PRINSIPIO DI BEIBEL: “Ningun hende hamas a odia su mes kurpa; ma e ta aliment’é i trat’é ku masha kariño.”—Efesionan 5:29.

LOKE ESAKI TA ENSERÁ: E prinsipio di Beibel akí ta animá nos pa hasi tur loke nos por pa kuida nos salú físiko. Un informe ta mustra ku hopi problema ku salú tin di haber ku un hende su estilo di bida. P’esei, hende ku ta skohe un bon estilo di bida por tin mihó salú.

LOKE BO POR HASI:

• Kome Saludabel. Skohe alimento saludabel i kòrda bebe sufisiente awa.

• Hasi Ehersisio. Sea kual sea bo edat, ehersisio ta bon pa bo salú, asta si bo tin limitashon físiko of un malesa króniko. Bo famia òf un profeshonal riba tereno di salú por duna bo sugerensia i animashon pa hasi ehersisio, pero finalmente tur kos ta keda den bo man.

• Drumi Sufisiente. Ora un hende tin kustumber di drumi poko, e por haña problema serio ku su salú. Hopi hende no ta drumi sufisiente pasobra nan ta disidí di hasi otro kos en bes di drumi. Pero hende ku ta drumi sufisiente ta skohe pa un bida mas saludabel.

PRINSIPIO DI BEIBEL: “Laga nos limpia nos mes di tur impuresa di karni i di spiritu.”—2 Korintionan 7:1.

LOKE ESAKI TA ENSERÁ: Nos ta benefisiá masha hopi mes ora nos no ta kontaminá nos kurpa ku  supstansia dañino manera sigaria i sigá, ku ta un di e kousanan prinsipal di malesa i morto.

LOKE BO POR HASI: Disidí ki dia lo bo ke stòp di huma i marka e fecha ei riba bo kalènder. Un poko promé ku e fecha ei, deshasí di tur sigaria, asbak, laiter i kualke otro kos ku tin di haber ku e bisio. No bai na lugá kaminda hende ta huma. I bisa bo famia- i amigunan ku bo a disidí di stòp di huma pa nan por apoyá bo.

SEMPER TENE KUENTA KU SIGURIDAT

“Ora bo traha un kas nobo, traha un rant [òf, muraya] na bo dak, pa bo no trese kulpa di sanger riba bo kas, si un hende kai for di dje.”​—DEUTERONOMIO 22:8.

NO RABIA LIHÉ.

“Esun ku no ta rabia lihé tin gran komprondementu, ma esun ku ta rabia lihé ta halsa bobedat.”​—PROVERBIONAN 14:29.

NO KOME DI MAS.

“No anda ku esnan ku ta . . . golos.”​—PROVERBIONAN 23:20.