NOS tur ta sinti nos bon i ta apresiá ora un persona ta mustra interes den nos i ta amabel ku nos. Esei ta duna nos un sintimentu di gratitut. Pues, kon nos por kultivá e bunita kualidat di amabilidat?

Un persona amabel ta mustra interes sinsero den otro hende mediante su palabra- i echonan. Amabilidat no ke men djis mustra bon manera. E ta mas ku esei; e ta un kualidat ku ta ser demostrá ku echo. Berdadero amabilidat ta motivá pa amor profundo i empatia pa hende. Mas ku esei, amabilidat ta parti di e fruta di spiritu ku tur kristian mester kultivá. (Gal. 5:22, 23) Pues, laga nos wak kon Yehova i su Yu a mustra e kualidat akí i kon nos por sigui nan ehèmpel.

Yehova ta amabel ku tur hende, asta ku “hende malagradesí i malbado.” (Luk. 6:35) Por ehèmpel, Yehova “ta laga su solo sali riba mal hende i bon hende i ta laga awa kai riba hende hustu i inhustu.” (Mat. 5:45) Pues, asta hende ku no ta rekonosé Yehova komo nan Kreador ta benefisiá di su provishonnan amoroso pa asina nan por biba i disfrutá di un grado di felisidat.

Nos por mira un bon ehèmpel di Yehova su amabilidat na e manera ku el a trata ku Adam ku Eva. Poko tempu despues ku Adam ku Eva a peka, nan “a kose blachi di figu pega na otro” pa tapa nan kurpa ya ku nan tabata sunú. Sinembargo, Yehova tabata sa ku nan lo tabatin mester di paña adekuá pa nan biba pafó di Eden. Dikon? Pasobra e tera tabata maldishoná i yen di “sumpiña i bringamosa.” Pues, Yehova a mustra amabilidat na nan. El a mira nan nesesidat i “a traha bistí di kueru pa” nan.—Gén. 3:7, 17, 18, 21.

Aunke Yehova ta amabel ku “hende hustu i inhustu,” e ta gusta mustra amabilidat foral na su sirbidónan fiel. Por ehèmpel, den tempu di profeta Zakarías, un angel tabata preokupá pasobra e hendenan a stòp ku e rekonstrukshon di e tèmpel na Herúsalèm. Yehova a skucha e angel su preokupashonnan i a kontest’é ku “palabranan kariñoso” i “palabranan di konsuelo.” (Zak. 1:12, 13) Yehova a trata profeta Elías na un manera similar. Na dado momento, e profeta tabata asina deprimí ku el a pidi Yehova pa mat’é. Yehova a presta atenshon na e sintimentunan di Elías i a manda un angel pa fortalesé. Ademas, Yehova a sigurá e profeta ku e no tabata so. Despues ku Elías a skucha e palabranan amoroso akí i a risibí e yudansa ku e tabatin mester, e por a sigui ku su asignashon. (1 Rei. 19:1-18) Awor, ken tabata e sirbidó di Dios ku a imitá e kualidat akí mihó ku tur otro persona?

Durante Hesus su sirbishi riba tera, e tabata konosí komo un persona amabel i  komprensivo. Nunka e no tabata kruel ni arogante. Ku empatia el a bisa: “Bini serka mi, boso tur ku ta traha duru i ku ta kargá, i lo mi refreská boso. . . . Pasobra mi yugo ta suave.” (Mat. 11:28-30) Komo ku Hesus tabata amabel, hende tabata siguié tur kaminda ku el a bai. Hesus “a haña duele di nan,” i p’esei el a alimentá nan, kura esnan malu i enfermo i “siña nan hopi kos” tokante su Tata.—Mar. 6:34; Mat. 14:14; 15:32-38.

Ku Hesus tabata amabel tambe tabata bisto den e manera ku el a trata hende. De echo, asta ora Hesus tabata ke ta su so, semper el a risibí e hendenan ku tabata busk’é “amablemente.” (Luk. 9:10, 11) Por ehèmpel, na un okashon, un muhé ku tabata sufri di sangramentu pa 12 aña a mishi ku fraña di Hesus su paña pa asina e por a kura. Bon mirá, e no tabatin mag di hasi esei, pasobra e tabata seremonialmente impuru. (Lev. 15:25-28) Pero Hesus no a reprendé. Mas bien, ku kompashon, el a bisa e muhé morto spantá: “Mi yu, bo fe a kura bo. Bai na pas, sea salú i ku e malesa penoso akí no molestiá bo mas.” (Mar. 5:25-34) Esta amabel di Hesus su parti!

Den e ehèmpelnan ku nos a kaba di trata, nos a mira ku ta nesesario pa demostrá amabilidat ku echo. Den e ilustrashon di e bon samaritano, Hesus a enfatisá e punto akí. Aunke e samaritanonan i e hudiunan tabata odia otro, e hòmber samaritano a sinti duele pa e hòmber hudiu ku nan a atraká, maltratá i a laga kasi pa morto bentá riba kaminda. Amabilidat a motivá e hòmber samaritano pa yuda e hòmber hudiu. El a trata e hòmber su heridanan i a hib’é na un posada. Despues, e samaritano a paga e doño di e posada pa kuida e hòmber heridá, i el a asta ofresé di paga pa kualke gastu adishonal.—Luk. 10:29-37.

