Mayornan ku ta pone bon ehèmpel ta hasi loke nan ta bisa. Por ehèmpel, bo no por spera pa bo yu ta onesto si e ta tende bo bisa: “Bis’é ku mi no t’ei” ora bo no ke atendé un hende ku a bini serka bo na kas.

“Un dicho popular ta: ‘Hasi loke mi ta bisa i no loke mi ta hasi.’ Pero esei no ta funshoná ku nos yunan. Nan ta manera spòns ku ta apsorbá tur loke nos ta bisa i hasi, i si nos ta purba di siña nan algu ku nos mes no ta hasi, nan ta ripará esei i nan lo bisa nos.”—David.

PRINSIPIO DI BEIBEL: “Abo ku ta prediká: ‘No hòrta,’ ta hòrta?”—Romanonan 2:21.

Mayornan tin mas influensia riba nan yunan chikitu i asta riba nan yunan tiner ku kualke otro hende, inkluso mas ku nan pareunan. Esei ta nifiká ku bo ta den e mihó posishon pa guia bo yunan den e kaminda korekto, basta bo hasi loke bo ta bisa.

“Nos por ripití algu shen biaha i puntra nos mes si nos yu a tende, pero djis un biaha ku nos no ta hasi loke nos ta bisa, nos yu lo laga nos sa esei. Yunan ta presta atenshon na tur loke nos ta hasi, asta ora nos ta pensa ku no ta asina.”—Nicole.

PRINSIPIO DI BEIBEL: “Sabiduria djariba ta . . . sin hipokresia.”—Santiago 3:17.

Puntra bo mes: Ki tipo di programa ami ta wak? Kon mi ta trata mi kasá i yunan? Ki tipo di amigu mi tin? Mi ta mustra interes den otro hende? Ku poko palabra, ami ta e tipo di persona ku mi ta deseá pa mi yunan bira?

“Ami ku mi esposo no ta pidi nos yunan pa hasi algu ku nos mes no ta hasi.”—Christine.

Pidi despensa ora bo hasi fout. Bo yunan sa kaba ku bo no ta perfekto. Ora bo bisa “sòri” na momentonan apropiá, tantu na bo kasá komo na bo yunan, bo ta siña bo yunan pa ta onesto i humilde.

“Ta importante pa nos yunan tende nos bisa ku nos ta robes i pidi despensa, sino nan tampoko lo no siña hasi esei.”—Robin.