“No sea nunka anshá pa e dia di mañan, pasobra e dia di mañan lo tin su mes inkietutnan.”—MATEO 6:34.

Splikashon: Preokupashon ta parti di bida. Pero no preokupá for di awe pa e kosnan di mañan pasobra esei ta duna bo mas strès. Purba di trata kada dia ku e problemanan di e dia ei.

• Strès por hasi nos anshá. Pues purba esaki: Promé, rekonosé ku bo no por evitá di sinti sierto grado di strès. Ora nos ta preokupá muchu tokante kos ku nos no por evitá, esei ta duna nos mas strès. Di dos, kòrda ku hopi biaha e kosnan ku nos tin miedu ku lo pasa no ta pasa.

“Sabiduria di ariba ta . . . rasonabel.”—SANTIAGO 3:17.

Splikashon: No ser un perfekshonista. Evitá di eksigí muchu di bo mes òf di otro hende.

• Sea humilde, fiha norma rasonabel i rekonosé tantu bo limitashonnan komo esnan di otro hende. Ora bo ta hasi esei, tantu bo mes komo e hendenan rònt di bo lo haña ménos strès i lo ta mas fásil pa kos bai mihó. Tambe, keda ku un bon sentido di humor. Ora bo ta hari, asta si algu bai robes, esei por kita tenshon i drecha bo beis.

“Esun ku tin un spiritu kalmu ta un hende di komprondementu.”—PROVERBIONAN 17:27.

Splikashon: Emoshon negativo, manera rabia, ansha òf falta di pasenshi, por stroba bo di pensa bon, pues purba di keda kalmu.

• Saka afó kiko ta duna bo strès i wak kon bo ta reakshoná. Por ehèmpel, ora bo tin strès, analisá kiko bo ta pensa, sinti i hasi. Bo por asta skirbi nan. Ora bo ta konsiente di e manera ku bo ta reakshoná ora bo tin strès, esei por yuda bo kontrol’é mihó. Pensa tambe kon bo por eliminá algun kos ku ta duna bo strès. Si esaki no ta posibel, pensa kiko bo por hasi pa e kosnan ei duna bo ménos strès. Kisas bo por buska un manera pa organisá bo trabou òf usa bo tempu mihó.

• Purba di kambia e manera ku bo ta mira kos. Loke ta duna abo strès kisas no ta duna un otro hende strès. Esei ta dependé di e manera ku bo ta mira kos. Konsiderá e tres sugerensianan akí:

  1. No pensa lihé ku un hende ta hasi algu ku mal intenshon. Si un hende pasa bo dilanti den rei, bo por pensa ku el a hasi esei pa malu i bo por rabia. No ta mihó pa pensa ku e no tabatin mal intenshon? Kisas ta asina.

  2. Wak e banda positivo di un situashon. Si bo mester warda hopi na dòkter òf na aeropuerto, usa e tempu ei pa lesa, pa kaba un kos di trabou òf pa chèk bo e-mail. Esei lo yuda kita strès un tiki.

  3. Wak mas aleu. Puntra bo mes: ‘E problema akí lo ta un problema grandi mañan òf otro siman?’ Siña distinguí entre problema serio i kos ku ta ménos serio.

“Laga tur kos tuma lugá desentemente i na un manera ordená.”—1 KORINTIONAN 14:40.

Splikashon: Purba di ta organisá.

• Nos gusta pa te na sierto grado nos bida ta organisá. Un kos ku por kousa desórden—i strès—ta posponementu di loke bo tin ku hasi. Esaki por pone ku lo bo keda ku un lista largu di tarea ku mester kaba di hasi. Dikon no purba di apliká e dos sugerensianan akí?

  1. Traha un skèdjel realístiko i pega na dje.

  2. Saka afó kiko ta pone bo posponé loke bo tin ku hasi i korigí e aktitut ei.

“Un man yen di sosiegu ta mihó ku dos moketa yen di trabou i korementu tras di bientu.”—EKLESIÁSTES 4:6.

Splikashon: Hende ku ta adikto na trabou por stroba nan mes di risibí e benefisionan di nan “dos moketa[nan] yen di trabou.” Kisas nan no tin tempu ni energia pa disfrutá di e resultado di nan trabou.