Ta bèrdat ku mayoria di bes amabilidat ta ser demostrá ku echo, pero ta posibel tambe pa demostr’é ku palabra animante. Pues, aunke ku “ansha den kurason di hende ta hasié abatí,” Beibel ta bisa tambe ku “un bon palabra ta hasié kontentu.” (Pro. 12:25) Nos por pone otro hende sinti nan mihó si nos laga amabilidat i bondat konmové nos pa kompartí algu animante ku nan. * Nos palabranan amoroso lo mustra nan ku nos ta interesá den nan. Esei lo duna nan forsa pa enfrentá e difikultatnan di bida.—Pro. 16:24.

Komo ku nos a ser kreá “segun e imágen di Dios,” tur hende tin e kapasidat pa kultivá e kualidat di amabilidat. (Gén. 1:27) Nos por tuma e ehèmpel di Hulio, un funshonario di alto rango di e ehérsito romano, kende a hiba apòstel Pablo Roma. Ora nan a yega e stat Sidon, Hulio a trata apòstel Pablo “ku masha bondat i a permitié bai serka su amigunan i laga nan perkurá p’e.” (Echo. 27:3) Un poko tempu despues, e barku ku Pablo tabata ariba a noufragá. E habitantenan di Malta a risibí Pablo i esnan ku tabata huntu kuné “amablemente.” E habitantenan a asta sende un kandela pa nan komo ku áwaseru tabata kai i tabata hasi friu. (Echo. 28:1, 2) Aunke nan esfuerso ta di elogiá, amabilidat ta enserá mas ku djis hasi algu bon de bes en kuando.

Pa nos por agradá Yehova kompletamente, amabilidat mester bira parti di nos personalidat i di nos bida. Pero, no ta semper fásil pa demostrá amabilidat. Dikon nò?  Kisas ta pasobra hende ta oponé nos òf pasobra nos ta tímido i insigur òf kisas ainda nos ta lucha ku egoismo. No opstante, nos por vense e opstákulonan akí si nos dependé riba spiritu santu i sigui Yehova su ehèmpel di amabilidat.—1 Kor. 2:12.

Awor, ki medida práktiko nos por tuma pa ta mas amabel? Pa kuminsá, nos por puntra nos mes: ‘Mi ta skucha ku kompashon? Mi ta atento na e nesesidatnan di otro hende? Ki dia tabata e último biaha ku mi tabata amabel ku un hende ku no ta mi famia òf mi amigu será?’ Despues, nos por pone meta pa konosé e personanan ku nos ta anda kuné mihó, spesialmente nos rumannan den kongregashon. Hasiendo esei, nos por bira konsiente di nan sirkunstansia- i nesesidatnan. Unabes nos sa kiko nan sirkunstansia- i nesesidatnan ta, nos tin ku hasi esfuerso pa trata nan mes amabel ku nos lo ke pa otro hende trata nos si nos tabata den nan situashon. (Mat. 7:12) Finalmente, si nos pidi Yehova pa yudansa, lo e yuda nos ta mas amabel.—Luk. 11:13.

Pablo tabata un persona masha amabel. Por ehèmpel, “tur hende ku tabata bini serka dje e tabata risibí amablemente.” (Echo. 28:30, 31) Pablo tabata mustra interes personal den hende i tabata demostrá esaki ku palabra i echo. P’esei, hende tabata sinti nan mes atraí na dje. Di mes manera, nos tambe por atraé hende na e bèrdat si nos ta amabel. Ora nos ta amabel ku tur hende, inkluso esnan ku ta oponé nos, nos lo yega na nan kurason i kisas motivá nan pa kambia nan aktitut. (Rom. 12:20) Ku tempu, nan lo por asta aseptá e mensahe di Beibel.

Den Paradeis, tur hende ku ser resusitá lo eksperensiá berdadero amabilidat. Kisas esei lo ta promé biaha ku nan ta eksperensiá amabilidat, i esei siguramente lo hasi nan masha felis. Ku un kurason yen di gratitut, nan lo sinti nan motivá pa trata otro hende meskos. Hende ku ta demostrá amabilidat i trata otronan ku amor lo haña Dios su aprobashon i risibí bida eterno den Paradeis. Pero, lo no tin lugá pa esnan ku no ta mustra amabilidat i ku no ta yuda otro hende. (Sal. 37:9-11) Siguramente, den e mundu ei lo tin berdadero pas i siguridat. Mientrastantu, kon ser amabel por benefisiá nos for di awor?

Beibel ta bisa ku “e hende miserikòrdioso ta hasi bon na su mes alma.” (Pro. 11:17) Hende ta sinti nan atraí na esnan ku ta amabel i hopi bes nan ta mustra amabilidat bèk. Hesus a bisa: “Ku e midí ku boso ta midi, nan lo midi pa boso.” (Luk. 6:38) Pues, un persona ku ta amabel fásilmente ta haña amigu.

Beibel ta animá nos pa “ta amabel ku tur hende.” (2 Tim. 2:24) Un kongregashon ta benefisiá ora e rumannan ku ta forma parti di dje ta amabel ku otro i ta buska manera pa un yuda otro. Nunka nan lo no ke usa palabra skèrpi, kritiká òf hasi chèrchi di hende. En bes di hasi redu ku por ta perhudisial, nan ta hasi nan bèst pa usa solamente palabra ku ta animá otro hende. (Pro. 12:18) Esei lo kontribuí na un kongregashon ku ta spiritualmente fuerte.

Pues, amabilidat ta un kualidat ku nos ta demostrá ku palabra i echo. Ora nos ta amabel, nos ta imitá e amor i generosidat ku Yehova ta demostrá na nos. (Efe. 5:1) Komo resultado, nos ta fortalesé nos kongregashon i atraé hende na e bèrdat. P’esei, laga nos semper ta konosí komo hende amabel!