Salú Emoshonal
Beibel ta papia di emoshon negativo ku nos mester evitá i di emoshon ku ta bon pa nos kultivá.
RABIA
PRINSIPIO DI BEIBEL: “Esun ku no ta rabia lihé ta mihó ku e [hende] poderoso.”—Proverbionan 16:32.
LOKE ESAKI TA ENSERÁ: Ta bon si nos ta siña dominá nos emoshonnan. Nos tur por rabia de bes en kuando, pero loke no ta bon ta si nos pèrdè kabes. I a keda komprobá ku un hende ku pèrdè kabes hopi biaha ta bisa òf hasi kos ku despues e ta lamentá.
LOKE BO POR HASI: Siña dominá bo rabia promé ku e dominá bo. Tin hende ta pensa ku ora un hende eksplotá di rabia, esei ke men ku e ta un hende fuerte, pero eigenlijk e ta un hende débil. Beibel ta bisa: “Esun ku no tin dominio riba su spiritu ta manera un stat bashá abou, sin muraya.” (Proverbionan 25:28) Un bon manera pa dominá nos rabia ta di buska pa sa kiko a pasa promé ku nos bisa òf hasi algu. P’esei Beibel ta bisa: “Prudensia di un hende ta hasi ku e no ta rabia lihé.” (Proverbionan 19:11) Lo ta bon pa nos skucha ámbos banda di un asuntu, ya ku esaki por yuda nos komprondé e situashon i keda kalmu.
MUSTRA GRATITUT
PRINSIPIO DI BEIBEL: “Mustra ku boso ta gradisidu.”—Kolosensenan 3:15.
LOKE ESAKI TA ENSERÁ: Ta ser bisá ku ta hende gradisidu so por ta felis. Asta hende ku a sufri un pèrdida masha grandi ta rekonosé ku esei ta bèrdat. Nan ta bisa ku loke ta yuda nan trata ku nan emoshonnan ta di enfoká riba loke ainda nan tin en bes di enfoká riba loke nan a pèrdè.
LOKE BO POR HASI: Tur dia, traha un lista di e kosnan ku bo ta gradisidu p’e. Esakinan por ta kos chikitu manera un bunita subida di solo, un bon kòmbersashon ku nos tabatin ku un hende ku nos ta stima òf e simpel echo ku nos tin un dia mas di bida. Si bo pensa riba e kosnan akí i ta gradisidu pa nan, lo bo sinti bo mas felis.
Algu ku por yuda bo hopi ta di pensa riba bo famia- i amigunan i dikon bo ta gradisidu di por tin nan. Pensa kiko bo ta gusta di nan i bisa nan esei, sea personalmente, mediante un karta, un e-mail òf un mensahe via telefòn. Di e manera ei, bo ta fortalesé bo amistat ku nan i lo bo sinti e felisidat di hasi bon pa otro hende.—Echonan 20:35.
OTRO PRINSIPIO DI BEIBEL
Si bo ke skucha lesamentu di Beibel, bo por download e grabashonnan ei na e idioma ku bo ta deseá. Nan ta disponibel na mas o ménos 40 idioma riba jw.org
EVITÁ DISKUSHON.
“E kuminsamentu di pleitu ta manera ora dam kibra; p’esei, laga e asuntu para, promé ku e rementá.”—PROVERBIONAN 17:14.
NO PREOKUPÁ DEMASIADO TOKANTE FUTURO.
“Pues no sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.”—MATEO 6:34.
PENSA PROMÉ KU BO AKTUA.
“Kapasidat di pensa mes lo vigilá bo, disernimentu mes lo protehá bo.”—PROVERBIONAN 2:11, NW.
Otro Artíkulo Interesante
SPIÈRTA!
Kon pa Trata ku Strès
Wak algun prinsipio práktiko ku por yuda bo trata mas mihó ku strès òf asta baha bo strès.
