Pero algun pareha no ta hasi bon uso di teknologia. Esei por kousa e siguiente problemanan:

• Nan ta pasa ménos tempu huntu.

• Nan por pasa mas tempu ta traha ku loke ta nesesario.

• Nan por kuminsá skonde kos for di otro i asta bira infiel.

ORA BOSO TA HUNTU

Un esposo ku yama Micheal a bisa: “Tin biaha ora ami ku mi esposa ta huntu, ta komo si fuera e no t’ei. E ta muchu okupá riba su telefòn i e ta bisa: ‘Ta awor mi tin tempu pa ta riba mi telefòn.’” Un esposo ku yama Jonathan a bisa ku den situashon asina “un pareha por ta físikamente banda di otro i tòg sinti ku nan no ta huntu.”

PENSA RIBA ESAKI: Bo tin kustumber di atendé yamada òf mensahe di telefòn ora bo mester ta dedikando tempu na bo kasá?—EFESIONAN 5:33.

TRABOU

Algun trabou ta eksigí pa nan trahadónan ta disponibel tur ora. Pero tin hende ta pasa demasiado tempu ta traha ora nan ta na kas, aunke nan trabou no ta eksigí esei. Un esposo ku yama Lee a atmití ku “ta difísil pa keda sin wak kada yamada òf mensahe di telefòn ku e ta haña for di trabou durante e tempu ku el a pone un banda pa pasa ku su esposa.” Un esposa ku yama Joy a bisa: “Mi ta traha for di kas. Pues, ta difísil pa sa ki ora mi mester stòp di traha. No ta fásil pa haña un balansa.”

PENSA RIBA ESAKI: Bo ta pone bon atenshon ora bo kasá ta papia ku bo?—LUKAS 8:18.

KEDA FIEL NA BO KASÁ

Un enkuesta a mustra ku hopi pareha kasá a yega di pleita ku otro pasobra un di nan a pone algu sospechoso riba ret sosial. Dies porshento di esnan ku a partisipá den e enkuesta a atmití ku nan a yega di pone kos online ku nan no tabata ke pa nan pareha haña sa di dje.

No ta pòrnada hopi hende ta pensa ku ret sosial por ta peligroso pa un pareha kasá i e por asta hasié mas fásil pa nan kometé adulterio. De echo, hopi abogado a bisa ku ret sosial a kaba ku hopi matrimonio.

PENSA RIBA ESAKI: Bo ta skonde loke bo ta papia ku un hende di sekso opuesto for di bo kasá?—PROVERBIONAN 4:23.

PONE PRIORIDAT

Un persona ku ta keda sin kome lo no keda saludabel. Di mes manera, un persona ku ta keda sin pasa tempu ku su kasá lo haña problema den su matrimonio.—Efesionan 5:28, 29.

Papia ku bo kasá pa wak kua di e sugerensianan aki bou boso lo ke apliká, òf skirbi otro kos ku boso lo ke hasi pa asina teknologia no tin un efekto negativo riba boso matrimonio.

• Kome por lo ménos un biaha pa dia huntu

• Skohe momento spesífiko ku boso niun di dos lo no usa boso aparatonan elektróniko

• Skèdjel tempu pa hasi kos leuk huntu

• Paga boso aparatonan elektróniko anochi òf pone nan leu for di unda boso ta drumi

• Apartá 15 minüt tur dia pa papia ku otro sin ku boso aparatonan elektróniko ta banda di boso

• Stòp di usa Internet na un orario spesífiko tur dia