BUKI-, pelíkula- i weganan di vidio ta pèstá ku personahenan sobrenatural * manera mago yòn i bieu, hèks seduktivo i vampiro atraktivo. Dikon nan ta asina popular?

Profesor Claude Fischer, un sosiólogo, a skirbi: “Durante e último dékadanan, kada bes mas i mas merikano a kuminsá kere den spiritu. Ántes tabata un di kada dies, pero awor ta un di kada tres. Ademas, kompará ku hende grandi, mas o ménos dos biaha mas tantu mucha yòn a bisa ku nan a konsultá ku spiritista, ta kere den spiritu i ta kere den kas ku tin spiritu malu.”

Pues, no ta nada straño ku historianan tokante hende poseí pa spiritu malu a lanta kabes na un manera alarmante. Michael Calia a skirbi den The Wall Street Journal: “Hende poseí pa demoño a bira popular atrobe debí ku zumbi, hòmber lobo i vampiro tabata popular den e dékada ku a pasa.”

Un informe ta bisa ku “nan ta kalkulá ku entre 25 pa 50 porshento di hende rònt mundu ta kere den spiritu. I den kasi tur kultura bo ta haña literatura den kua spiritismo ta hunga un ròl importante.” Un enkuesta ku e profesornan di sosiologia Christopher Bader i Carson Mencken a hasi na Merka “ta indiká ku, pa straño ku por parse, un 70 pa 80 porshento di merikano ta kere firmemente den por lo ménos un aktividat paranormal.”

Ta algu malu pa lesa buki, wak pelíkula òf hunga wega di vidio ku tin kosnan sobrenatural?