1 Ta Dios Su Falta Ku Nos Ta Sufri?

TOKA NA

Dikon Ta Importante pa Sa e Kontesta?

Hopi hende no ke tin nada di haber ku Dios pasobra nan ta kere ku ta su falta ku hende ta sufri.

Pensa Riba Esaki

Direktamente òf indirektamente, hopi lider religioso a siña hende ku Dios ta kousa sufrimentu. Por ehèmpel, tin hende ta bisa lo siguiente:

Desaster natural ta kastigu di Dios.
Mucha ta muri pasobra Dios tin mester di un angel mas den shelu.
Dios ta tuma parti pa sierto partido den guera.

Ta posibel ku loke e lidernan religioso ta siña hende tokante Dios ta robes? Nos por konfia nan?

PA HAÑA SA MAS

Bai na jw.org i wak e vidio Dikon Analisá Loke Beibel Ta Bisa?

Loke Beibel Ta Bisa

Dios no ta e kousa di nos sufrimentu.

Ora nos siña konosé Dios, nunka nos lo kulp’é pa nos sufrimentunan. Por ehèmpel, Beibel ta bisa tokante Dios:

“Tur [Dios] su kamindanan ta hustu . . . Hustu i rekto e ta.”—DEUTERONOMIO 32:4.

“Leu sea di Dios di hasi maldat, i di e Todopoderoso di kometé inikidat.”—YÒB 34:10.

“Ta imposibel ku Dios . . . Todopoderoso por trose hustisia.”—YÒB 34:12, BPK.

Dios no ta aprobá religion ku ta siña mentira tokante dje.

Por ehèmpel, Dios ta rechasá tur religion ku ta siña hende ku ta Dios ta pone nos sufri i e ta rechasá hende ku ta apoyá guera i violensia.

“E profetanan ta profetisá mentira den mi [Dios su] nòmber. Mi no a manda nan, ni a duna nan òrdu, ni a papia ku nan; un vishon falsu . . . i desepshon di nan mes mente nan ta profetisá na boso.”—YEREMÍAS 14:14.

Hesus a kondená hipokresia religioso.

“No ta tur hende ku bisa mi: ‘Señor, Señor,’ lo drenta e Reino di shelu, sino esun ku ta hasi e boluntat di mi Tata ku ta den shelu. Hopi hende lo bisa mi riba e dia ei: ‘Señor, Señor, nos no a profetisá den bo nòmber, saka demoño den bo nòmber i hasi hopi obra poderoso den bo nòmber?’ Sinembargo, lo mi bisa nan públikamente e ora ei: ‘Mi no konosé boso! Bai for di mi, hasidónan di maldat!’”—MATEO 7:21-23.