Bon komunikashon ta ora tantu abo komo bo yunan ta ekspresá boso pensamentu- i sintimentunan na otro.

Komunikashon por bira un reto foral ora ta trata di yunan tiner. Ora bo yunan tabata chikitu, nan lo a konta bo tur kos. Pero awor ku nan ta tiner, nan ta komuniká ménos. Komo mayor, bo no sa kiko nan ta pensa òf sinti. Ta manera boso ta riba dos isla diferente. Aunke ta parse ku bo yunan no tin gana di papia, ta nèt na e momentonan ei nan mester papia ku bo!

Sea dispuesto pa komuniká ku bo yu ora e ke papia. Hasi esei asta si bo tin ku papia kuné te mardugá.

“Kisas bo ta haña gana di bisa: ‘Nèt awor bo ke papia? Nos tabatin henter dia, tòg?’ Pero si nos ke pa nos yunan papia ku nos, lo ta sabí pa keha? Akaso esei no ta lokual ku tur mayor ta deseá pa nan yunan hasi?”—Lisa.

“Mi no gusta pèrdè soño, pero algun di e mihó kòmbersashonnan ku mi tabatin ku mi yunan tiner tabata despues di meianochi.”—Herbert.

PRINSIPIO DI BEIBEL: “Laga kada hende sigui buska, no su mes benefisio, sino esun di e otro persona.”—1 Korintionan 10:24.

No laga nada kita bo atenshon. Un tata ta rekonosé: “Tin biaha, ora mi yunan ta papiando, mi ta gara mi mes pensando riba otro kos. I nan ta ripará ku mi no ta skuchando nan.”

Si televishon òf kualke aparato elektróniko sa kita bo atenshon, paga nan òf pone nan un banda. Konsentrá riba loke bo yu ta bisando i lag’é sinti ku e tin tur bo atenshon, asta si abo mes ta pensa ku ta algu ku no ta dje importante ei.

“Nos yunan mester ta konvensí ku nan sintimentunan ta importante pa nos. Sino, nan lo no bisa nos loke nan ta pensa i asta nan lo buska yudansa serka otro hende.”—Maranda.

“Ni maske kon robes bo yu ta, keda kalmu.”—Anthony.

PRINSIPIO DI BEIBEL: “Presta atenshon na e manera ku boso ta skucha.”—Lukas 8:18.

Probechá di momentonan ku boso ta relahá. Tin biaha, yunan ta mas inkliná pa papia ku nan mayornan ora ku nan no ta sintá kara kara ku nan.

“Nos ta probechá ora nos ta kore den outo. E echo ku nos tabata sintá banda di otro i no kara kara a hiba na bon kòmbersashon.”—Nicole.

Ora un famia ta kome huntu, ta un otro oportunidat pa papia ku otro den un ambiente relahá.

“Ora ku nos famia ta kome huntu, kada un di nos ta konta tantu e kos di mas malu komo e kos di mas mihó ku a pasa e dia ei. E kustumber akí ta uni nos i ta siña nos ku nos no tin mester di enfrentá nos problemanan nos so.”—Robin.

PRINSIPIO DI BEIBEL: “Tur hende mester ta kla pa skucha [i] slo pa papia.”—Santiago 1:19.