LOKE ALGUN HENDE TA BISA

E israelitanan tabata adorá un “dios di guera” ku gusta dramamentu di sanger.

LOKE BEIBEL TA BISA

E nashonnan ku Israel a derotá tabata masha malbado; nan tabata sumamente violento i inmoral pasobra nan tabata tene relashon seksual ku bestia, ku nan propio famia i nan tabata sakrifiká mucha. Despues ku pa vários siglo Dios a duna nan oportunidat pa kambia, el a bisa e israelitanan: “Ta ku tur esakinan e nashonnan, ku mi ta bai kore ku nan saka nan for di boso dilanti, a wòrdu kontaminá.”—Levítiko 18:21-25; Yeremías 7:31.

“Ta pa motibu di e maldat di e nashonnan akí SEÑOR bo Dios ta kore ku nan for di bo dilanti.”—Deuteronomio 9:5.

LOKE KISAS BO A RIPARÁ

Ora tin guera, lidernan religioso ta bisa ku Dios ta na nan banda. E buki The Causes of War ta bisa: “Semper religion a hunga un ròl importante den tur guera.”

LOKE BEIBEL TA BISA

Dios no a duna outorisashon na kristiannan pa bringa kontra nan enemigunan den guera. Apòstel Pablo a bisa su kompañeronan kristian: “Si ta posibel, te asina leu ku ta dependé di boso, keda na pas ku tur hende. No tuma vengansa.”—Romanonan 12:18, 19.

Hesus tampoko no a manda su siguidónan pa bai guera. Al kontrario, el a bisa nan: “Sigui stima boso enemigunan i hasi orashon pa esnan ku ta persiguí boso, pa boso por demostrá ku boso ta yu di boso Tata ku ta den shelu.” (Mateo 5:44, 45) Asta si un nashon bai guera, kristiannan ku ta biba einan si ta keda neutral pasobra nan “no ta parti di mundu.” (Huan 15:19) Dios ke pa su sirbidónan den tur nashon stima nan enemigunan i pa nan keda separá di mundu. Pues, bo ta kere ku lo e apoyá un pais òf grupo ora tin guera?

“Mi reino no ta parti di e mundu akí. Si mi reino tabata parti di e mundu akí, mi sirbidónan lo a bringa pa mi no ser entregá den man di e hudiunan. Ma echo ta ku mi reino no ta djaki.”—Huan 18:36.

LOKE ALGUN HENDE TA BISA

Guera ta algu inevitabel. E buki War and Power in the 21st Century ta bisa: “Guera lo no kaba pasobra no tin ningun speransa ku pas mundial i permanente lo reina den e siglo akí.”

LOKE BEIBEL TA BISA

Guera lo kaba ora hende no ta deseá di mata otro mas i ora no tin arma mas. P’esei e Reino di Dios ku ta un berdadero gobièrnu den shelu pronto lo eliminá tur arma ku tin riba nos planeta i siña hende kon pa keda na pas ku otro hende. Beibel ta primintí ku Dios lo rektifiká asuntu “pa nashonnan leu i poderoso. E ora ei nan lo bati nan spadanan traha plug ku nan, i nan lo bati nan lansanan traha skèr-pa-snui ku nan; nashon lo no lanta spada kontra nashon, i nunka mas nan lo no train pa guera.”—Mikéas 4:3.

Beibel ta bisa ku bou di e Reino di Dios lo no tin ningun gobièrnu mas ku ta lucha pa e interesnan di nan propio pais, tampoko lo no tin ningun maneho inhustu mas ku ta pone siudadanonan lanta kontra gobièrnu ni prehuisio ku ta kousa divishon. Komo resultado lo no tin guera mas. Dios ta primintí: “Nan lo no kousa daño ni destrukshon . . . pasobra Tera lo ta yen di e konosementu di SEÑOR, manera awa ta tapa laman.”—Isaías 11:9.

“E ta hasi gueranan stòp te na e fin di tera; e ta kibra bog i ta kòrta lansa na dos; e ta kima e garoshinan ku kandela.”—Salmo 46:9.