UN MALESA KRÓNIKO ÒF UN DESABILIDAT POR AFEKTÁ UN HENDE SU BIDA MASHA HOPI MES. Despues ku Ulf, un hòmber ku tabata masha aktivo i bon di salú, a bira lam, el a bisa: “Mi a kai den depreshon. Mi a pèrdè forsa, kurashi i energia . . . Mi a sinti mi ‘destrosá.’”

Loke a pasa ku Ulf ta kòrda nos ku ningun di nos no tin kontrol total riba nos salú. Tòg nos por hasi tur loke ta posibel pa nos evitá di bira malu. Pero kiko si nos salú bai atras? Esei ta nifiká outomátikamente ku nos no por ta felis? Manera nos lo bai mira, e kontesta ta nò. Pero promé, laga nos ban wak algun prinsipio ku ta kontribuí na un bon salú.

SEA BALANSÁ. (1 Timoteo 3:2, 11) Si konstantemente nos ta kome i bebe di mas, sin duda esei lo afektá nos salú i lo kosta nos hopi plaka. “No anda ku esnan ku ta gusta dal nan biña, ni ku esnan ku ta golos pa kome karni. Pasobra e buraché i e hende golos lo bira pober.”—Proverbionan 23:20, 21.

NO KONTAMINÁ BO KURPA. “Laga nos limpia nos mes di tur impuresa di karni i di spiritu.” (2 Korintionan 7:1) Hende ta kontaminá nan kurpa ora nan ta kou òf huma tabako, bebe di mas òf usa droga. E Sentro pa Kontrol i Prevenshon di Enfermedat na Merka ta bisa ku humamentu “ta kousa malesa i problema ku salú ku ta hasi daño na kasi tur órgano den e kurpa di hende.”

MIRA BO KURPA I BO BIDA KOMO UN REGALO HOPI BALIOSO. “Pasobra ta pa medio di dje [Dios] nos tin bida i ta move i ta eksistí.” (Echonan 17:28) Ora nos ta komprondé esei, nos lo no riska nos bida innesesariamente na trabou, ni ora nos ta kore outo, ni ora nos ta rekreá. No ta bale la pena pa bira desabilitá pa restu di bo bida djis pa un par di minüt di plaser.

DOMINÁ EMOSHON NEGATIVO. Bo mente i salú ta estrechamente ligá ku otro. P’esei evitá ansiedat innesesario, rabia desenfrená, envidia i otro emoshonnan ku por kousa bo daño. Salmo 37:8 ta bisa: “Stòp di rabia i laga furia para.” Beibel ta bisa tambe: “No sea nunka anshá pa e dia di mañan, pasobra e dia di mañan lo tin su mes inkietutnan.”—Mateo 6:34.

 PURBA DI PENSA RIBA KOSNAN POSITIVO. Proverbionan 14:30 ta bisa: “Un kurason trankil ta bida pa e kurpa.” Beibel ta bisa tambe: “Un kurason kontentu ta un bon remedi.” (Proverbionan 17:22) Esei ta un deklarashon ku ta sientífikamente eksakto. Dr. Derek Cox, un funshonario di salubridat públiko di Eskosia, a bisa: “Si bo ta felis, bo tin ménos chèns di bira malu kompará ku esnan ku ta infelis.”

LOGRA SUPERÁ SITUASHONNAN DIFÍSIL. Meskos ku Ulf, kende nos a menshoná kaba, kisas nos tin ku enfrentá un problema di salú ku no ta kita. Apesar di esei, nos por buska manera pa trata ku e situashon. Tin hende ta laga depreshon kaba ku nan, lokual ta hasi e situashon mas pió. Proverbionan 24:10 ta bisa: “Si bo desmayá den e dia di angustia, bo forsa ta keda limitá.”

I tin hende ta sinti nan desesperá na promé instante, pero ta logra rekuperá i adaptá. Nan ta buska manera pa trata ku e situashon. Esei ta loke Ulf a hasi. Ulf a bisa ku despues ku el a hasi hopi orashon i a meditá riba e bunita mensahe di Beibel, el a “kuminsá mira loke e por hasi en bes di loke e no por hasi.” Ademas, meskos ku hopi hende ku ta pasa den prueba difísil, Ulf a siña mustra kompashon i pone su mes den sapatu di otro hende; esei ta loke a konmov’é pa kompartí e mensahe animante di Beibel ku otro hende.

Un otro hende hòmber ku a sufri hopi ta Steve. Tempu ku Steve tabatin 15 aña, el a kai for di un palu i a bira lam for di su nèk bini abou. Ora e tabatin 18 aña, e por a move su brasanan atrobe. Despues el a bai universidat, kaminda el a kuminsá hiba un bida inmoral i a kuminsá usa droga i alkohòl. E no tabatin ningun speransa. Ta te ora el a kuminsá studia Beibel, el a kuminsá mira bida na un manera positivo i esei a yud’é vense su bisionan. Steve a bisa: “Mi no ta sinti e bashí mas ku mi a sinti pa asina tantu tempu. Awor sí mi tin pas, felisidat i satisfakshon den bida.”

Lokual ku Steve i Ulf a bisa ta pone nos kòrda riba e palabranan di Salmo 19:7 i 8: “E lei di SEÑOR ta perfekto, e ta restorá alma . . . E preseptonan di SEÑOR ta korekto, nan ta alegrá kurason; e mandamentunan di SEÑOR ta puru, nan ta iluminá wowo.”