Algun mayor ta hasi sigur ku nan yunan ta yuda ku trabou di kas, i e yunan ta hasi esei sin keha. Pero tin mayor ku no ta ferwagt dje hopi ei di nan yunan, i e yunan ta keda masha kontentu ku esei, i nan no ta yuda ku kasi nada mas den kas.

Investigadónan ta ripará e tendensia akí den hopi pais kaminda e muchanan ta kustumbrá di haña i no di duna. Un mayor ku yama Steven a bisa: “Awendia, mayornan ta laga nan yunan so na kas ta hunga wega di vidio, surf riba Internet i wak televishon. Mayornan ta ferwagt masha poko di nan.”

Kiko abo ta pensa? Trabou di kas ta importante djis pa mantené kas so òf pa un yu su desaroyo tambe?

Algun mayor no ta duna nan yunan trabou di kas pa hasi pasobra nan yunan tin hopi hùiswèrk i aktividat despues di skol. Pero ban wak kiko ta e benefisionan.

Trabou di kas ta yuda mucha madurá. Mucha ku ta hasi trabou di kas tin mas chèns di bai bon na skol. Dikon? Pasobra esei ta yuda nan haña nèt e kualidatnan ku nan tin mester; nan ta bira mas sigur di nan mes, mas disipliná i mas determiná.

Trabou di kas ta prepará mucha pa yuda i sirbi hende. Algun hende a ripará ku ora mayornan ta ferwagt pa nan yunan yuda den kas, tin mas chèns ku e yunan akí lo ofresé nan mes pa yuda den komunidat ora nan bira adulto. Esaki no ta nada straño pasobra trabou di kas ta train nan pa pensa riba nesesidat di otro hende tambe i no riba nan mes so. Di otro banda, Steven, ku nos a menshoná anteriormente, a ripará lo siguiente: “Ora bo no ta ferwagt nada di un mucha, e ta kuminsá pensa ku ta hende mester sirbié, i e ta krese ku un pensamentu robes tokante bida, responsabilidat i trabou duru.”

Trabou di kas ta uni famia. Ora yunan ta hasi esfuerso pa yuda den kas, nan ta realisá ku no solamente nan ta un parti importante di e famia, sino tambe ku nan tin ku kòrda riba e famia. Pero yunan por keda sin siña e lès akí ora mayornan ta duna prioridat na aktividatnan despues di skol en bes di duna prioridat na trabou di kas. Puntra bo mes: Ki bal si mi yu tin un bon relashon ku su tim di futbòl pero e no tin un bon relashon ku su famia?

Kuminsá ora nan ta chikitu. Algun hende ta bisa ku mayornan mester duna mucha trabou di kas ora nan hasi tres aña. Otronan ta rekomendá pa kuminsá ku dos aña òf asta mas trempan. E punto ta ku ora mucha ta hopi chikitu, nan ta gusta traha huntu ku nan mayornan i nan ta imitá nan mayornan.—Prinsipio di Beibel: Proverbionan 22:6.

Duna bo yunan kos di hasi ku ta pas pa nan edat. Por ehèmpel, un mucha di tres aña por ruim op su ko’i hunganan, limpia algu ku a basha abou òf separá e pañanan ku por laba huntu. Muchanan mas grandi por stòfzùig kas, laba outo òf asta kushiná. Duna bo yu trabou segun su kapasidat. Lo bo keda sorprendí kon entusiasmá e ta bira relashoná ku trabou di kas.

Duna prioridat na trabou di kas. Esaki por bira difísil ora bo yu tin hopi hùiswèrk tur dia. Sinembargo, segun e buki The Price of Privilege, ora mayornan no duna nan yunan trabou di kas pa hasi djis pa e yunan haña bon punto na skol, esei “ta un señal ku a pone prioridat robes.” Manera nos a menshoná kaba, ora un mucha ta hasi trabou di kas, esei ta yud’é bira un mihó studiante na skol. I e lèsnan ku abo ta siña nan ta prepará nan pa ora nan tin nan mes famia.—Prinsipio di Beibel: Filipensenan 1:10.

Enfoká riba e meta i no riba e resultado. Maske lo bo deseá pa bo yu kaba lihé ku trabou di kas, un mucha ta tuma mas tempu pa kaba ku su trabou. Lo bo ripará tambe ku e kalidat di e trabou por ta mihó. Ora esei sosodé, no kuminsá hasié bo mes. Kòrda: Bo meta no ta pa bo yu hasi e trabou manera un adulto, sino pa yud’é bira responsabel i deskubrí ku trabou por dun’é goso.—Prinsipio di Beibel: Eklesiástes 3:22.

Wak kiko ta e berdadero rekompensa. Algun hende ta bisa ku si bo paga bo yu pa hasi trabou, esei lo siñ’é bira responsabel. Otronan ta bisa ku esei ta yuda mucha focus riba loke nan por haña for di e famia en bes di riba loke nan por duna e famia. Tambe nan ta spièrta mayornan ku un mucha por nenga di hasi trabou di kas ora e tin sufisiente plaka, lokual ta mustra ku e mucha no a komprondé dikon e mester hasi trabou di kas. Kiko ta e lès? Ku ta mihó pa mayornan tene trabou di kas i zakgeld separá for di otro.