Abo ta kere ku hende por resolvé e tantísimo problemanan ku ta kita nos pas i siguridat i ku ta pone nos futuro na peliger? Pa un remedi por ta efikas, no mester trata e síntomanan so, mester yega na rais di e problema.

Laga nos wak un ehèmpel: Un pashènt ku yama Tom tabata malu i despues a fayesé. Dikon el a muri? E dòkter ku a atendé Tom na e hospital ku el a bai promé ku el a fayesé a bisa: “Ora e promé síntomanan a presentá, ningun hende no a chèk ta kiko tabata e kousa prinsipal.” Ta parse ku esnan ku a atendé Tom promé a djis dun’é remedi pa aliviá su doló.

Pero, esei ta e manera ku hende ta atendé e problemanan di e mundu akí? Por ehèmpel, pa kombatí krímen, gobièrnunan ta bini ku leinan, instalá sistema di kámara i reforsá kuerpo polisial. Aunke e medidanan akí ta efektivo te na sierto grado, nan no ta yega na rais di e problema. E problema ta den hende su mente i kurason, esta, su aktitut, su kreensia- i deseonan. Esei ta pon’é aktua na sierto manera.

Daniel, kende ta biba den un pais na Suramérika ku ta den un krísis ekonómiko, a bisa: “Un tempu nos tabata hiba un bida normal. Nos no tabatin miedu ku nos lo ser atraká. Pero awor bo no por biba trankil niun kaminda mas. E krísis ekonómiko a saka na kla ku tin hopi hende ku ta golos pa plaka i pa kos material i ku no tin rèspèt pa bida ni pa pertenensia di otro hende.”

Un mener ku nos lo yama Elias a hui for di Medio Oriente pa motibu di guera. Despues el a kuminsá studia Beibel. El a konta: “Hopi mucha hòmber hóben di e stat kaminda mi tabata biba, tabata bou di preshon di nan famia, e sistema polítiko i e sistema religioso pa bai guera i bira héroe. I e kontrapartidonan tabata hasi meskos. Tur esei a yuda mi mira ku no ta bale la pena pa pone konfiansa den gobernantenan humano.”

Wak kiko un buki yen di sabiduria ta bisa:

• “E intenshon di kurason di hende ta malu for di su hubentut.”—Génesis 8:21.

• “E kurason ta mas engañoso ku tur kos i ta totalmente korupto; ken por komprond’é?”—Yeremías 17:9.

• “For di kurason ta sali pensamentu malisioso, matamentu, . . . fornikashon, ladronisia [i] testimonio falsu.”​—Mateo 15:19.

Hende no a logra haña un solushon pa e maldat ku tin den nos mente i kurason. Al kontrario, manera nos por a mira den e artíkulo anterior, dia pa dia e problemanan ta bira mas pió. (2 Timoteo 3:1-5) Ni e gran kantidat di informashon ni e echo ku nan a bai dilanti riba tereno di komunikashon no a yuda e situashon! Ta dikon anto nos no por hasi e mundu akí un lugá trankil i sigur? Nos ta eksigí muchu di nos mes? Nos ta purba hasi algu ku ta imposibel?

Asta si nos por a hasi milager i kaba ku tur e maldat ku tin den mente i kurason di hende, tòg nos lo no por hasi e mundu akí un lugá safe. Dikon no? Pasobra hende tin su limitashonnan.

 E bèrdat ta ku “no ta keda na hende pa dirigí su pasonan.” (Yeremías 10:23) Dios no a krea nos pa nos goberná nos mes. Meskos ku nos no a ser kreá pa biba bou di awa òf den espasio, nos no a ser kreá pa goberná nos mes.

Pensa un ratu riba lo siguiente: Akaso hende ta gusta pa otro hende bisa nan kon nan tin ku hiba nan bida òf ki norma i balor nan tin ku sigui? Òf, kon nan tin ku mira aborto, kastigu di morto òf edukashon di nan yunan? Esei ta djis algun di e tópikonan ku ta dividí hende. I maske loke Beibel ta bisa kisas no ta fásil pa aseptá, e ta komprendibel sí. Simplemente, nos no tin e kapasidat ni derecho pa goberná riba otro hende. Pues, ken sí por yuda nos?

E kontesta mas lógiko ta nos Kreador. Dikon? Pasobra ta e a traha nos! I kontrali na loke hopi hende ta pensa, e no a lubidá riba nos. Tur e bon konsehonan ku tin den Beibel ta mustra bon kla ku e ta stima nos. I ora nos komprondé e buki úniko ei mas mihó, nos ta komprondé nos mes mas mihó tambe. Ademas, nos por komprondé dikon historia di hende ta asina trágiko. Manera un filósofo aleman a yega di skirbi: “E nashonnan i gobièrnunan no a siña nada for di historia, p’esei nan no a kambia nan komportashon.”

Un hòmber sabí a yega di bisa: “Sabiduria ta demostrá pa medio di tur su obranan ku e ta hustu.” (Lukas 7:35) Laga nos wak un ehèmpel. Salmo 146:3 ta bisa: “No konfia den prensnan, den yu di hende, den kende no tin salbashon.” Esei ta un ekselente konseho ku ta protehá nos pa nos no karga speransa falsu òf pone konfiansa den algu ku nunka lo sosodé. Kenneth, kende ta biba den un stat hopi violento na Norteamérika, a bisa: “Polítikonan ta primintí ku nan lo mehorá e situashon, pero nan no por. Kada bes ku nan keda sin kumpli ku nan promesanan, esei ta un rekordatorio ku Beibel tin rason.”

Daniel, kende nos a menshoná kaba, a skirbi: “Tur dia mi ta mas konvensí ku hende no por goberná bon . . . Sèn na banko òf un bon penshon no ta un garantia ku lo bo tin un futuro sigur. Mi a mira hende ku a keda hopi desepshoná pa e motibu ei.”

En bes di yuda nos pa no karga speransa falsu, Beibel ta duna nos un berdadero speransa pa futuro, manera nos lo mira den e siguiente artíkulo.