• Nos mester tin un punto di bista balansá di trabou i plaka. Ora bo tin mas plaka, esei no ke men ku bo ta mas felis ni ku bo tin ménos strès. Por sosodé nèt lo kontrario, pasobra Eklesiástes (Predikador) 5:12 (BPK) ta bisa: “E hende riku ku nunka no tin basta no por drumi trankil.” Pues, purba di no gasta mas di loke bo tin.

• Saka tempu pa rekreá. Bo ta kita strès ora bo ta hasi kos ku bo gusta. Sinembargo, rekreo pasivo, manera wakmentu di televishon, kisas lo no yuda mashá.

• Tene teknologia na su debido lugá. Evitá di chèk e-mail, mensahe òf di subi ret sosial konstantemente. Purba di no chèk e-mail di trabou ora bo no ta na trabou. Hasi esei solamente si ta estriktamente nesesario.

“Entrenamentu físiko ta yuda.”—1 TIMOTEO 4:8.

Splikashon: Si bo hasi ehersisio regularmente, esei ta yuda bo keda salú.

• Desaroyá kustumber saludabel. Ehersisio por drecha bo beis i yuda bo kurpa reakshoná mas mihó na strès. Kome salú i purba di kome na ora. Hasi sigur di drumi sufisiente.

• No huma, no usa droga ni bebe di mas pa kita strès. Ku tempu, esakinan ta duna bo mas strès, pasobra bo salú ta bai atras i bo ta gasta plaka ku bo a traha asina duru p’e.

• Si bo ta sinti ku bo no por mas, ta mihó bo bai dòkter. Bo no mester tin bèrgwensa pa pidi yudansa profeshonal.

“Hasi sigur kiko ta e kosnan mas importante.”—FILIPENSENAN 1:10.

Splikashon: Analisá bon kiko ta bo prioridatnan.

• Traha un lista di e tareanan ku bo tin ku hasi den órden di importansia. Esaki lo yuda bo konsentrá riba e tareanan mas importante i lo yuda bo wak kua tarea bo no mester hasi mesora, kua bo por laga otro hende hasi òf asta laga afó.

• Durante henter un siman, skirbi kiko bo a hasi i kuantu tempu bo a usa pa esei. Despues, pensa kon bo por hasi mihó uso di bo tempu. Mas kontrol bo tin riba bo tempu, ménos strès lo bo sinti.

• Programá tempu pa sosegá. Asta un pousa kòrtiku, por duna bo energia i baha bo strès.

“Ansha den kurason di hende ta hasié abatí, ma un bon palabra ta hasié kontentu.”—PROVERBIONAN 12:25.

Splikashon: Palabra amabel di otro hende por laga bo sinti mihó.

• Papia ku un amigu ku lo komprondé bo situashon. Un hende di konfiansa por yuda bo mira kos den un manera diferente òf asta bini ku un solushon ku bo no a pensa ariba. I djis deshogá bo mes por laga bo sinti mas mihó.

• Pidi yudansa. Bo por pidi un hende pa hasi e tarea pa bo òf bo por buska un hende pa yuda bo hasi e trabou?

• Si ta un kolega di trabou ta duna bo strès, purba di drecha e situashon. Por ehèmpel, lo bo por bisa e persona ei, na un manera amabel i ku takto, kon e ta laga bo sinti. (Proverbionan 17:27) Si esei no funshoná, bo por limitá e tempu ku bo ta pasa kuné?

“Felis ta esnan ku ta konsiente ku nan tin mester di Dios.”—MATEO 5:3, nota.

Splikashon: Nos mester di mas ku solamente kuminda, paña i un dak riba nos kabes. Nos mester di Dios su guia tambe. Pa nos por ta felis, nos mester ta konsiente ku nos tin mester di Dios i buska su guia.

• Loke por yuda nos hopi ta orashon. Dios ta bisa nos pa “tira tur [nos] inkietut riba dje, pasobra e ta interesá den [nos].” (1 Pedro 5:7) Ora nos ta hasi orashon i ta pensa riba kos positivo, esei lo duna nos pas mental.—Filipensenan 4:6, 7.

• Lesa kos ku lo yuda bo hala mas serka di Dios. E prinsipionan ku e revista akí a papia di dje ta bini for di Beibel, un buki ku a ser skirbí pa satisfasé nos nesesidat di haña Dios su guia. Nan por duna nos “sabiduria práktiko” i ta animá nos pa usa nos “kapasidat di pensa.” (Proverbionan 3:21, NW) Dikon no pone meta pa lesa Beibel? E buki di Proverbionan ta un bon buki pa kuminsá kuné.