NOS PLANETA POR SOBREBIBÍ?
Laman
LAMAN ta pèrkurá hopi di e kuminda ku nos ta kome, pero tambe hopi di e ingredientenan ku nos tin mester pa traha remedi. Nos lamannan ta produsí mas ku mitar di e oksígeno riba mundu, i nan ta apsorbá gas di karbon peligroso. Ademas, laman ta regulá nos klima.
Dikon Nos Mester Protehá Nos Lamannan?
Kambio di klima ta kousa daño na ref di koral, na bestia ku ta biba den kokolishi, òf molusko (schelpdier), i na otro bida marino. Algun sientífiko ta premirá ku kasi tur ref di koral, ku ta sostené por lo ménos un kuart di tur bida den laman, ta kore rísiko di muri den e próksimo 30 aña.
Algun eksperto ta kalkulá ku kasi 90 porshento di para ku ta haña nan kuminda for di laman lo a yega di kome plèstik, i ta parse ku plèstik den laman ta mata miónes di bestia di laman tur aña.
António Guterres, Sekretario General di Nashonnan Uní, a bisa na aña 2022: “Nos no a kuida nos lamannan. Anto awor, nos lamannan ta enfrentá un situashon ku ami lo yama un situashon di emergensia.”
Nos Planeta A Ser Diseñá pa Sobrebibí
Nos lamannan i e bida ku tin den nan a ser diseñá pa tene nan mes limpi i saludabel, pero nan no por hasi esei si nan ser kontaminá pa un kantidat demasiado grandi di polushon. E buki Regeneration: Ending the Climate Crisis in One Generation ta splika ku ora hende no kontaminá laman, “e tin e kapasidat pa limpia su mes.” Wak algun ehèmpel:
• Organismo chikitu ku yama fitoplanktòn (mata mikroskópiko den laman) ta apsorbá i warda dióksido di karbon. Dióksido di karbon ta e gas ku hende ta pensa ta e kousa prinsipal di keintamentu di nos planeta (global warming). Fitoplanktòn so ta apsorbá kasi mesun kantidat di dióksido di karbon ku tur palu, yerba i otro mata riba tera huntu.
• Bakteria ta kome kueru i wesu di piská morto; si nan no tabata hasi esei, laman lo a ser kontaminá. Despues, e bakterianan mes ta bira kuminda pa otro bestia di laman. Segun e website di Instituto Smithsonian (sekshon di laman), e proseso ei “ta tene laman limpi.”
• E manera ku hopi piská ta digerí nan kuminda ta yuda redusí e kantidat di ásido den laman. Anto esei ta bon, pasobra ora awa di laman ta muchu ásido, e ta kousa daño na koral, na bestia ku ta biba den kokolishi, òf molusko, i na otro bestia di laman.
Loke Hende Ta Purba di Hasi pa Resolvé e Problema
Nos por yuda redusí e kantidat di plèstik ku ta drenta nos lamannan si nos usa saku i bòter di awa ku por ser usá mas ku un biaha
Si sushi no drenta laman, nos no mester limpia laman. Pues, e ekspertonan riba e tereno ei ta animá hende pa usa saku, artíkulo di uso i baki ku nan por sigui usa en bes di usa artíkulo di plèstik ku nan por usa un biaha so i despues mester benta afó.
Pero esei no ta sufisiente. Resientemente, den un solo aña, un organisashon ku ta yuda medio ambiente a kolektá kantu di playa na 112 pais mas ku 9.200 tòn di sushi ku laman a trese kantu. Pero esei tabata un kantidat masha chikitu, apénas 0,1 porshento, di tur sushi ku ta drenta laman tur aña.
National Geographic a bisa ku “e oumento di ásido [den laman] ku a tuma lugá te ku awor muy probablemente a kousa daño permanente.” Bestia di laman “tin ku lucha kontra un ekonomia ku ta kima asina tantu kombustibel natural, [manera zeta, gas i karbon], ku e bestianan di laman no por tene e lamannan limpi manera nan a ser diseñá pa hasi.”
Ki Speransa Beibel Ta Duna Nos?
“Tera ta yen di e kosnan ku bo a traha. Wak laman; e ta asina grandi i hanchu. E tin un kantidat inkontabel di bestia, tantu grandi komo chikitu.”—Salmo 104:24, 25.
Nos Kreador ta e Persona ku a traha laman, i el a trah’é ku e kapasidat di purifiká su mes. Pensa riba esaki: Si nos Kreador sa asina tantu tokante laman i tur bida marino, no ta lógiko pa pensa ku e por drecha tur e daño ku hende a kousa na nos lamannan? Wak e artíkulo “Dios Ta Primintí Ku Nos Planeta Lo Sobrebibí,” na página 15.
