Kiko Nos Por Siña for di Organismo Bibu?
Tur rònt di nos tin organismo bibu ku ta krese, move i multipliká. Nan ta hasi nos planeta bunita i úniko. Awe, hende sa mas tokante organismo bibu ku nunka promé. Kiko organismo bibu por bisa nos tokante kon bida a kuminsá? Laga nos wak.
Ta parse ku bida a ser diseñá. Un organismo ta konsistí di vários sèl. Kada sèl mester hasi hopi kos kompliká pa asina e organismo por sobrebibí i reprodusí. Esei ta e kaso asta pa e organismonan di mas simpel. Por ehèmpel, kada sèl di zürdeg ku ta ser usá pa traha pan ta un organismo chikitu bibu. Kompará ku sèl di hende, e sèl di zürdeg por parse simpel. Sinembargo, e ta masha kompliká. E sentro di kada sèl ta kontené un kódigo di DNA ku ta bisa e sèl kiko pa hasi. Kada sèl tin un tipo di “mashin” mikroskópiko ku ta separá, transportá i modifiká molekül. E stapnan ei ta importante pa e organismonan akí por biba. Ora e kuminda di un sèl di zürdeg kaba, e ta kuminsá un proseso kímiko hopi sofistiká ku ta pone e sèl traha ménos duru i bira inaktivo, komo si fuera ta drumí e ta. Pa e motibu ei, zürdeg por keda wardá largu den kushina i bira aktivo atrobe ora nos us’é pa traha pan.
Sientífikonan tin hopi aña ta studia sèl di zürdeg pa nan por komprondé sèl di hende mihó. Pero ainda tin hopi kos ku nan no ta komprondé. Profesor Ross King di Chalmers University of Technology na Suesia a bisa: “No tin sufisiente biólogo pa hasi tur e eksperimentonan ku nos ke hasi pa komprondé ni sikiera kon un organismo simpel manera zürdeg ta funshoná.”
Kiko abo ta pensa? E echo ku un sèl di zürdeg ta asina kompliká no ta mustra ku e tabata diseñá? Bo ta pensa ku un diseño asina kompliká por a kuminsá eksistí sin un Kreador?
Bida por bini solamente for di otro kos bibu. Molekül chikitu ku yama nucleotiden ta forma DNA. Kada sèl humano tin 3,2 mil mion nucleotiden. E molekülnan akí ta krea un kódigo spesífiko ku ta bisa e sèl kon pa traha enzima i proteina.
E chèns pa nuncleotiden forma spontáneamente riba nan mes ta ménos ku 1 den 10150 (1 ku 150 sero su tras). Un suseso asina ta práktikamente imposibel.
Echo ta ku sientífikonan nunka a logra traha algu bibu for di algu ku no ta bibu.
Bida di hende ta algu masha spesial. Ningun organismo bibu no por disfrutá di bida plenamente manera hende. Nos tin e abilidat di krea kos, sosialisá i ekspresá nos emoshonnan. Nos por disfrutá di tur e kosnan ku nos ta smak, hole, tende i mira. Nos ta plania pa futuro i ta buska propósito den bida.
Kiko abo ta pensa? E abilidatnan ei a bini di evolushon pasobra nos tabatin mester di nan pa sobrebibí i reprodusí? Òf nan ta indiká ku bida ta un regalo di un Kreador amoroso?
