolekshon mundialmente renombrá di NMAI ku ta konsistí en total di 800.000 opheto di kultura étniko i arkeológiko.” (Insight, e boletin Smithsonian) Tin makutu, artíkulo di klei i di kralchi ku ta representá tribunan masha leu for di otro manera e mapuche di Chile,  e quechua di Perú, e lakota di Merka i e anishinabe di Canada.

Segun e palabranan di W. Richard Wèst, Jr., kende ta un indjan cheyenne di zùit i direktor fundadó di e museo, e propósito di NMAI ta pa “korigí ideanan robes i yuda tur pueblo, sea nativo òf no-nativo, haña un mihó komprondementu di e bida i kultura di e pueblonan nativo di e hemisferio aki.” Ta dura mas o ménos dos ora pa bishitá e kolekshon aki di indjan merikano. Unda nos por bai awor den nos tour rápido di e hopi eksibishonnan ku tin na Washington?

Arte Atraves di Siglonan

Laga nos djis krusa e koredor bai na e magnífiko Galeria Nashonal di Arte. E galeria a habri na aña 1941. E tour di e museo ta laga bo mira ocho siglo di arte. Si bo ta un amante di arte, mihó bo kuminsá bo tour un mainta trempan, ya ku dependiendo di bo era faborito di arte, lo bo mester di vários ora pa kana, keda wak i meditá pa apsorbá e kolekshon maravioso aki. Afortunadamente, tin hopi banki pa si bo ke sinta i studia kualke obra en partikular òf si bo ke djis sosegá.

Komo ku Iglesia Katóliko tabata e spònser prinsipal di arte entre siglo 13 pa siglo 15, mayoria di e kuadronan tin temanan religioso. Lo bo haña di e pintor Giotto su “La Bírgen i Yu,” i obranan di Leonardo da Vinci. Di siglo 16, tin Rafael su “La Bírgen di Alba” (1508), i tambe obranan di Tintoretto, Tiziano i otronan. Studiantenan di Beibel lo ta interesá den Tintoretto su kuadro “Kristu na Laman di Galilea” (rònt di 1575/1580), ku ta mustra e disipelnan di Kristu den un boto di piskadó meimei di un tormenta. Un otro referensia bíbliko ta e kuadro di El Greco “Kristu Limpiando e Tèmpel.” Kompará e estilonan hopi distinto di e artistanan aki; anto tuma nota di e kolónan bibu i akshon dramátiko di El Greco.

E kolekshon di kuadro di siglo 17 ta inkluí, entre otro, obranan di Rubens i Rembrandt. Studiantenan di Beibel lo ta fasiná atrobe ku Rubens su presentashon di “Daniel den e Kueba di Leon,” pintá rònt di aña 1615. Tuma nota di Daniel su trankilidat segun ku e tabata gradisí Dios ku el a spar su bida. Awor laga nos bula bai siglo 19 i bishitá e pintornan impreshonista franses.

Esaki ta un di e mihó kolekshonnan di impreshonista pafó di Paris. Si pa años bo a biba ku kopia di e pinturanan, ta masha emoshonante pa ta kara-kara ku un original. Obranan famoso di Cézanne, Manet, Renoir, Degas i Monet lo laga bo keda babuká, segun ku bo ta studia nan estilo i interpretashon di e manera ku lus ta kai riba kos. Tambe tin algun obra sobresaliente di artistanan merikano manera Mary Cassatt (“Muchanan Hungando Kant’i Laman”), James Abbott McNeill Whistler (“E Mucha Muhé Blanku”) i Winslow Homer (“Hibá pa Brisa”).

Tin un eksibishon mas ku lo bo ke bishitá, e Edifisio Ost, ku su kolekshon di arte moderno i kontemporáneo. Den e patio tin algun eskultura grandi di Alexander Calder, Henry Moore i otronan. Tambe lo bo haña un tapeit pa muraya di e artista di Catalonia, Joan Miró.

Manera bo por mira, e Galeria Nashonal lo tene bo okupá pa vários ora òf a lo ménos tanten ku bo tin energia. Klaru ku tin mas galeria di arte ku bo por bishitá, manera Galeria di Arte di Corcoran, ku tin un bunita kolekshon di artistanan europeo i merikano, inkluso kuadronan impreshonista di Monet i Renoir. Tambe e tin e kolekshon mas grandi di obranan di Jean-Baptiste Camille Corot pafó di Fransia. Kuantu tempu i energia bo tin disponibel? Esei lo determiná kuantu galeria mas lo bo por bishitá.

Pero un kos sí, lo bo bai for di Washington ku un mayor apresio i komprondementu pa kultura. I kisas e ora ei lo bo komprondé mihó e ekspreshon di e outor franses Destouches: “Kritiká ta fásil, produsí arte ta difísil.” Podisé bo bishita lo animá bo tambe pa tour e museo- i galerianan ku tin kaminda bo ta biba. Bishitá nan, i wak te kon leu religion i Beibel a influensiá nan.

[Nota]

[Plachi na página 22]

E Kastel Smithsonian

[Rekonosementu]

Smithsonian photo by Eric Long

[Plachinan na página 22, 23]

E Museo Nashonal di Aire i Espasio tin e “Flyer” original di 1903 (na banda drechi) i Lindbergh su “Spirit of Saint Louis” (abou)

[Plachinan na página 23]

E Kas di Moneda ta hala hopi bishitante

[Plachi na página 24]

E Toren di Bida ta tres piso haltu

[Plachi na página 24]

Un unifòrm di kampo di konsentrashon ku un Testigu di Yehova a bisti

[Plachi na página 25]

Museo Merikano pa Konmemorá Holokousto

[Plachi na página 25]

Helene Gotthold

[Rekonosementu]

USHMM, courtesy of Martin Tillmans

[Plachi na página 26]

E Museo Nashonal di Indjan Merikano tin un diseño úniko di liñanan kurvá

[Rekonosementu]

Photo by Robert C. Lautman

[Plachi na página 26]

Un vas di glas suplá, trahá pa un artista indjan merikano moderno

[Rekonosementu]

Photo by Ernest Amoroso, © Smithsonian Institution/National Museum of the American Indian

[Plachi na página 26]

Winslow Homer su kuadro “Hibá pa Brisa,” den e Galeria Nashonal di Arte

[Rekonosementu]

Winslow Homer, Breezing Up (A Fair Wind), Gift of the W. L. and May T. Mellon Foundation, Image © Board of Trustees, National Gallery of Art, Washington

[Rekonosementu pa Potrèt na página 23]

Ariba: Fondo: Smithsonian photo by Dane Penland; avion: © Mark Polott/Index Stock Imagery; tour: Photo by Carolyn Russo/NASM; tres potrèt abou: Courtesy of the Department of the Treasury, Bureau of Engraving and Printing