NOS PLANETA POR SOBREBIBÍ?
Aire
NOS MESTER di aire, pero no djis pa hala rosea. Aire ta protehá nos planeta di mayoria di radiashon di solo ku ta peligroso pa nos. Sin aire, e temperatura rònt mundu lo bira bou di sero.
Kiko Ta Pasando ku Nos Aire?
Polushon di aire por destruí bida riba tera. Apénas un porshento di henter poblashon di mundu ta inhalá aire ku su kalidat ta di akuerdo ku e normanan di Organisashon Mundial di Salú.
Polushon di aire por kousa problema respiratorio, kanser di pulmon i problema di kurason i sirkulashon di sanger. Polushon di aire ta kousa morto prematuro di mas o ménos 7.000.000 hende tur aña.
Nos Planeta A Ser Diseñá pa Sobrebibí
Nos planeta a ser kreá ku e kapasidat pa pèrkurá sufisiente aire limpi pa tur ser bibu riba tera, pero e por hasi esei solamente ora hende ta tene kuenta ku polushon di medio ambiente. Wak algun ehèmpel.
-
Hopi hende sa ku mondi tin e kapasidat di apsorbá dióksido di karbon for di aire. Pero hopi hende no sa ku muras na kosta ku tin yen di palu di mangel (mangrove) por hasi asta un mihó trabou ku e mondinan. Palu di mangel ta hunga un papel importante den saka dióksido di karbon for di nos aire. Nan por saka sinku biaha mas tantu dióksido di karbon ku mondi tropikal por saka.
-
Estudio resien ta mustra ku algun lima, òf yerba di laman ku ta krese bira grandi, manera kelp, no ta djis apsorbá dióksido di karbon for di nos atmósfera, nan ta der’é tambe. E blachinan di kelp tin saku chikitu yená ku aire ku ta permití nan drif distansia largu riba awa. Ora e blachinan di kelp drif bai leu for di kosta, e sakunan yen di aire ta rementá i e blachinan di kelp ku ta yen di dióksido di karbon ta senk bai fondo di laman. Ta parse ku nan ta keda derá ei bou pa vários siglo.
-
Durante pandemia di COVID-19, ora hende mester a keda paden, a bira bisto ku nos atmósfera tin e kapasidat di rekuperá di nivel haltu di polushon. Na aña 2020, ora fábrika i vehíkulo rònt mundu a stòp di kontaminá e aire kasi kompletamente, e kalidat di aire a mehorá masha lihé. Segun e informe “2020 World Air Quality Report,” mas ku 80 porshento di tur pais ku a partisipá den e estudio a bisa ku aire tabata mas limpi djis despues ku hende mester a kuminsá keda paden pa motibu di COVID-19.
Loke Hende Ta Purba di Hasi pa Resolvé e Problema
Uso di baiskel por yuda redusí polushon di aire
Gobièrnu ta keda pone preshon riba e kompanianan pa nan redusí kontaminashon di aire. Ademas, algun sientífiko ta keda haña manera nobo pa drecha e daño ku polushon ta kousa. Por ehèmpel, tin un proseso ku ta usa bakteria pa kombertí supstansia tóksiko ku ta kontaminá aire den supstansia ku no ta tóksiko. Ademas, algun eksperto ta animá hende pa kana òf kore baiskel bai trabou en bes di bai ku outo i pa usa ménos koriente na kas.
Algun gobièrnu ta pèrkurá stof moderno pa nan siudadanonan pa yuda baha polushon di aire, pero ainda hopi hende no tin akseso na stof moderno
Pero un informe kompilá na aña 2022 pa algun agensia internashonal, inkluso Organisashon Mundial di Salú i Banko Mundial (World Bank), ta mustra ku e esfuerso ku hende ta hasi no ta sufisiente.
E informe a mustra ku na aña 2020, un terser parti di hende rònt mundu tabata usa kombustibel i otro kos pa kushiná ku ta kontaminá aire. Den hopi área, masha poko hende por afòrt stof nobo, i nan no tin akseso na otro tipo di kombustibel.
Ki Speransa Beibel Ta Duna Nos?
“Yehova ta e Dios berdadero, Kreador di shelu . . . El a traha tera i tur loke tin riba dje. E ta duna rosea na e hendenan ku tin riba tera.”—Isaías 42:5.
Dios a krea e aire ku nos ta inhalá i tur e siklonan di naturalesa ku ta limpia e aire. Ademas, Dios su poder ta sin límite, i e ta stima humanidat. Pues, ta rasonabel pa kere ku lo e kaba ku tur polushon di aire. Wak e artíkulo “Dios Ta Primintí Ku Nos Planeta Lo Sobrebibí.”
