Hopi hende ta lucha tur dia djis pa haña e kosnan ku nan tin mester di dje. Lamentablemente, e problemanan den mundu awe por hasi esei asta mas difísil. Dikon?

• Ora tin problema den un área, kosto di bida ta subi, esei ta inkluí kuminda i lugá di biba.

• Un krísis por pone hende pèrdè trabou òf fòrsa nan traha pa ménos plaka.

• Desaster natural por destruí òf kousa daño na hende su negoshi, kas òf otro propiedat. Esei por pone ku hopi hende ta bira pober.

• Si bo ta usa bo plaka bon, lo bo ta mihó prepará pa un krísis.

• Djis pasobra bo ta bon pará finansieramente awor, no ke men ku esei lo ta asina pa semper. Kòrda ku e plaka ku bo ta gana òf spar i bo propiedatnan por pèrdè nan balor.

• Tin kos ku plaka no por kumpra, manera felisidat i union den famia.

Beibel ta bisa: “Si nos tin kuminda, paña i un dak riba nos kabes, nos lo keda kontentu ku e kosnan akí.”—1 Timoteo 6:8.

Ora bo ta kontentu ku loke bo tin, bo ta keda satisfecho si tur dia bo haña loke bo tin mester di dje. Esei ta importante spesialmente ora bo tin ménos plaka.

Pa bo ta kontentu ku loke bo tin, kisas bo mester kambia bo estilo di bida. Si semper bo ta purba di kumpra kos ku bo no por afòrt, e ora ei lo bo haña bo mes ku mas problema.