Ki Efekto Teknologia Tin Riba Bo Yunan?
Kisas ta difísil pa adultonan siña usa aparatonan elektróniko òf programanan nobo. Pero esei no ta e kaso ku mucha. Teknologia semper tabata parti di nan bida. Pues, pa nan ta masha fásil pa usa teknologia.
Sinembargo, algun hende a nota ku mucha ku ta pasa hopi tempu online por haña nan ku e siguiente problemanan:
-
Nan por bira adikto na nan aparatonan elektróniko.
-
Nan ta tèr otro hende online òf otro hende por tèr nan online.
-
Nan por wak imágen pornográfiko intenshonalmente òf aksidentalmente.
LOKE TA BON PA BO SA
ADIKSHON
Algun di e kosnan ku hende por hasi online, manera hunga wega, por ta hopi adiktivo. Esei no ta nada straño, pasobra nan a ser diseñá pa ta adiktivo. Por ehèmpel, e buki Reclaiming Conversation ta bisa ku hopi “app riba nos telefòn ta diseñá pa pone nos keda riba nos telefòn mas tantu posibel.” Hopi kompania ta gana plaka ora nos wak nan propaganda. Pues, mas nos usa un app ku tin nan propaganda, mas plaka nan ta gana.
PENSA RIBA ESAKI: Bo yunan ta pasa muchu tempu riba nan aparatonan elektróniko? Kon bo por yuda nan usa nan tempu mihó?—EFESIONAN 5:15, 16.
TÈRMENTU ONLINE
Algun hende ta bira mas agresivo i vulgar ora nan ta online, i nan no ta tene kuenta ku sintimentu di otro hende. Esei por pone ku nan ta kuminsá tèr hende online.
Algun hende ta komportá nan mes asina online pasobra nan ke haña mas likes òf nan ke pa hende follow nan riba ret sosial. Ademas, un persona por sintié di hùrt, pasobra el a mira ku tabatin un fiesta i e no a haña invitashon. E por sinti ku ta pa malu nan no a invit’é.
PENSA RIBA ESAKI: Kon mi yunan ta komportá nan mes online? (Efesionan 4:31) Nan ta sinti nan malu ora otro hende hasi kos sin invitá nan?
PORNOGRAFIA
Ta masha fásil pa wak kos inmoral riba Internet. Tin algun programa ku por yuda mayornan kontrolá loke nan yunan ta wak online, pero no ta semper esei ta funshoná.
Sexting—mandamentu di mensahe, potrèt òf vidio seksualmente eksplísito—por ta kontra di lei. Mayoria di biaha sexting ta ser hasí via telefòn. Den algun kaso, ora hóbennan manda òf wak imágennan inmoral di otro hóben, nan por ser akusá di a distribuí pornografia di mucha, i esei ta un krímen hopi serio.
PENSA RIBA ESAKI: Kon bo por yuda bo yunan resistí e tentashon di manda òf wak potrèt inmoral online?—EFESIONAN 5:3, 4.
KIKO BO POR HASI?
SIÑA BO YUNAN
Aunke ku ta fásil pa mucha usa teknologia tòg nan mester di yudansa. E buki Indistractable ta bisa ku ora bo duna bo yunan un telefòn òf un otro aparato elektróniko sin ku nan sa kon pa us’é, “ta mes iresponsabel ku laga nan bula den un pisina sin sa kon pa landa.”
PRINSIPIO DI BEIBEL: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”—PROVERBIONAN 22:6.
Marka kua di e sugerensianan aki bou bo tin gana di apliká, òf skirbi algu otro ku bo ke hasi.
-
Siña mi yu kon pa komportá su mes online
-
Yuda mi yu pa e no sinti su mes malu ora e no ser invitá pa algu
-
Programá e aparatonan elektróniko di mi yu di tal manera ku e no por yega fásil na kos malu online
-
Kontrolá e telefòn di mi yu regularmente
-
Pone un límite na e kantidat di tempu ku mi yu por pasa kada dia riba aparatonan elektróniko
-
No permití mi yu bai ku su aparatonan elektróniko den su kamber ora e ta bai drumi
-
No permití aparatonan elektróniko na mesa ora di kome
Otro Artíkulo Interesante
LOKE HÓBEN SA PUNTRA
Kiko Mi Mester Sa Tokante Sexting?
Nan ta preshoná bo pa sext? Kiko ta e konsekuensianan di sexting? Ta djis flirtmentu e ta?
MATRIMONIO i FAMIA
Mi Mester Duna Mi Yu un Selular?
Hasi e preguntanan akí pa wak si abo i bo yu ta kla pa e responsabilidat.
MATRIMONIO i FAMIA
Siña Bo Yunan Kon pa Usa Selular na un Manera Sabí
Asta mucha ku sa hopi di teknologia mester pa nan mayornan siña nan kon pa usa selular na un manera responsabel.
