PA HOPI tempu hende a kere ku meuchi di nortpol ta bula alrededor di 35.000 kilometer for di nortpol pa bai zùitpol i despues bini bèk. Sinembargo, estudionan resien ta mustra ku e paranan akí eigenlijk ta bula distansianan hopi mas largu.

Nan a pone aparato chikitu na un par di meuchi pa por lokalisá nan. E aparatonan akí tin mas o ménos e mesun peso ku un peperklep. Anto asina nan a haña sa ku algun meuchi ta bula alrededor di 90.000 kilometer durante un biahe di ida i buèlta di nortpol pa zùitpol. Esaki ta e migrashon di bestia di mas largu ku hende konosé. Figurá bo, un para a bula kasi 96.000 kilometer! Pakiko nan a ahustá e sifra akí?

Sin importá for di unda e meuchinan di nortpol a kuminsá nan ruta via Oséano Atlántiko, nan ruta no tabata stret sino tin forma di un S manera bo por mira riba e mapa. Dikon nan ta bula asina? E paranan akí simplemente ta probechá di e direkshon di bientu.

Meuchi por biba rònt di 30 aña, i nan por bula mas ku 2.4 mion kilometer durante nan bida. Nos por kompará esei ku tres pa kuater biahe ida i buèlta pa luna. Un investigadó a bisa: “Esaki ta un logro impreshonante pa un para ku ta pisa apénas un tiki mas ku 100 gram.” Ademas, komo ku meuchi di nortpol ta eksperensiá zomer tantu na nortpol komo na zùitpol, “nan ta mira mas lus di dia pa aña ku kualke otro ser bibu,” segun e buki Life on Earth: A Natural History.