Algun dékada pasá, chèns tabata grandi ku e mayornan tabata e proménan pa papia ku nan yunan tokante sèks. Ademas, nan tabata por a splika nan yunan e tópiko akí gradualmente, segun nan edat i nesesidat.

Pero tur esei a kambia. E buki The Lolita Effect a bisa: “Awe, asta mucha chikitu ta skucha i mira kos ku tin di haber ku sèks, i kada bes tin mas kontenido seksual den programa i buki pa mucha. E situashon nobo akí ta yuda mucha òf ta perhudiká nan?”

Mucha por skucha i mira kos ku tin di haber ku sèks tur kaminda. Deborah Roffman a bisa lo siguiente den su buki Talk to Me First: “Loke hende ta bisa, propaganda, pelíkula, buki, kantika, programa di televishon, mensahe elektróniko, wega di vidio, bòrchi di propaganda i pantayanan di kòmpiuter i telefòn tin asina tantu kontenido seksual ku hopi [tiner i asta mucha] ta konkluí, a lo ménos inkonsientemente, ku sèks mester ta . . . e kos di mas importante.”

E manera ku kompanianan ta promové nan produktonan tambe ta kontribuí na e situashon. E hendenan ku ta promové i bende paña provokativo pa mucha ta siña nan for di un edat yòn pa pone hopi énfasis riba nan aparensia. E buki So Sexy So Soon ta bisa: “Komersiantenan sa ku mucha tin e deseo pa nan amigunan aseptá nan, i nan ta probechá di esei. Tur e imágen- i produktonan ku konotashon seksual no ta pa pone mucha hasi sèks, sino pa pone nan kumpra kos.”

No ta sufisiente pa djis sa tokante sèks. Djis sa kon un outo ta funshoná no ta hasi bo un shofùr responsabel. Di mes manera, djis sa tokante sèks no ke men ku lo bo usa e konosementu ei na un manera sabí.

Konklushon: Awe, ta mas importante ku nunka pa siña bo yunan entrená nan “kapasidat di komprondé” pa asina nan por “distinguí loke ta bon for di loke ta malu.”—Hebreonan 5:14.

Papia ku bo yunan. Asta si bo ta sinti bo inkómodo, ta bo responsabilidat pa papia ku bo yunan tokante sèks. Kumpli ku bo responsabilidat!—Prinsipio di Beibel: Proverbionan 22:6.

Papia tokante e asuntu tiki tiki. En bes di tin djis un kòmbersashon largu ku bo yu tokante sèks, usa e momentonan ku boso ta huntu pa papia tokante dje. Kisas ora boso ta boso dos so den outo òf ora boso ta hasiendo trabou di kas huntu. Pa yuda bo yu ekspresá su mes, hasié pregunta. Por ehèmpel, en bes di puntr’é, “abo ta gusta e propagandanan provokativo ei?” bo por puntr’é, “dikon bo ta pensa ku komersiantenan ta usa e tipo di imágennan ei pa bende nan produktonan?” Despues ku bo yu kontestá, bo por puntr’é, “kon abo ta sinti tokante di esei?”—Prinsipio di Beibel: Deuteronomio 6:6, 7.

Tene kuenta ku edat di bo yu. Asta promé ku mucha kuminsá bai skol, nan por siña nòmber di órganonan seksual, i nan por siña kon pa protehá nan mes for di hende ku ta abusá seksualmente di mucha. Ora e muchanan bira un tiki mas grandi, e mayornan por splika nan tokante sèks na un manera simpel. Ora nan bira tiner, nan mester komprondé kiko sèks ta i kiko Dios ta pensa tokante dje.

Siña bo yu kiko ta bon i kiko ta malu. For di ora ku bo yu ta chikitu, siñ’é pa papia bèrdat, hasi loke ta bon i respetá otro hende. E ora ei lo ta hopi mas fásil pa papia kuné tokante sèks. Ademas, yud’é komprondé loke abo ta pensa ta bon i malu. Por ehèmpel, si bo ta pensa ku no ta bon pa tene relashon seksual promé ku bo kasa, bisa bo yu esei. Despues, splik’é dikon ta malu i peligroso pa tene relashon seksual promé ku bo kasa. E buki Beyond the Big Talk ta bisa: “Tiner ku sa ku nan mayornan lo no aprobá di sèks promé ku nan kasa, tin ménos chèns di tene relashon seksual.”

Pone un bon ehèmpel. Pone na práktika loke bo ta siña bo yunan. Por ehèmpel, bo ta hari ora un hende konta chiste tokante sèks? Bo ta bisti paña provokativo òf ta flirt? Si bo ta hasi e kosnan ei, chèns ta grandi ku bo yunan lo no skucha bo ora bo ta papia ku nan tokante sèks.—Prinsipio di Beibel: Romanonan 2:21.

Splika bo yu ku sèks riba su mes no ta malu. Sèks ta un regalo di Dios. Ora un pareha tene relashon seksual na e momento apropiá, esta, ora nan ta kasá, esei por ta algu ku ta hasi nan hopi kontentu. (Proverbionan 5:18, 19) Splika bo yu ku ora e kasa, e tambe lo por disfrutá di e regalo akí sin mester trata ku e konsekuensianan ku ta bini di tene relashon seksual promé ku bo kasa.—1 Timoteo 1:18, 19.