Durante un ekskurshon ku skol, un par di mucha hòmber a ser akusá di a agredí un kompañero di skol seksualmente. Nan tur tabata bai un skol priva ku ta bon konosí na Canada. Despues di e insidente, Leonard Stern a skirbi den e korant Ottawa Citizen: “Inteligensia, un bon estudio i forma parti di un famia bon pará no ta stòp hóbennan di hasi loke ta malu.”

Stern a bisa tambe: “Bo ta ferwagt ku mayornan tin e meta prinsipal di siña nan yunan kiko ta bon i kiko ta malu. Pero ta parse ku hopi mayor ta mas preokupá pa nan yunan siña bon na skol pa despues nan por haña un bon trabou i gana hopi plaka.”

Ta bèrdat ku ta importante pa bai skol. Pero asta e mihó estudio no ta yuda un hende kombatí su mal deseo- i inklinashonnan. Pues, ta ki tipo di enseñansa un hende mester tin pa e hasi loke ta bon?

Beibel ta manera un spil. Ora nos les’é, nos ta mira nos limitashon- i debilidatnan mas kla. (Santiago 1:23-25) Pero no ta esei so Beibel ta hasi. E ta yuda nos kambia i kultivá kualidatnan ku ta promové berdadero pas i union, manera bondat, amabilidat, pasenshi, dominio propio i amor. Ta interesante pa mira ku Beibel ta bisa ku amor ta “e laso perfekto di union.” (Kolosensenan 3:14) Dikon amor ta asina spesial? Wak kiko Beibel ta bisa tokante e kualidat akí.

• “Amor tin pasenshi i ta bondadoso. Amor no ta yalurs, e no ta broma, e no ta halsa su mes, e no ta komport’é indesentemente, e no ta buska su mes interes, e no ta rabia lihé. E no ta keda kòrda e malu ku hende a hasié. E no ta alegrá ku inhustisia [maldat], ma ta alegrá ku loke ta bèrdat. E ta wanta tur kos . . . [i] soportá tur kos. Amor no ta kaba nunka.”—1 Korintionan 13:4-8.

• “Un hende ku tin amor no ta hasi malu ku su próhimo.”—Romanonan 13:10.

• “Riba tur kos, stima otro intensamente, pasobra amor ta tapa un multitut di piká.”—1 Pedro 4:8.

Kon bo ta sinti ora bo ta ku hende ku ta stima bo? Safe? Sigur? Trankil? Sí, esei ta pasobra bo sa ku nan ke lo mihó pa bo i ku nunka nan lo ke hasi bo daño.

Ademas, amor por motivá hende pa hasi sakrifisio i kambia nan estilo di bida pa benefisio di otro hende. Por ehèmpel, ora un hòmber ku nos lo yama George a bira opa, e tabatin hopi gana di  pasa tempu ku su ñetu. Pero e tabatin un problema. George tabata huma masha hopi mes, i su suegro no tabata ke pa e huma ora e ta huntu ku e bebi. Kiko George a hasi? Aunke el a huma pa 50 aña largu, el a stòp di huma pa e por ta ku su ñetu. Bo a mira kiko amor por logra?

Tur hende por siña stima. I mayornan ta den e mihó posishon pa siña nan yunan esei. Nan ta alimentá i protehá nan yunan i ta yuda nan ora algu malu pasa ku nan òf nan bira malu. Mayornan amoroso ta papia ku nan yunan. Tambe nan ta disipliná nan yunan, lokual ta inkluí siña nan kiko ta bon i kiko ta malu. Ademas, mayornan amoroso ta pone un bon ehèmpel pa nan yunan.

Pero lamentablemente tin mayor ku no ta kumpli ku nan responsabilidat. Akaso esei ke men ku outomátikamente nan yunan lo ta un kaso pèrdí? Klaru ku no! Tin hopi adulto ku a hasi kambio grandi den nan bida i a bira hende kariñoso i responsabel, asta algun di nan ku a lanta den famia ku yen di problema. Manera nos lo wak den e siguiente artíkulo, entre nan tin algun persona ku hende tabata konsiderá komo kaso pèrdí.