PRINSIPIO DI BEIBEL: “E plannan di hende balente siguramente ta kondusí na abundansia, ma tur esnan ku tin purá, siguramente ta resultá den pobresa.”—Proverbionan 21:5.

LOKE ESAKI TA ENSERÁ: Ta importante pa traha un plan i pega estriktamente na dje pa bo haña bon resultado. Kòrda ku probablemente lo bo no por kumpra tur loke bo ta deseá, p’esei manehá bo plaka bon.

LOKE BO POR HASI:

• Tene bo mes na un presupuesto. Traha un lista di tur bo gastunan i pone nan bou di diferente kategoria, manera por ehèmpel kuminda, paña i kos di kas. Despues, pone kuantu plaka bo ta pensa di gasta pa kada kategoria. Si bo a gasta di mas pa un kategoria, kohe plaka for di un otro kategoria pa kubri loke falta. Por ehèmpel, si bo gasta mas di loke bo a pensa na gasolin, usa parti di e plaka ku bo a apartá pa kos ménos importante, manera por ehèmpel, pa kome na un restorant.

• Evitá debe innesesario. Si ta posibel, evitá di hasi debe. Mas bien, spar plaka pa kumpra loke bo mester. Si bo tin credit card, purba di paga bo debe kompleto tur luna pa evitá di paga interes. I si bo tin un debe kaba, traha un plan kon pa paga bèk i pega na bo plan.

  Un estudio a indiká ku ora di paga ku credit card, hende tin tendensia di gasta mas plaka. P’esei, si bo tin credit card, no us’é pa loko.

PRINSIPIO DI BEIBEL: “Den hèrfst e floho no ta plug; p’esei e ta pidi den tempu di kosecha, ma e no ta haña nada.”—Proverbionan 20:4.

 LOKE ESAKI TA ENSERÁ: Flohedat por hiba na pobresa. P’esei, sea un bon trahadó, i manehá bo plaka bon pa bo por tin loke bo mester den futuro.

LOKE BO POR HASI:

• Traha duru. Ora bo ta traha duru i ta responsabel, ta mas fásil pa keda ku un trabou. Un doño di trabou ta balorá un persona responsabel.

• Sea onesto. No hòrta bo doño di trabou. Ora bo ta desonesto, bo ta daña bo reputashon i ta bira difísil pa bo haña un otro trabou despues.

• Evitá golosidat. Si semper bo ta purba di haña mas i mas plaka, ku tempu lo bo daña bo salú i bo amistat ku otro hende. Kòrda, plaka no ta e kos di mas importante den bida.

NO GASTA BO TEMPU I PLAKA NA BISIO.

“Pasobra e buraché i e hende golos lo bira pober, i kabishamentu lo hasi un hende bisti paña kibrá.”​—PROVERBIONAN 23:21.

NO PREOKUPÁ DEMASIADO KU PLAKA.

“Stòp di ta anshá pa boso bida, esta, kiko boso lo kome òf kiko boso lo bebe, òf pa boso kurpa, esta, kiko boso lo bisti.”​—MATEO 6:25.

NO ENVIDIÁ OTRO HENDE.

“Hende haragan [òf, “ku ta envidiá,” NW] ta kore tras di rikesa, sin sa ku pobresa ta ward’é.”​—PROVERBIONAN 28:22, BPK.