No ta hustu ku bon hende ta sufri. P’esei tin hende ta pensa ku no ta bale la pena pa hasi esfuerso pa ta un bon hende.

Tin hende ta kere ku kos malu ta sosodé pa motibu di destino. Tin otro hende ta pensa ku Dios ta usa sufrimentu pa kastigá mal hende òf pa tèst fe di bon hende. I tin hende ta bisa ku no ta posibel pa haña sa dikon bon hende ta sufri. Pero e pensamentunan akí ta lanta e siguiente preguntanan:

• Si tur kos ta sosodé pa motibu di destino, pakiko nos mester kuida nos salú i tuma bon desishon?

• Si Dios ta interesá den nos, kon e por ta asina kruel di laga nos sufri djis pa tèst nos?

  PA HAÑA SA MAS

  Bai na jw.org i wak e vidio Dikon Dios Ta Permití Sufrimentu?

Sufrimentu no ta kastigu di Dios.

Al kontrario, hopi biaha ta pa kasualidat, hende sa ta na e lugá robes na e momento robes.

“No ta semper esnan mas lihé ta gana e kareda, ni no ta semper esnan sabí tin kuminda, ni no ta semper esnan inteligente tin rikesa, ni no ta semper esnan ku tin konosementu tin éksito, pasobra tempu i suseso imprevisto ta alkansá nan tur.”​—EKLESIÁSTES 9:11, NW.

Nos ta sufri pasobra nos a nase ku e tendensia di kometé piká.

Hende hopi biaha ta usa e palabra “piká” pa referí na un kos malu ku un hende a hasi. Pero, Beibel ta usa e palabra akí tambe pa referí na e imperfekshon ku tantu bon hende komo mal hende a heredá di Adam i Eva.

“Den inikidat mi a wòrdu forma, i den piká mi mama a konsebí mi.”​—SALMO 51:5.

Piká tabatin i tin konsekuensia teribel pa hende.

Piká no solamente a kousa daño na nos relashon ku Dios, sino tambe na nos relashon ku otro hende, na nos emoshonnan i asta a pone ku hende ta kousa daño na tera. Tur esei a trese hopi sufrimentu, tantu pa hende individual komo pa humanidat en general.

“Ora mi ta deseá di hasi loke ta korekto, loke ta malu ta den mi.”​—ROMANONAN 7:21.

“Henter kreashon huntu ta sigui keña i ta keda den doló.”​—ROMANONAN 8:22.